Efesus 1 - Aŋwaʼanayn Uso Fey

Achaʼara

¹ Amə umugə Pol nu amə wa tom Yeso Kristo anjim umugə Nwiye kaba kwi a ŋwaʼanayn aŋwaʼanayn zəŋ. Ayə ŋwaʼanayn inen umbən ba Nwiye mbənə umə Efesus nu umə akə ibumi nə Yeso Kristo.

² Nwiye Mbaʼ nə Asɨyisəg Yeso Kristo ghəy ichuŋ inen inaʼ aborobod inen.

Ineʼe tənə azugə naʼ numugə ba mə akə ibumi nə Kristo

³ Mba yere Nwiye ŋunə amə Mbaʼ abú Asɨyisəg Yeso Kristo. Yə zi aborobod igun ina umugənə mba mə akə anó feyn ni Kristo. Aborobod zənə Nwiye zi igun ina anjim Azugə zayn zayn amə azənə amə ungɨŋ usin jum mbənə umə azobo.

⁴ Ki Nwiye sə ŋu tana isəg yə si choʼo ngwa umugə mba mə akə anó feyn ni Kristo kwi mba mə ba uzayn zayn ifigi ma, nu amə ba nu cha ngwa ni unó iboŋ. Yə choʼo nigə damugə yə wuʼ ngwa.

⁵ Nwiye si nibi isiy kwi u yi num ngwa akə umbi buŋ anjim Yeso Kristo. Yə isey nigə anji zənə yə wuʼ a nibi boŋ abú uŋwən.

⁶ Mba yere uŋwən da ichuŋ ma zənə u naʼa ina ibuw anji zənə mba mə akə anó feyn ni Ŋwə̂ ma ŋunə uwuʼi azəd

⁷ Nwiye si ziya umba utəw anjim anəm Kristo, yə nibi waʼ umba unó iboŋ jum anjim ichuŋ ma zənə ikwey azəd.

⁸ Yə ghəy ichuŋ awu ina nu cha amə ghəy uməg awu. Yə nibi ghəy kwi mba mə ni iwe jum nibi kyay unó jum.

⁹ Nwiye mə nə iwe jum ikyay unó jum ighəy kwi mba kyay unó mbənə mbə noy. Yə ghəy nigə anji zənə yə kaba foro da mugə yə si tana inum akə ibumi nə Kristo.

¹⁰ Yə num nigə da amaʼa yi koʼ uyi num u ghəy ujum mbənə umə azobo foro u mbənə umə akə igun isəg iforo nə Kristo nu amə atəw igun ughəy jum.

¹¹ Nwiye ghəy unó jum anji zənə yə si tana nibi num. Yə choʼo ngwa akə bumi ni Kristo kwi mba mə umbi ba aba anji zənə yə kaba nibi inum.

¹² Yə ghəy nigə da umba mbənə mba mə ba imbey i zi fiŋ igun Kristo mba yere Nwiye.

¹³ Nwiye nibi ghəy kwi mbən mə ba uma amaʼazənə mbən zəw inayn zənə amə ayi asiʼ nu amə ukən chuŋ damugə Nwiye mi chi ngwən angəʼ. Mbən zəw beni, anigə Nwiye zi anwini igun inen nu amə Azugə zayn zayn yə kaʼa ina

¹⁴ Azugə zayn zayn wu amə anwini i tey kwi mba yi mə nə u ghəy mbənə Nwiye kaʼa abú ba ma. Amaʼ yi koʼ Nwiye yi ziya utəw uma. Mba yere Nwiye.

Pol chaʼara Nwiye

¹⁵ Iti amaʼazənə mə zəw da ibeni zənə imə inen igun Asɨyisəg Yeso nibi zəw umugə mbən wuʼi ba Nwiye ujum,

¹⁶ cha adi si sayn imə naʼa yə beni ayə abú Nwiye da ngwən. Ayə kono ngwən amaʼazənə amə chaʼara Nwiye ighari jum.

¹⁷ Ayə chaʼara Nwiye ŋunə amə Mbaʼ Asɨyisəg Yeso Kristo nu amə Mbaʼ nə iwumini ujum abú uŋwən kwi unaʼa Azugə inen da mbən mə nə iwe. Ayə nibə chaʼara kwi u tey asiʼ inen da mbən mi tana ikyay uŋwən anji chuŋ.

¹⁸ A yə chaʼara Nwiye kwi u fiʼi i tən fiŋ mbən zən uzayn zayn da mbən kyayn unó mbənə mbən niŋi ikono igun nu amə unó mbənə Nwiye tiya ngwən da úŋwən. Unó wu amə ichuŋ zənə Nwiye kaʼa abú ba uma.

¹⁹ Ayə chaʼara Nwiye kwi u ghəy mbə kyay ikay ma zənə cha nji amə ghəy wa məg nu idaba chigə. Ikay ma zənə imə faʼa ungɨŋ ina umba mbənə mba zi fiŋ igun ma. Ikay ma wu amə ikay kyayn

²⁰ nu yə faʼ awu amaʼazənə yə́ zəmə Kristo ighəy u ŋu chomo aba bugə jəgi ma ungɨŋ usin mbənə umə azobo.

²¹ Uŋwən uyə tumə uzugə ujum mbənə umə aton azobo ka di ma kwi umbə nə ikay. Ukum ma chigə ikum ijum tənə umə tiya akaʼa ba akinine foro itənə umi tiya akə amaʼazənə ami zaʼa.

²² Nwiye si zi u ghəy ujum aton ughəw ma. Nwiye nibi ghəy kwi uŋwən amə atəw igun u ghəy jum da iwere ifere ba Kristo.

²³ Ifere wu amə nyə̂ inyo Kristo. Itə ghəy kwi Kristo məŋi wa ŋunə amə uŋwən. Anigə amə Kristo mə ghəy kwi u ghəy ujum məŋi anji zənə mbə mi məŋi.