2 Timoti 3 - Aŋwaʼanayn Uso Fey

Ba mbi ton Nwiye ungɨŋ uney mbənə u si nwi

¹ Kyay kwi ungɨŋ uney mbənə usi nwi, ingəʼ iboŋ yi zaʼa.

² Ba mbi sə wuʼe aba inyo, sə iwuʼe aba ukab, sə beʼere inyo, sə jimə ba nibi aghəy izəw abú umbaʼ foro ingo uma, cha ba mi mə naʼa yə beni ayə akə unó mbənə umə ighəy abú úŋwən. Cha ba mi mə beni anó Nwiye.

³ Cha umi mə iney ba kwi amə ba. Cha umi mə idiri ba. Umbi sə cheŋe ikum ba chini. Cha umi mə yimə inyo. Umbi sə zoŋo. Mbi sə bana unó chuŋ.

⁴ U mbi sə fənə ba, sə aghəy unó mbənə ukono, nibi sə beʼere inyo. Umbi sə iwuʼ unó mbənə nyə̂ inyo ma mə fana chigə umugə u wuʼe Nwiye.

⁵ Umbi sə ighəy chomo nə ba nu u kyay Nwiye, asɨmə umbi ton ikay Nwiye zənə imə ighəy kwi mba mə ba Nwiye asiʼ. Imə ayə nə anó moʼ ni ghayn da ikudi ba mbəŋ.

⁶ Mbi moʼ akaʼa úŋwən umbə nyi ungɨŋ na ba. U bə nyi nigə u tumə ayey mbənə fiŋ ma mə boro, nu unó si fid úŋwən foro abú u mbənə u si naʼa fiŋ uma abú ikudi unó iboŋ jum mbenə nyə̂ inyo uma mə fənə.

⁷ U mbə zwaray unó abú ba jum, asɨmə cha umi noʼo kyay asiʼ da Nwiye.

⁸ Anji zənə Janes foro Jambres mbə ton anó zənə Mose mə ghayn, anigə ba mbəŋ nibi ton asiʼ. Cha iwe uma di mə nə faʼa ma anji chuŋ. Cha ibeni ma di mə ma ibeni asiʼ.

⁹ Asɨmə cha umi ŋu ma agha sa, damugə ba jum umbi zən uneŋ unó uma, numugə mbə zən umbi Janes foro Jambres.

Ikɨy nu Pol si nwi naʼ abú Timoti

¹⁰ Amə da ayə, u ngwə Timoti, ngwə si kyay unó mbənə mə tey. Ngwə si kyay umugə mə mə́ aghəy unó. Ngwə si kyay unó mbənə mə́ mə kaba ighəy. Ngwə si kyay inji zənə mə́ zi fiŋ igun Nwiye. Ngwə si kyay inji zənə mə́ mə yimə fiŋ. Ngwə si kyay inji zənə mə́ mə iwuʼe ba. Ngwə si kyay unugə mə yimə aton ingəʼ.

¹¹ Ngwə si kyay inji zənə mbə mə nwini itəŋ inya ughəw. Ngwə si kyay unó mbənə mbə́ aghəy iniŋ á Antiyok, a Ikonium foro Listra, anji zənə mə yimə fiŋ umugə mbə mə nwini itəŋ inya ughəw akə ikay. Amə Asɨyisəg yə chi aŋu ungɨŋ ingəʼ təŋ jum.

¹² Asiʼ amə kwi umbi kaŋa nwini inya ughəw ba jum mbənə u bəni Yeso Kristo, damugə mbə chomo akə inji zənə Nwiye kaba.

¹³ Asɨmə ba mbənə umə aghəy unó iboŋ nə umbənə umə num ikum ba chini itama ba awu, umbi mə aghəy unó iboŋ iŋuw aba imbey. Umbi mə tama ba, ba chini nibi tama úŋwən.

¹⁴ Asɨmə amə da ayə, u ngwə Timoti, ŋuw imbey ni aghəy unó asiʼ mbənə ngwə si kweme nibi beni akə fiŋ jum, damugə ngwə kyay ba mbənə ngwə kweme unó mbəŋ abú úŋwən.

¹⁵ Ngwə sí kyay inayn Nwiye təŋ inoʼ Amaʼazənə ngwə mə ŋwə̂ kuŋe. Inayn wu si aghəy ngwə mə nə iwe da mba mə nə iwe idu angəʼ anji zənə mba niŋe fiŋ igun Yeso Kristo.

¹⁶ Amə Nwiye yə sey ba kwi u ŋwaʼanayn Inayn Nwiye jum. Inayn Nwiye boŋ kwi u num itey unó asiʼ, kwi unum ikyayn abú ba, kwi u num ighayn anó iboŋ zənə wa ughəy da u kyaba. Yə nibi boŋ kwi u num itey ba mi chomo akə inji zənə ikoʼoro,

¹⁷ da wa ŋunə umə faʼa abú Nwiye u kyay unó jum nibi kyay umugə ni aghəy unó chuŋ jum.