Efesus 6 - Aŋwaʼanayn Uso Fey

Ikɨy abú buŋ nə umbaʼ uma

¹ Buŋ, mbən wumini umbən umbaʼ nə umbən ingo numugə mbən mə akə ibumi nə Kristo. Zəŋ amə anó nu akoʼoro kwi mbən aghəy.

² Ayə ungɨŋ Aŋwaʼanayn Nwiye kwi, “Wumini ungwə mbaʼ nə ungwə ingo.” Zəŋ amə noʼo imbey nu u nwi nə anó nu Nwiye kaʼa.

³ “Wumini úŋwən da unó mi mə yeŋ inigə anji chuŋ anigə ngwə chomo akə agha sa igun isəg.”

⁴ Mbaʼ, ka mbən mə aghəy ngwən unó mbənə umi aghəy kwi umbən buŋ usə itəm. Asɨmə mbən ni taʼa úŋwən nibə aghəy kwi ukwey aton unoʼo Asɨyisəg.

Ikɨy abú isob nə mbaʼ afaʼa uma

⁵ Isob, mbən wumini umbən mbaʼ afaʼa mbənə umə akə igun isəg. Mbən guni ngwən asəy abú úŋwən nibi iwumini úŋwən. Mbən ni aghəy nigə nə injən fiŋ jum aba numugə mbən mə iwumini amə Kristo.

⁶ Ka mbən aghəy ngwən ney aba Amaʼazənə umə́ ney ngwən, kə kwi uwuʼe afaʼa zənə mbən mə faʼa. Mbən faʼa akə itən fiŋ jum aba ni kwi mbən mə isob abú Kristo ni aghəy unó mbənə Nwiye mə kaba.

⁷ Mbən faʼa injən afaʼa ni isob akə fiŋ chuŋ ni kwi mbən yə faʼa amə abú Asɨyisəg, aka ni kwi mbən yə faʼa amə abú wa.

⁸ Mbən kyay kwi Asɨyisəg yi choʼo afaʼa abú wa feyn feyn akə afaʼa chuŋ zənə umə faʼa, kə amə isob kə wa ŋunə akə ma isob.

⁹ Mbaʼ afaʼa, mbən ni aghəy ichin ichin abú itən isob. Ka mbən kaʼa ngwən kwi mbən yi nyi úŋwən. Mbən kyay kwi umbən jum mbən yə aba nə Mbaʼ afaʼa feyn nu umə azobo. Cha uŋwən mə aghəy ma aghɨ.

Anó da ughəy berd Nwiye jum

¹⁰ Anó zənə ami nwi ghayn inen amə kwi, mbən chomo akə anó feyn nə Asɨyisəg da ikay ma yə chigə ikay jum tənə imə aghəy ita fiŋ kara.

¹¹ Mbən zi u ghəy berd Nwiye da mbən mi mə nə ikay itəm ikən itən inyo akə buŋ inji debere,

¹² damugə cha mba mə zoŋo ngwa amə nə ba bana nu amə ba inyoŋ atəw. Mba yə zoŋo amə uzugə kaka mbənə umə azobo nə ifon uma. Mba yə zoŋo uzugə kaka mbənə umə ungɨŋ isəg firi zəŋ akinine. Mba yə nibə zoŋo uzugə iboŋ mbənə umə ungɨŋ ufə.

¹³ Anigə mbən zi u aghəy berd Nwiye akinine da unəy iboŋ bə zaʼa, mbən təm ikay. Mbən aghəy unó jum da itəm ikay.

¹⁴ Anigə mbən təm ikay ikod unó asiʼ ni utwiy injən itin, unó mbənə u təm ikoʼoro kəbərə injən iguwə nu mugə atənə iguwə mə kəbərə iguwə abú usogwi.

¹⁵ Mbən tana inyo ni ghayn ukən chuŋ ŋunə umə ghəy kwi ba ni chomo akə aborobod aba numugə ba mbənə umə ŋuw a berd mə zi utabay ughəw uma.

¹⁶ Izwiy akə unó mbəŋ jum, mbən num umugə mbən zi fiŋ igun Kristo a chomo nu a mə a aghəy berd zənə umi num kən ngwən awu nu umi iney iwəd jum tənə imə kyire akə ighoŋ berd tənə wa iboŋ mi num itumə ngwən awu.

¹⁷ Mbən num numugə Nwiye chi ngwən angəʼ chomo ni adam berd atəni nu umə kəbərə atəw wu. Mbən nibi num inayn Nwiye i chomo nu ubey berd nu Azugə Nwiye naʼa inen.

¹⁸ Mbən ni chaʼara Nwiye akə umaʼ jum foro Amaʼazənə mbən mə aghəy unó jum. Mbən aghəy nigə anji zənə Azugə Nwiye naʼa ikay inen. Mbən chomo ikiʼi ka mbən ibó ngwən imə chaʼara Nwiye igun ba Nwiye jum.

¹⁹ Mbən ki chaʼara Nwiye kaba iniŋ kwi Nwiye zi inayn uŋu uchəw Amaʼazənə amə kaba inayn, da ami mə inayn akə fiŋ kaka anigə ighəy ba kyay anó zənə yə paʼa da ukən chuŋ.

²⁰ Ayə ana indəŋ damugə a təm akə ukum Yeso Kristo. Mbən chaʼara Nwiye a ghayn ukən wu nə fiŋ kaka akə inji zənə amə kaba ighayn.

A chaʼara nu asi nwi

²¹ Tayikikus ungwa unya nu a wuʼi kwaʼa azəd nu amə wa umə faʼa abú Asɨyisəg akə fiŋ jum, yi ghayn unó jum da aŋu inen da mbən kyay umugə a məŋi nibi kyay aghəy zənə amə ighəy.

²² Amə aton zənə amə tomo uŋwən inen da mbən kyay umugə mba məŋi. Ayə nibə tomo uŋwən kwi u zaʼa zi ikay inen.

²³ Nwiye Mbaʼ nə Asɨyisəg Yeso Kristo naʼa aborobod, naʼa iwuʼi nibi naʼa ibeni abú unya jum.

²⁴ Nwiye aghəy ichuŋ abú ba jum mbənə u wuʼi Asɨyisəg Yeso Kristo nə iwuʼi zənə cha imi noʼo imey.