2 Timoti 4 - Aŋwaʼanayn Uso Fey

¹ Ugwə Timoti, ayə ghayn inigə ifigi Nwiye, foro ifigi Yeso Kristo ŋunə umi saʼa ba mbənə umə ikay foro umbənə u si ku, nibi ghayn da mugə umi gha wene zaʼa tumə isəg kwi:

² Ghayn inayn Nwiye. Ki ba wuʼ ni zəw ki cha udi iwuʼ ni zəw, ghayn aba ghayn. Ba mbənə umə ighəy unó iboŋ ngwə ghayn abú úŋwən. Kyayn abú umbənə umə ighəy unó iboŋ. Ba mbənə umə aghəy unó mbənə u koʼoro ngwə zi ikay abú uŋwən. Ngwə mə nə iyimi fiŋ Amaʼazənə ngwə mə aghəy unó mbəŋ.

³ Amaʼ yi zaʼa nu cha ba mi wuʼ ni zəw inayn asiʼ. U mbi bumi mbə taʼa unó uma nu umə ghayn unó mbənə utoŋ uma wuʼi izəw.

⁴ U mbi kəbərə utoŋ uma imə zəw asiʼ. Anigə u mbi beŋe sə zwaray amə iboʼ ikoʼ.

⁵ Amə da ayə, u ngwə Timoti, yimə injə inyo akə unó jum. Yimə fiŋ umugə ngwə mə zəw ingəʼ. Ngwə yi faʼ da izən kwi ba zaʼa abú Kristo. Ghəy unó jum mbənə Nwiye zi ungɨŋ umbə ubugə.

⁶ Amə da aŋu, amaʼ si koʼ nu umi naʼ aŋu akə aghəy ifaʼ. Amaʼ si koʼ iniŋ isayn isəg.

⁷ Mə si kaŋa zoŋ anji chuŋ anji zənə a faʼa abú Kristo. Mə si nod ŋu pey akə inwi. Mə si niŋi inyi fiŋ igun Kristo ŋu pey akə inwi.

⁸ Anigə Asɨyisəg Kristo ŋunə umə saʼa ba anji zənə ikoʼoro uyi naʼa uywiri mbaŋa iniŋ aney zənə umi zaʼa isaʼ isəg. U yi naʼ damugə ayə aghəy unó nu ukoʼoro. Cha umi naʼ aba iniŋ. U yi nibi naʼ abú ba mbənə umə nəmə nə iwuʼi kwi u wene zaʼa.

Unó mbənə Pol kaba kwi Timoti aghəy abú uŋwən

⁹ Zi ikay yabi zaʼa iniŋ,

¹⁰ damugə Demas si waʼa aŋu iŋuw ma Tesalonika. Yə ŋu awu damugə yə iwuʼ unó ungɨŋ isəg zəŋ. Kresen si ŋu Galesiya. Tayitus si nibi ŋuw Damatiya.

¹¹ Aba Luk mə akəŋ aboʼo inyi. Amaʼazənə ngwə mə zaʼa, num Mak zaʼa nu uŋwən, damugə u yi were aŋu akə inyi afaʼa.

¹² Mə si tom Takikus a Efesus.

¹³ Amaʼazənə ngwə sə zaʼa, nibi num inyi ndwi maʼa zənə mə sey a Troyas abú Kapus zaʼa nə iŋwən. Mbən nibi num uŋwaʼanayn foyi izaʼa nə úŋwən. Amara mə umbənə u tana akə gôb.

¹⁴ Alezanda ŋunə amə wa umə twiyə utənə, zi ingəʼ nanaʼ igun iniŋ. Asɨyisəg yi choʼo afaʼa abú uŋwən da unó mbənə umə aghəy.

¹⁵ Ngwə wey ayə nə uŋwən damugə yə si ton unó mbənə mba mə ghayn. Yə ton kwaʼa akə ikay.

¹⁶ Akə amaʼ imbey zənə mə́ təm kwi u saʼ aŋu, cha wa moʼ zaʼa ma ikeŋe aŋu, Ba jum waʼ aŋu. Ka Nwiye ŋwaʼanayn ma anó zənə mbə́ aghəy akə ikum uma.

¹⁷ Mbə́ aghəy nigə, asɨmə Asɨyisəg təm inyi iyad inaʼ ikay iniŋ kwi a ghayn inayn Nwiye jum, da ba jum mbənə akə ma ba Jû u zəw. Amaʼazənə mə ghayn nigə, Asɨyisəg chi aŋu uchəw iwu, akə inji zənə mbə́ mə́ kaba kwi u zwere aŋu.

¹⁸ Asɨyisəg yi chi aŋu ungɨŋ ukudu ingəʼ jum, anigə inum aŋu akə aborobod ŋu zi ingɨŋ anó fon ma zənə amə azobo. Iwumini yə abú uŋwən koŋ koŋ! Amə nigə.

Achaʼara nu asi nwi

¹⁹ Chaʼara Priska foro Akwila, nibi chaʼara ba mbənə umə ungɨŋ unebey Onesiforus.

²⁰ Erastus tənə Koren. Mə nibi sayn Trofimus a Miletus, damugə yə́ mə sɨgə.

²¹ Ghəy ikay iyabi zaʼa kə amaʼazənə ufiy mə ghəy azəd sə ŋu koʼ. Eubulus nibi chaʼara ayə. Pudens foro Lyinus foro Klayudiya foro ba Kristo jum chaʼara ayə.

²² Asɨyisəg chomo nə injə azugə. Nwiye ghəy ichuŋ inen umbən jum.