Filemon 1 - Aŋwaʼanayn Uso Fey

¹ Amə umugə Pol nu amə wa ndəŋ da Yeso Kristo nə Timoti nu amə ungwa unya anóm mba ŋwaʼanayn aŋwaʼanayn zəŋ. Mba yə ŋwaʼanayn inigə ungwə Filemon inja azi nu mba mə faʼa nə uŋwən.

² Mba yə nibi ŋwaʼanayn inigə ungwə Afiya nu amə ungwa unya ayey. Mba yə nibə ŋwaʼanayn inigə ungwə Akipus nu amə Sogwi nu mba. Mba yə nibə ŋwaʼanayn abú ba ujum mbənə umə ungɨŋ ufere ba Kristo ŋunə umə nyi ungɨŋ na Filimon.

³ Nwiye ungwa Mbaʼ nə Asɨyisəg Yeso Kristo ghəy ichuŋ inen nibi naʼ aborobod inen.

Filemon wuʼ ba Nwiye nibi beni Kristo

⁴ Ayə naʼa yə beni ayə abú uŋu Nwiye ighari jum tənə amə chaʼara uŋwən ikono ayə Filemon.

⁵ Ayə ghəy nigə damugə mə zəw umugə ngwə wuʼi ba Nwiye ujum, nibi zəw umugə ngwə zi fiŋ igun Asɨyisəg Yeso.

⁶ Ayə chaʼara Nwiye kwi numugə ngwə niŋi inji beni igun Kristo nu mba. Zəŋ ayi aghəy kwi injə atəw zayn kwi ngwə tana kyay ichuŋ jum zənə imə ina numugə mba mə akə anó feyn nə Kristo.

⁷ Unya, inji zənə ngwə wuʼi ba aghəy kwi ighaʼa sugi ungɨŋ nyi fiŋ. Numugə ngwə mə zure fiŋ ba Nwiye, si zi ikay abú úŋwən.

Pol boʼo ubugə abú Filimon da Onesimus

⁸ Ayə nə fiŋ kaka numugə amə akə anó feyn nə Kristo ighayn inigə kwi ngwə aghəy anó zənə akoʼoro.

⁹ Asɨmə numugə a wuʼi ayə, ayə kaba iboʼo ubugə inigə. Amə umugə Pol nu mbə zi aŋu andəŋ damugə mə təm akə ukum Yeso Kristo.

¹⁰ Ayə boʼo ubugə inigə da uŋu ŋwə̂ Onesimus nu amə mbaʼ ma numugə amə andəŋ.

¹¹ Akə amaʼa moʼ, amə cha afaʼa moʼ abú uŋwən ifaʼ inigə, asɨmə akinine, uyə nə afaʼa ifaʼ inigə foro iniŋ.

¹² Ayi gha cha uŋwən inigə, uŋwən mə kaŋa inyi fiŋ.

¹³ Mə mi wuʼ isiy uŋwən akəŋ aboʼo inyi da uni ywere aŋu faʼa iniŋ akə injə asin numugə amə andəŋ da ukən chuŋ ŋunə amə ghayn.

¹⁴ Asɨmə cha amə kaba ighəy aŋu anó moʼ zənə cha ngwə di beni. Da aghəy moʼ zənə ngwə mə kaba iywere aŋu awu, amə zənə ngwə wuʼi. Ka ma kwi u mbə́ itinə ayə amə tini ki ngwə aghəy.

¹⁵ Ighari moʼ amə aton zənə yə sayn ayə akə amaʼa moʼ da ngwə mi gha mə nə uŋwən akə ighari jum.

¹⁶ I num ayə uŋwən aba ni isob, num uŋwən ni wa ŋunə u chigə ma akə isob. Uŋwən amə unya nu a wuʼi kwaʼa azəd. Mə wuʼ uŋwən asɨmə mə kyay kwi ngwə wuʼ uŋwən chigə yə akə inji zənə a wuʼi. Wuʼ uŋwən ni isob nibi wuʼ uŋwən nə unya numugə mba mə akə ibumi nə Kristo.

¹⁷ Anigə ngwə bə kono kwi amə wa faʼa nə ngwə, num uŋwən anji zənə ngwə mi num aŋu.

¹⁸ Abə mə kwi yə gow anó moʼ inigə kə uyə yimə ayə nə aghəy moʼ ŋwaʼanayn aghəy wu akə uŋu ukum.

¹⁹ Amə umugə Pol ŋwaʼanayn aŋwaʼanayn zəŋ akə umbəŋ ubugə, a yi iwi inigə. Kyay kwi ngwə yimə injugə iniŋ damugə amə numugə ghəy kwi ngwə beni Kristo.

²⁰ Anigə uŋu unya, ayə kaba kwi ngwə ghəy ichuŋ zəŋ iniŋ akə ukum Asɨyisəg. Kaŋa izwuri inyi fiŋ numugə mba mə akə ibumi nə Kristo.

²¹ Mə kyay kwi ngwə yi aghəy unó mbənə a ghayn inigə. A yə ŋwaʼanayn ney kwi ngwə kyay kwi ngwə yi aghəy unó mbəŋ chigə nji zənə a ghayn inigə.

²² Anó chini amə kwi ngwə tana atəw na iniŋ damugə ayə nə ikono kwi anjim achaʼara Nwiye zənə mbən mə chaʼara, Nwiye yi ywere igha cha aŋu inen.

Achaʼara zənə asi Nwi

²³ Epafras nu mba mə ana indəŋ nə uŋwən da ukum Yeso Kristo u yə chaʼara ayə.

²⁴ Umbuŋ unya mbənə mba mə faʼa nə úŋwən nu amə Mak, Aristakus, Demas foro Luk nibi chaʼara ayə.

²⁵ Asɨyisəg Yeso Kristo ghəy ichuŋ inen umbən jum.