Efesus 4 - Aŋwaʼanayn Uso Fey

Ba Kristo mə nyə̂ inyo feyn

¹ Umugə amə wa ndəŋ damugə amə faʼa abú Asɨyisəg, ayə boʼo ubugə inen kwi mbən chomo akə nji zənə ikoʼoro nu amə nji zənə Nwiye tiya ngwən kwi mbən chomo.

² Mbən num inyo asey, iboro inyo, mbən yimə fiŋ, itey ijən iwuʼi abú wa feyn feyn akə anji zənə cha mbən mi mə yimə ba fiŋ.

³ Mbən aghəy unó jum da isey ibumi zənə Azugə Nwiye naʼa anjim aborobod zənə abúmi ngwən.

⁴ Nyə̂ inyo yi feyn, Azugə nibə feyn, anó zənə Nwiye tiya ngwən kwi mbən niŋi ikono igun yə niba feyn.

⁵ Asɨyisəg uba feyn, ibeni aba feyn, anó ni num une aba feyn.

⁶ Nwiye uba feyn nu amə Mbaʼ igun ba ma jum. Uŋwən yə tumə ba jum. Uŋwən yə faʼa umbi faʼa anjim ba ma jum. Uŋwən yə ungɨŋ ba ma jum akə Azugə.

⁷ Kristo si aghəy ichuŋ akaʼa ina, inaʼ uneʼe abú wa feyn feyn kwi u faʼa awu aba anji zənə u kaba.

⁸ Ayə ungɨŋ Aŋwaʼanayn Nwiye kwi, “Amaʼazənə yə ŋu azobo, Yə num ba mbənə yə ibiya Ŋu nə uŋwən, Yə́ nibi naʼa ineʼe abú ba.”

⁹ Iŋwaʼanayn kwi, “Yə ŋu azobo” Amə ghayn kwi ingiya? Anigə yə ghayn kwi yə nibi swiʼi iŋu ungɨŋ usin mbənə umə aton.

¹⁰ Uŋwən ŋunə yə́ swiʼi izaʼa, amə nibi uŋwən ŋunə yə koʼ iŋu chigə azobo jum. Yə ŋu da ighəy kwi u ghəy jum kyay kwi iyə awu usin jum.

¹¹ Amə uŋwən yə́ naʼa ineʼe abú ba, yə́ aghəy umbi moʼ akə ba tom, ighəy umbi moʼ akə ba ukən, ighəy umbi moʼ akə ba mbənə umə saŋa ukən chuŋ, ighəy umbi moʼ akə ba mbənə umə ghayn inayn Nwiye, nibi aghəy moʼ uni taʼa unó abú ba.

¹² Yə aghəy ney da itana ba Nwiye kwi u faʼa abú uŋwən da nyə̂ inyo Kristo ikwey.

¹³ Anigə umba jum yi bumə si məŋi amə wa feyn akə ibeni, nibi itana ikyay Ŋwə̂ Nwiye, nibi ikwey koʼ chomo ni Kristo.

¹⁴ Anigə cha mba mi gha chomo ni buŋ kuŋe nu umə ibeni unó jum mbənə mbə figə unó umə ghayn abú úŋwən. Mbə figə unó tə́ unó tama ba da umi faba.

¹⁵ Asɨmə amaʼazənə mba mə ghayn asiʼ nə iwuʼi, mba yi kwey akə inji jum si chomo nə Kristo ŋunə amə atəw.

¹⁶ Amə aton ma nu usin nyə̂ inyo jum bumə akə nyə̂ inyo feyn iforo ni aghəy kwi nyə̂ inyo bumə. Asin inyo feyn feyn bə sə faʼa anji chuŋ iwuʼi yi aghəy kwi nyə̂ inyo jum sə ikwey iŋu imbey.

Ba bə mə akə anó feyn nə Kristo mba yi mə nə itəni fey

¹⁷ Ayə chere ngwən akə ukum Asɨyisəg ighayn kwi ka mbən chomo ngwən numugə ba mbənə akə ma ba Jû umə chomo. Ikono uma amə atəw ukow.

¹⁸ Uŋwən mbə bugə ungɨŋ imbiri. Cha aghəy moʼ abú úŋwən ungɨŋ itəni ŋunə Nwiye naʼa damugə mbə kən fiŋ uma ighəy ika.

¹⁹ Cha umə uma nə indere atəw. Mbə si naʼ inyo uma abú unó iboŋ nibə kaba imə aghəy ukudu ufibiri unó jum.

²⁰ Akə ma anó zənə mbən kweme da Kristo zigə.

²¹ Mə kyay kwi mbən si zəw anó da uŋwən, mə nibi kyay kwi mbə si tey unó da uŋwən inen nu amə unó asiʼ da Yeso.

²² Mbə́ tey inen kwi mbən waʼ itən anun nyə̂ inyo nu amə unun unó mbənə mbən mə aghəy. Unun unó wu mbə aghəy mbən fana unó, umbə tama ngwən nibə chiŋe ngwən.

²³ Mbən sayn kwi itən fiŋ nə itən kono beŋe akə ifey,

²⁴ nibi aghəy kwi mbən zi nyə̂ inyo fey, nu utana kwi iyi chomo nə Nwiye, anji zənə ngwə mə ighəy unó asiʼ mbənə ukoʼoro nibə zayn.

²⁵ Anigə ka mbən mə figə ngwən unó. Wa feyn feyn injən akaʼa ni ghayn aba asiʼ abú unya ma damugə umba jum mə asin nyə̂ inyo akə nyə̂ inyo Kristo.

²⁶ Wa moʼ bə mə isə itəm, ka u ibeni ma kwi isə itəm wu aghəy kwi u aghəy anó iboŋ. Ka u beni ma kwi nyama chugi ghaba nu u mə bugə isə itəm.

²⁷ Mbən inaʼa ngwən apan abú debere.

²⁸ Wa ŋunə umə ijiyə u waʼ uji ti ni faʼa akə ubugə ma, ni chomo akə inji zənə ikoʼoro da iwere ba ukwaŋ.

²⁹ Ka inayn iboŋ mə duw ma ungɨŋ itən ichəw. Mbən ni ghayn aba unó mbənə uboŋo. Unó nu umi were wa chini umə nə aghəy zənə umə kaba da anó zənə mbən mə ghayn yi mə zaʼa nə unó chuŋ abú ba mbənə u zəw.

³⁰ Ka mbən ghəy ngwən kwi Azugə Nwiye zayn zayn a kənə. Azugə zayn zayn wu amə anwini nu atey kwi mbən mə ba Nwiye iŋu pey anəy zənə Nwiye mi ziya umba utəw.

³¹ Mbən waʼ inayn jum tənə imə toboro fiŋ ba, i waʼ anó ni mə chiŋe ba, waʼ anó imə isə itəm, waʼ anó imə taŋara, waʼ anó imə jimə ba nibi waʼ anó imə aghəy ukudu ibɨy unó jum.

³² Asɨmə mbən aghəy ichuŋ abú umbən unya. Mbən ni iboro fiŋ, nibi waʼ unó iboŋ umbən unya anji zənə Nwiye chigə anjim Yeso Kristo i waʼ umbən unó iboŋ.