Filipi 1 - Aŋwaʼanayn Uso Fey

Achaʼara

¹ Amə umə Pol ni Timoti nu mba mbə ba afaʼa Yeso Kristo mba ŋwaʼanayn aŋwaʼanayn zəŋ. Mba yə Ŋwaʼanayn abú umbən ba Nwiye jum mbənə umə Filipi, nu mbən mə akə anó feyn nə Kristo. Mba yə ŋwaʼanayn abú mbən mbənə amə atəw umə cha ba Kristo. Mba yə nibi ŋwaʼanayn inen umbən mbənə mbən mə were úŋwən.

² Nwiye ungwa Mbaʼ nə Asɨyisəg Yeso Kristo aghəy ichuŋ inen nibi naʼ aborobod inen.

Pol chaʼara Nwiye abú ba Kristo mbənə mbə mə Filipi

³ Ayə naʼa yə beni ayə abú Nwiye akə umaʼ jum mbənə amə kono ngwən.

⁴ Akə umaʼ jum mbənə amə chaʼara Nwiye da umbən ujum, ayə chaʼara nə iwuʼi ungɨŋ inyi fiŋ,

⁵ damugə mbən were aŋu ni saŋa ukən chuŋ da Kristo. Mbən ti ni ghəy nigə inoʼo akə amaʼazənə mbən zəw ukən chuŋ wu ibeni. Mbən yə bugə ghəy nigə izaʼa pey akinine.

⁶ Mə kaŋa kyay kwi Nwiye ŋunə yə ti afaʼa chuŋ zəŋ ungɨŋ inen u yi ighəy kwi mbən faʼa ŋu mara aney zənə Yeso Kristo mi wene izaʼa.

⁷ Yə kaŋa koʼ kwi a kono nigə da umbən jum damugə mə kaŋa wuʼe ngwən ungɨŋ inyi fiŋ azəd. Nwiye yə aghəy ichuŋ ina uma jum akə inji zənə mba mə faʼa abú uŋwən. U yə aghəy nigə akinine ŋunə amə andəŋ, numugə amə ghayn kwi ukən chuŋ amə asiʼ akə ma unó figi. Foro akə Amaʼazənə mə́ mə aghəy kwi ba beni unó mbənə umə ungɨŋ ukən chuŋ.

⁸ Nwiye kyay kwi mə wuʼe ngwən foro kwi ayə nibə kaŋa kaba izən ngwən umbən jum. A yə ghəy nigə aba anji zənə Yeso Kristo wuʼi ngwən.

⁹ Ayə chaʼara Nwiye kwi mbən ki wuʼe umbən unya ŋuw aba imbey. Ayə nibə chaʼara kwi mbən kyay asiʼ da Nwiye nibi kyay ikyaba akaʼa unoʼ chuŋ nə umbi iboŋ.

¹⁰ Boʼo mbən chiyə azənə atana boŋ. Mbən bə aghəy nigə, mbən yi chomo uzayn zayn foro kwi cha ba mi ghayn anó iboŋ da ngwən aney zənə Kristo ni wene izaʼa.

¹¹ Aba Yeso Kristo amə aghəy u aghəy kwi mbən aghəy unó chuŋ nu ukoʼoro da ba wumini Nwiye nibi yere uŋwən.

Ayə ikay boʼo faʼa abú Kristo

¹² Umbuŋ unya, ayə kaba kwi mbən kyay kwi anó zənə aghəy iniŋ yə were ighəy kwi ukən chuŋ u ŋuw imbey.

¹³ Yə aghəy kwi usogwi jum mbənə umə nəmə itoʼ ni ba chini jum u kyay kwi ayə andəŋ damugə a mə ghayn ukən chuŋ da Kristo.

¹⁴ Numugə amə andəŋ, yə si ghəy kwi unya nanaʼ akaʼa umbənə u beni Asɨyisəg tana ghayn inayn Nwiye akə fiŋ kaka foro kwi cha umə goro.

¹⁵ A mə asiʼ kwi ba nanaʼ mbə ghayn ukən chuŋ da Kristo anjim adey nibi foro anjim mugə umə ikwey uma. Asɨmə mbi moʼ mbə ghayn da fiŋ chuŋ.

¹⁶ Umbənə umə ghayn nə fiŋ chuŋ umbə aghəy nigə nə iwuʼi damugə mbən kyay kwi ayə ghayn damugə Nwiye naʼa afaʼa iniŋ kwi a tey kwi ukən chuŋ amə anó asiʼ akə ma unó figi.

¹⁷ Cha ba mbənə umə aghəy adey mə ghayn uma ukən chuŋ nə fiŋ nu izayn. U mbə ghayn amə damugə umə kaba kwi ba nanaʼ beni aboʼo úŋwən. Mbə kono kwi unó mbənə umə ighəy umbi aghəy a tana inyi angəʼ numugə amə andəŋ.

¹⁸ Cha zigə mə ma anó moʼ! Anó kyay zənə amə́ awu amə kwi, kə úŋwən mə ghayn anó da Kristo akə fiŋ chuŋ kə akə fiŋ iboŋ, ayə wuʼ aŋu kwi umbə́ ghayn ukən chuŋ da Kristo akə inji jum.

¹⁹ Ayə ghayn damugə mə kyay kwi anjim achaʼara Nwiye zənə mbən mə chaʼara foro anjim awere zənə a noʼo abú Azugə Yeso Kristo, Nwiye yi chi aŋu angəʼ koŋ.

²⁰ Anó zənə amə kaŋa kaba nibi kyay kwi ayi du akə anó asiʼ nibi niŋi ikono awu amə kwi cha ami noʼ mi mə aŋu ni indere atəw da anó zənə mə́ mə ghayn. Asɨmə akə umaʼ jum amara mə akinine, ayi mə nə fiŋ kaka da iwumini Kristo nə inyi itəni jum. Kanə amə ikuw kə ami ikay,

²¹ damugə abə mə ikay, amə da iwumini Kristo. Amə ikuw, yə boŋ chigə

²² Mə bə chiyə ichomo ikay, iŋu imbey imə aghəy unó chini nu u boŋo, ighəy kwi inay Nwiye ni kwey iŋuw imbey, asɨmə aba zənə ami chi cha atana kyay.

²³ Unó bigə mbə́ igun iniŋ. Ayə ka iniŋ ichi afeyn. Anó zənə mə́ mə kaŋa kaba ami kwi, a sayn isəg zəŋ ŋu chomo aboʼo Kristo. Zəŋ amə anó nu aboŋo chigə.

²⁴ Asɨmə yə boŋ kwi a chomo ikyay da iyere ngwən.

²⁵ Mə kyay kwi anó zəŋ amə anó asiʼ. Mə nibi kyay kwi ayi chomo ikay da iŋu imbey iyere umbən jum da iwuʼi sugi ungɨŋ itən fiŋ numugə mbən beni Kristo,

²⁶ da Amaʼazənə a wene izaʼa inen, mbən yi mə nə aton iwumini Yeso Kristo da anó zənə u chigə inyi injim ighəy.

²⁷ Akinine anó kyayn amə kwi, mbən ni aghəy unó akə inji zənə ikoʼoro numugə ukən chuŋ da Kristo mə itey, da abə tey kwi a zaʼa zən ngwən kə kwi cha adi zaʼa, a yi zəw kwi mbən təm ikay nə fiŋ feyn foro nə ikono feyn nibi zəw kwi mbən yə zoŋo unoŋ izən kwi ba niŋi fiŋ igun Kristo anji zənə ukən chuŋ mə itey.

²⁸ Mbən mə goro ngwən abú umbən ba abana. Zəŋ ayi tey abú úŋwən kwi umbi nim, asɨmə mbən yi du angəʼ. Nwiye si sey kwi ayi mə nigə.

²⁹ Nwiye si na aza inen kwi mbən faʼa abú Kristo akə ma aba ibeni uŋwən, amə nibə da izəw ingəʼ nə uŋwən.

³⁰ Mbən yə zoŋ akinine nə ba abana aba anji zənə mə nibi zoŋ. Anji zənə mbən kyay, amə nigə amə bugə zoŋo.