2 Timoti 2 - Aŋwaʼanayn Uso Fey

Sogwi Yeso Kristo chuŋ

¹ Amə da yə, ungwə Timoti uŋu ŋwə̂, ngwə təm ikay ungɨŋ ichuŋ zənə Nwiye ghəy ina anjim umugə mba mə akə ibumi nə Yeso Kristo.

² Num unó mbənə ngwə zəw aŋu amə ghayn ifigi uzənə nanaʼ, anigə zi ungɨŋ ubugə ba mbənə ngwə zi fiŋ igun uma da umi nibi tey abú ba chini.

³ Ngwə yi zəw ingəʼ ni umugə ni sogwi chuŋ ŋunə umə faʼa abú Yeso Kristo akə fiŋ ma jum.

⁴ Cha sogwi moʼ nu umə akə afaʼa nu umə zi ubugə ungɨŋ unó unebey, damugə u yi faʼ da ighəy kwi wa kyayn ma wuʼ uŋwən.

⁵ Cha umə naʼa uma uneʼe abú wa ŋunə umə noro nigə kwi u beni aboʼo unoʼo inoro.

⁶ Wa mbayn ŋunə umə faʼa akə ikay, yi mə nə aba akə ughəy jaŋa imbey.

⁷ Kono unó mbəŋ amə ghayn inigə ungɨŋ atəw damugə Asɨyisəg yi aghəy kwi ngwə kyay unó wu injə atəw zayn.

⁸ Kono Yeso Kristo, nu amə ŋwə̂ akə aghaŋ Dafid. Nwiye zəmə uŋwən. Uŋwən amə ukən chuŋ ŋunə amə ghayn.

⁹ Amə da ukən chuŋ awu nu amə zəw ingəʼ pey umugə u si kod aŋu akə indəŋ ibəw təŋ, a chomo ni wa ŋunə u gow ikɨy. Asɨmə cha nji amə ghəy u kod inayn Nwiye akə indəŋ.

¹⁰ Anigə a yə yimə fiŋ aton unó jum da ba mbənə Nwiye choʼo u duw angəʼ, nibə mə nə iwumini zənə itənə koŋ numugə mba mə akə ibumi nə Yeso Kristo.

¹¹ Inayn zəŋ mə inayn asiʼ kwi: Mba bə si ku nə Kristo, Mba yi nibi chomo ikay nə uŋwən

¹² Mba bə yimə fiŋ, Mba yi nibi tumə isəg nə uŋwən Mba bə ton uŋwən U yi nibi ton ngwa,

¹³ Mba bə ton i zi ibeni igun ma Cha umi ton ma ngwa, Damugə cha amə aghəy ugha ton anó zənə yə si nibi beni.

Timoti mə wa faʼa nu Nwiye choʼo

¹⁴ Ngwə beʼere utəw ba Kristo da unó mbəŋ. Chede úŋwən ifigi Nwiye kwi ka umə taŋa uma da aton akə inayn ikoʼ moʼ, damugə cha ataŋa mə were ma wa. Ayə cheŋe ifiŋ ba mbənə umə zwaray.

¹⁵ Zi ikay ighəy kwi Nwiye beni afaʼa zənə ngwə faʼa, damugə ngwə mə wa faʼa nu cha indere atəw, nibə mə wa ŋunə umə tey inayn zənə amə iyi asiʼ akə inji zənə ikoʼoro.

¹⁶ Ton inayn moʼ tənə cha imə aghəy kwi ba kyay Nwiye, damugə Amaʼazənə mbən mə inayn, mbən yi ghayn unó nanaʼ nu u tey kwi cha mbən mə wumine Nwiye.

¹⁷ Unó mbəŋ nu umə ghayn umbi toʼ aba numugə afiʼ toʼo inyo wa. Ba nanaʼ akaʼa umbənə umə ghayn unó mbəŋ amə Hamenayus foro Filetus.

¹⁸ Mbə si kaŋa waʼ unó asiʼ. Umbə ghayn kwi anó ni zəmə anó nu a si chigə, Unó mbənə umə ghayn umbə chigə ibeni ba Kristo.

¹⁹ Asɨmə atiy na kaka zənə Nwiye si zi kaŋa təm ikay. Mbə ŋwaʼanayn igun kwi, “Asɨyisəg kyay ba mbənə amə uma,” Foro kwi, “Ba jum mbənə ughayn kwi mbi mə ba Asɨyisəg u waʼ uno iboŋ.”

²⁰ Ungɨŋ ina kyayn, ikudi ukaŋ jum umbə awu ungɨŋ. Mbə tana umbi moʼ akə gol nibi tana umbi chini akə silva. Mbə tugə umbi moʼ akə azad nibi tana umbi chini akə mbəm. Mbə siy umbi umoʼ akə anəy unó kyayn, isiy umbi moʼ unəy jum.

²¹ Wa moʼ be aghəy inyo ma zayn iwaʼa umbi unó iboŋ, u yi chomo nə akaŋ zənə Nwiye mi num ifaʼa awu anəy unó kyayn. U yi si zayn mara. Anigə mbaʼ afaʼa ma yi num uŋwən faʼ ni uŋwən numugə u si tana inyo ighəy unó chuŋ jum.

²² Ton unó mbənə ingwa ba mə fana. Beni amə aboʼo unó jum mbənə umə aghəy kwi ngwə aghəy unó nu ukoʼoro. Anigə amə anó nu iniŋi fiŋ igun Kristo, anó ni iwuʼ ba chini nə anó ni chomo akə aborobod. Ghəy unó mbəŋ akə ibumi ni ba mbənə umə chaʼara Asɨyisəg ni fiŋ nu izayn.

²³ Imə ayə nə anó moʼ ighəy nə unó aneŋ mbənə ba mə taŋara da úŋwən, nu cha iwe ungɨŋ. Ngwə si nibi kyay kwi ubə zaʼa ni itaŋara.

²⁴ Ka wa faʼa Asɨyisəg mə ma wa nu umə taŋara, amə wa umə aghəy ichuŋ abú ba jum. Amə wa nu ukyay umugə itey unó. Amə wa nu umə nibi yimə fiŋ.

²⁵ U tey unó akə fiŋ boti boti abú umbənə umə ton unó mbənə umə itey. Ighari moʼ Nwiye yi aghəy kwi u beŋe fiŋ uma ikyay asiʼ da Kristo.

²⁶ Umbi gha mə ni iwe, anigə gha du ungɨŋ atam zənə debere si zi abú úŋwən. Yə si ibiya úŋwən da ughəy unó mbənə u kaba.