Efesus 2 - Aŋwaʼanayn Uso Fey

Inoʼ akə iwu inyi ungɨŋ itəni

¹ Imbey mbən si ku da injən ika atəw foro da umbən unó iboŋ.

² Mbən mə́ aghəy unó iboŋ wu numugə mbən beni aboʼo unó ungɨŋ isəg inbi beni aboʼo wa ŋunə umə tumə uzugə mbənə umə ungɨŋ ufə nu amə uzugə mbənə u mə faʼa akinine ungɨŋ ba mbənə umə aghəy izəw abú Nwiye.

³ Umba jum mba mə́ aghəy aba ni úŋwən umugə mba beni u aghəy mbənə ita nyə̂ inyo mə kaba. Mba nibi beni aboʼo u aghəy mbənə ita nyə̂ inyo foro ita ikono mə kaba. Nwiye si isə itəm nə umba numugə yə́ sí isə abú ba jum.

⁴ Asɨmə Nwiye ŋunə uwuʼe ngwa azəd yə́ kənə akə ngwa azəd.

⁵ Ka ba kwi umba unó iboŋ si zwere ngwa yə aghəy kwi mba chomo ikay umugə mba mə akə anó feyn nə Kristo. Amə anjim ichuŋ Nwiye nu ba si du angəʼ.

⁶ Nwiye zəmə ngwa nə Kristo da mba chomo nə uŋwən ungɨŋ usin mbənə umə azobo numugə mba mə akə anó feyn nə Yeso Kristo.

⁷ Yə ghəy ney da itey akə umaʼ mbənə umə zaʼa kwi, iyə nə fiŋ chuŋ nu iboŋo ichigə. Yə ghəy ichuŋ ina anjim Yeso Kristo.

⁸ Numugə mba beni Nwiye, yə aghəy ichuŋ ina ichi ngwa angəʼ akə ma da mugə mba aghəy anó moʼ, amə uneʼe nu unoʼo abú Nwiye.

⁹ Cha Nwiye di chi ma ngwən angəʼ damugə mbən aghəy anó moʼ, anigə ka wa moʼ komo ma iguwə.

¹⁰ Nwiye aghəy kwi mba mə ba mbənə mba mə́ úŋwən akinine da mba chomo akə anó feyn nə Yeso Kristo sə aghəy unó chuŋ mbənə Nwiye si dey tana imbey kwi mba ni aghəy.

Yeso Kristo si aghəy ba jum məŋi wa feyn

¹¹ Mbən kono kwi amə akə ama moʼ “ba mbənə unəy ikad uma” Mbə́ mə́ itiya ba mbənə akə ma ba Jû kwi, “Ba nu cha unəy ikad uma.” Umbə ghayn amə anó nu umə aghəy inyo wa amə akə ubugə.

¹² Akə maʼa wu, amə́ cha ngwən akə anó feyn nə Kristo amə cha ngwən akə unebey Izre ŋunə Nwiye choʼo, cha mbən kyay ngwən anó zənə Nwiye isɨŋ usó ika abú úŋwən. Cha mbən zi ngwən ikono igun u aghəy mbənə mbə́ mə́ nəmə. Cha mbən dí nibi kyay ngwən Nwiye.

¹³ Asɨmə akinine, mbən si məŋi akə anó feyn nə Yeso Kristo. Anjim anəm zənə yə́ tuwə, Nwiye si num umbən mbənə mbən mə agha sa itini zaʼa iyad Nwiye.

¹⁴ Kristo ma amboŋ aghəy aborobod nyi akaʼa ba Jû foro akaʼa ba mbənə akə ma ba Jû anji zənə yə́ bumi ngwa akə wa feyn. Anigə yə́ saʼ ukam ŋunə yə́ ghaba ba Jû nə ba mbənə akə ma ba Jû uni bana inyo uma.

¹⁵ Amaʼazənə yə kuw amə́ akə nyə̂ inyo ma nu yə ney unoʼo Mose nibi iney unó mbənə unoʼo wu kaba kwi ba ni aghəy. Yə aghəy ney da inum inebey təŋ ibigə itana unebey fey ufeyn. Anigə ighəy aborobod zaʼa.

¹⁶ Yeso Kristo ku azad abaʼaray ifere inebey təŋ ibigə akə nyə̂ inyo feyn igha ibumi úŋwən. Zəŋ aghəy abana uma mey anigə ugha wene ŋu abú Nwiye.

¹⁷ Anigə Kristo zaʼa pey yi ghayn ukən chuŋ da aborobod abú ba jum. Yə ghayn abú ba mbənə akə ma ba Jû nu umə agha sa abú Nwiye foro ba Jû mbənə umə iyad Nwiye.

¹⁸ Amə Kristo aghəy kwi umba jum, ba Jû nə ba mbənə akə ma ba Jû uchigə anjim Azugə zayn zayn iŋu abú Mbaʼ.

¹⁹ Anigə akinine, cha mbən gha bere ngwən ba isoʼ kə ba abey chini, mbən si məŋi ba abey feyn nə ba Nwiye mbənə umə nibi ba ungɨŋ unebey Nwiye.

²⁰ Nwiye nibi chim ngwən igun atiy aghəy ba tom Kristo, nə ba ukən Nwiye zi. Amə Yeso Kristo ma amboŋ mə itey ijugi na.

²¹ Akə anó feyn nə uŋwən, ina wu jum si məŋi akə na feyn. Amə uŋwən aghəy kwi ikwey iməŋi imbəŋ wumini Asɨyisəg.

²² Mbən si bumə akə wa feyn nə uŋwən. Anigə yə sí bumi ngwən nə ba umbi jum kwi amə asin nu Nwiye mə awu anjim Azugə ma.