3 Jon 1 - Aŋwaʼanayn Uso Fey

¹ Amə umugə Jon nu amə wa amə cha ufere ba Kristo ŋwaʼanayn aŋwaʼanayn zəŋ. Ayə ŋwaʼanayn inigə ungwə Gayus nu a wuʼi kwaʼa azəd. Mə kaŋa wuʼ ayə akə asiʼ.

² Inyi azi nu a wuʼi kwaʼa azəd, ayə chaʼara Nwiye kwi unó ujum yeŋ inigə kwaʼa anji chuŋ. Ayə nibə chaʼara foro kwi, inji inyo mə ikay anji zənə injə fiŋ mə ikay.

³ Mə́ kaŋa wuʼ aŋu amaʼazənə unya moʼ zaʼa pey yi ghayn iniŋ umugə ngwə mə yeŋ akə asiʼ. Mbə kyay kwi ngwə yə yeŋ akə asiʼ wu ighari ujum.

⁴ Cha iwuʼi chini ungɨŋ inyi fiŋ chigə akə umugə azəw kwi umbəŋ buŋ mbə yeŋ akə asiʼ.

⁵ Inyi azi nu a wuʼi azəd, ngwə yə kaŋa faʼa akə fiŋ ujum Amaʼazənə ngwə mə ghey unó abú ba Kristo, kaba abú mbənə amə ba isoʼ.

⁶ Mbə́ si ghayn abú ufere ŋunə umə akəŋ da inji zənə ngwə wuʼe ba. Ngwə si kaŋa aghəy ichuŋ inaʼ u aghəy mbənə umə kaba Amaʼazənə umə yeŋ ŋuw. Zigə ayi kaŋa boŋ abú Nwiye.

⁷ Ayə boŋ damugə mbə du iŋu faʼ abú Kristo nu cha umə beni inum aghəy moʼ abú ba mbənə cha u di si beni Kristo.

⁸ Anigə mba kəŋə ukudu ba itəŋ da mba faʼa unoŋ nə úŋwən anji zənə mba mə ghayn asiʼ da Kristo.

Unó da Diyotrefes nə umbi Demetriyus

⁹ Mə si ŋwaʼanayn unó moʼ abú ufere ba Kristo, asɨmə Diyotrefes nu u wuʼ anó ni chigə imbey akə unó ujum di beni ma kwi ayə nə ikay ighayn unó wu.

¹⁰ Amaʼazənə ami zaʼa, ayi aghəy mbən kyay unó ujum mbənə u si aghəy, foro unó iboŋ mbənə u si ghayn da ngwa. Ni kwi cha zigə di si koʼ abú uŋwən, cha yə di num ma umba unya akuw ma Amaʼazənə mbə zaʼa. Yə mə təmə nə unya mbənə mbə́ mə́ kaba inum úŋwən akuw uma. Ubə num úŋwən, u yə chiyə úŋwən ungɨŋ ufere ba Kristo.

¹¹ Umbuŋ uzi nu a wuʼi azəd, mbən inum ngwən unó iboŋ, mbən num amə unó chuŋ. Wa ŋunə u aghəy ichuŋ mə wa Nwiye, cha wa ŋunə u aghəy anó iboŋ di kyay ma Nwiye.

¹² Ba ujum mbə ghayn unó chuŋ da Demetriyus. U yə aghəy unó aba anji zənə Aŋwaʼanayn Nwiye kaba. Mba yi nibi beni kwi u yə chomo anji zənə asiʼ tey. Anigə mbən kyay kwi anó zənə mba mə ghayn amə anó asiʼ.

Achaʼara nwi

¹³ Ayə nə unó nanaʼ ighayn inen asɨmə cha amə kaba iŋwaʼanayn ungɨŋ aŋwaʼanayn.

¹⁴ Mə kono kwi ayi yabi zaʼa izən ngwən. Amaʼazənə a zaʼa, mba yi nayn amə inayn.

¹⁵ Nwiye naʼa aborobod inigə. Umbə uzi mbənə umə akəŋ achaʼara inigə, nibi chaʼara umbə uzi ujum mbənə umə akaʼa.