Efesus 3 - Aŋwaʼanayn Uso Fey

Unó mbənə Pol aghəy abú ba mbənə akə ma ba Jû

¹ Amə da anó zənə Nwiye fere ba akə wa feyn nu numugə Pol amə wa ndəŋ da umbən mbənə akə ma ba Jû. Amə wa ndəŋ damugə amə ghayn ukən chuŋ da Yeso Kristo.

² Mə kyay kwi mbən si zəw da afaʼa zənə Nwiye choʼo aŋu ina iniŋ. Yə choʼo aŋu kwi a ghayn da ichuŋ zənə u ghəy inen.

³ Nwiye aghəy a kyay unó mbənə yə́ paʼa anji zənə a ŋwaʼanayn kere kere inen.

⁴ Mbən bə foŋ anó zənə a ŋwaʼanayn, umbən utəw umbi zayn da anó zənə a kyay da anó zənə a noy da Kristo.

⁵ Cha Nwiye di aghəy ma kwi igwaʼ zənə yə́ si chigə i kyay anó zəŋ, anji zənə yə si chigə anjim azugə itey abú umbi ba utom azugə, Azugə zayn zayn nibi tey abú ba ukən ma.

⁶ Anó zənə yə́ paʼa amə kwi, anjim ukən chuŋ ba mbənə akə ma ba Jû si bumə nə ba jû si mə nə uneʼe nu Nwiye naʼa abú úŋwən. Mbə si məŋi amə nyə̂ inyo feyn. Anigə úŋwən uma jum umbi mə nə ughəy mbənə Nwiye chigə anjim Yeso Kristo ikaʼ.

⁷ Amə wa faʼa imə ghayn ukən chuŋ wu anjim ichuŋ Nwiye ŋunə yə chigə anjim ikay ma ineʼe aŋu awu.

⁸ Ka nə di ma kwi mə kwe chigə wa kukuŋe akaʼa ba Nwiye ujum, asɨmə yə aghəy ichuŋ iniŋ kwi a ghayn abú ba mbənə akə ma ba Jû da imbon nu cha imi noʼo imey nu imə ina numugə ba kyay Kristo.

⁹ Yə́ nibi choʼo aŋu kwi a aghəy ba jum u kyay anó zənə yə́ paʼa. Nu Nwiye ŋunə u tana u aghəy jum noy ungɨŋ fiŋ iti Amaʼazənə yə́ tana isəg.

¹⁰ Yə ghəy ney da akinine, anjim ifere Kristo, uzugə kaka nu umə azobo foro ifon uma umbi zən iwe Nwiye akə inji nanaʼ.

¹¹ Zəŋ amə anó nu Nwiye si tana isey ki yə si tana isəg. Yə si chigə anjim Yeso Kristo ungwa Asɨyisəg ighəy unó wu.

¹² Akə ibumi nə Kristo foro anjim ibeni zənə mba niŋi igun ma mba yə nə ikay iŋu abú Nwiye nu cha mba mə goro.

¹³ Anigə ayə boʼo ubugə inen kwi ka itən fiŋ ibó ma damugə amə zəw ingəʼ da ngwən. Unó mbəŋ jum amə da iwere ngwən.

Yeso Kristo iwuʼe ngwa

¹⁴ Da unó mbənə Nwiye si kaʼ, mə zum utəw anywi ifigi mbaʼ,

¹⁵ ŋunə inebey jum itənə imə azobo foro itənə imə akə igun isəg num ikum abú uŋwən.

¹⁶ Ayə chaʼara Nwiye kwi numugə amə nə imbon nu cha imi noʼo mey, u ghəy kwi Azugə ma naʼa ikay boʼo mbən mi ka anjim ikay zənə azugə mə naʼa.

¹⁷ Ayə nibə chaʼara Nwiye kwi mbən aghəy kwi Kristo chomo ungɨŋ itən fiŋ, foro kwi mbən wuʼ Nwiye nibi iwuʼ umbən unya. Mbən bə aghəy nigə, mbən yi mə ni ba mbənə ighaŋ ma si nyi asəy anji chuŋ, foro ní na zənə u chimi igun atiy aghəy kaka.

¹⁸ Ayə chaʼara Nwiye kwi umbən nə ba Nwiye jum mə ni ikay ikyay kwi Kristo iwuʼ ngwən azəd.

¹⁹ Ayə chaʼara Nwiye kwi mbən kyay kwi umugə Kristo wuʼe ngwən chigə anji zənə ba kyay, anigə mbən kyay inji iməŋi anji zənə Nwiye məŋi.

²⁰ Amə Nwiye naʼa ikay zənə imə faʼa ungɨŋ ina. Yə kyay umugə ighəy anó chigə umugə mba mə ibiri kə chigə umugə mba mə ikono.

²¹ Ba jum mbənə umə ungɨŋ ufere ba Kristo foro ba mbənə umə akə anó feyn nə Kristo u wumini Nwiye koŋ. Amə nigə.