Efesus 5 - Aŋwaʼanayn Uso Fey

Mbən chomo ungɨŋ uzayn zayn

¹ Mbən mə buŋ Nwiye nu u wuʼi kwaʼa azəd, mbən kaba nji iməŋi aba ni uŋwən.

² Mbən wuʼ umbən unya aba anji zənə Kristo wuʼi ngwən anigə iku igun umba utəw. Uŋwən chomo nə aghəy ifá zənə amə inyoʼoro ifoy chuŋ. Uŋwən nibi chomo nə aghəy ituri Nwiye nu u naʼ abú Nwiye.

³ Ka wa moʼ akaʼa injən ghayn ma anó da iniŋe uyey kə unom wa chini, kə unyimi unó kə ikuw imbəw damugə cha ba Nwiye mə aghəy ma ikudi unó təŋ.

⁴ Cha adi boŋ ma kwi mbən ki nayn inayn ndoro, inayn nu cha iwe kə ni naʼa indon. Asɨmə yə boŋ kwi mbən ki naʼa amə yə beni ayə abú Nwiye akə unó mbənə u aghəy inen.

⁵ Mbən kyay kwi wa ŋunə umə jəgə isəg kə ighəy unyimi unó kə ighəy imbəw (amə wa ŋunə umə iwumini unwiye ibuw ibuw) cha uŋwən mə ma nə aghəy moʼ ijəg ungɨŋ anó ufon Kristo foro Nwiye.

⁶ Ka mbən beni ngwən kwi wa moʼ tama ngwən nə inayn ibuw, damugə amə da unó mbəŋ nu isə itəm Nwiye mi zaʼa igun ba mbənə umə ighəy izəw abú uŋwən.

⁷ Anigə ka mbən mə ngwən nə anó moʼ ighəy nə ikudi ba mbəŋ.

⁸ Akə maʼa moʼ mbən mə ungɨŋ imbiri, asɨmə akinine nu mbən si məŋi ba Asɨyisəg, mbən yə ungɨŋ uzayn zayn. Anigə mbən chomo ni ba mbənə umə ungɨŋ uzayn zayn,

⁹ damugə amə uzayn zayn mə aghəy kwi ba ni aghəy unó mbənə u boŋo nibi koʼoro nibə amə ba mbənə u kyay asiʼ.

¹⁰ Mbən kweme imə aghəy unó mbənə u boŋo abú Asɨyisəg.

¹¹ Ka mbən zi ngwən ubugə ungɨŋ unó ibuw ibuw mbənə ba mə aghəy ungɨŋ usin imbiri. Asɨmə mbən chi unó wu asaŋ asaŋ kwi ba zən.

¹² Amə indere atəw ighayn da unó moʼ mbənə ba mə aghəy anjim anjim.

¹³ Amaʼazənə uzayn zayn mə tey igun aghəy moʼ ba mbi zən aghəy wu anji zənə aməŋi,

¹⁴ damugə u ghəy jum mbənə uzayn zayn mə itey igun ba mbə zən. Amə aton zənə u ŋwaʼanayn kwi, “Ngwə bə mə bunə noʼo atəy Zəmə, Uzayn zayn Kristo yə tey igun inigə.”

¹⁵ Anigə mbən num amaʼ akə inji zənə mbən mə chomo. Ka mbən chomo ngwən ni uneŋ, mbən chomo ni ba mbənə umə nə iwe.

¹⁶ Apan moʼ bə duw inen ighəy unó mbənə ukoʼoro, mbən aghəy anji chuŋ damugə ba mbə aghəy unó iboŋ nanaʼ akə amaʼa zəŋ.

¹⁷ Ka mbən chomo ngwən ni uneŋ. Asɨmə mbən kaba ikyay anó zənə Asɨyisəg u kabay.

¹⁸ Ka mbən nugə ngwən unoʼ ibigə, damugə umbi aghəy mbən aghəy unó mbənə cha udi koʼoro. Mbən sayn amə kwi Azugə zayn zayn sugi ungɨŋ inen.

¹⁹ Mbən kyugay ikyi akaʼa injən akə sam, ikyugay ikyi ni yere Nwiye nibi kyugay imoʼ nu inoʼo abú Azugə Nwiye. Mbən kyugay ikyi iyere Asɨyisəg ungɨŋ itən fiŋ.

²⁰ Mbən ki naʼa yə beni ayə abú Nwiye nu amə Mbaʼ akə ukum Yeso Kristo. Mbən ki aghəy nigə akə umaʼ jum nibə da u aghəy jum.

Ikɨy abú mbə ayey nə mbə anóm

²¹ Mbən ni wumine ngwən umbən umbən da itey kwi mbən yə wumine Kristo.

²² Ayey mbən wumine anóm akə inji zənə mbən mə wumini Asɨyisəg,

²³ damugə anóm amə atəw igun uyey ma anji zənə Kristo amə atəw igun ifere ba Kristo. Ifere wu amə nyə̂ inyo ma nu yə chi angəʼ.

²⁴ Anji zənə ifere ba Kristo mə wumini Kristo amə nigə mbə ayey ni wumine mbə anóm akə unó jum.

²⁵ Anom mbən wuʼ umbən ayey anji zənə Kristo wuʼe ifere ba Kristo. Yə ku igun atəw ma,

²⁶ da ifere wu chomo akə uzayn zayn. Akə inji zənə yə səw akə uney nibi səw akə inayn Nwiye.

²⁷ Yə aghəy nigə da inum ifere wu ichomo anji chuŋ ifigi ma nu imə meŋene, cha indoro moʼ igun, kə anó moʼ nu aghəy kwi ka izayn uma, asɨmə imə nə uzayn zayn nu cha anó amə aghəy u ghayn da iŋwən.

²⁸ Amə ichin ichin anóm mi iwuʼ iyey uma anji zənə u wuʼ nyə̂ inyo uma. Anom ŋunə u wuʼ uyey ma yə nibi iwuʼ nyə̂ inyo ma.

²⁹ Cha wa moʼ awu umə bana nyə̂ inyo ma. U yə naʼa aghəy jəgi abú nyə̂ inyo wu nibə iney anji chuŋ, anji zənə Kristo mə aghəy abú ba uma.

³⁰ Mba mə usin inyo akə nyə̂ inyo ma.

³¹ Ayə ungɨŋ Aŋwaʼanayn Nwiye kwi, “Amə aton zənə anóm sayn mbaʼ nə ingo ma ŋu foro nə ayey úŋwən uma ubigə mbi si məŋi amə nyə̂ inyo feyn.”

³² Zəŋ amə anó kyayn nu yə paʼa nu mə kyay kwi ayə nə anó moʼ ighəy da Kristo foro da ifere ba Kristo.

³³ Anigə anóm feyn feyn akaʼa injən uwuʼ uyey ma anji zənə u wuʼ inyo ma. Anigə ayey wumine unom ma.