2 Timoti 1 - Aŋwaʼanayn Uso Fey

¹ Amə umugə Pol nu amə wa tom Yeso Kristo anji zənə Nwiye kaba, ŋwaʼanayn aŋwaʼanayn zəŋ. Nwiye tom aŋu kwi aghayn da itəni zənə yə kaʼa anji zənə mba mə akə ibumi nə Yeso Kristo.

² Ayə ŋwaʼanayn inigə u ngwə Timoti, nu amə uŋu ŋwə̂ nu awuʼi kwaʼa azəd. Nwiye Mbaʼ nə ungwa Asɨyisəg Yeso Kristo ghəy ichuŋ inigə, diri ayə nibi naʼ aborobod inigə.

Pol naʼ yə beni ayə abú Nwiye nibi zi ikay abú Timoti

³ Ayə naʼa yə beni ayə abú Nwiye ŋunə amə faʼa abú uŋwən ni fiŋ zayn zayn. Ayə ghəy nigə numugə umbəŋ u mbaʼ imbey nibi ghəy. Ayə kono yə akə umaʼ jum mbənə amə chaʼara Nwiye afəb nə ingom.

⁴ A yə kono isɨy tənə ngwə mə chwey ama zənə mə sayn ayə, anigə ayə kaŋa kaba kwi nji mə wene zaʼa zən ayə da iwuʼi sugi ungɨŋ inyi fiŋ.

⁵ Mə si nibi kono ibeni asiʼ zənə imə inigə, nu amə ukudu ibeni ŋunə Loyis ungwə ingo kyayn foro Yunis ungwə ingo yə mə abú úŋwən. Mə kyay kwi ngwə yə nə ukudu ibeni wu.

⁶ Anji zənə ngwə beni Kristo iney, ayə kaba kwi ngwə beʼere uneʼe ŋunə umə ungɨŋ nigə, nu Nwiye naʼa inigə akə amaʼazənə mə niŋi ubugə igun inigə.

⁷ Cha azugə zənə Nwiye naʼa ina ghəy kwi mba beŋe akə uwuʼu ba. Ayə ghəy amə kwi mba mə nə ikay, iwuʼe ba nibi yimə inyo.

⁸ Ka atəw dere ma inigə ighayn da ungwa Asɨyisəg, kə ighayn da mugə amə wa ndəŋ da uŋwən. Asɨmə tana inyo izəw ukudu ingəʼ ŋunə mə zəw da ukən chuŋ. Ngwə yi kaŋa ghəy nigə anjim ika zənə Nwiye naʼa inigə.

⁹ Nwiye chi ngwa angəʼ anigə itiya ngwa kwi mba mə umbi ba da mba chomo akə uzayn zayn. Cha mba ghəy ngwa anó chuŋ moʼ ki yə sə tiya ngwa. Yə tiya ngwa damugə yə si num nigə. Yə nibi tiya ngwa da ichuŋ ma zənə yə si ghəy ina imbey anjim Yeso Kristo.

¹⁰ Anigə akinine, ichuŋ wu si du zayn ina anjim anji zənə Yeso Kristo ŋunə yə chi ngwa angəʼ zaʼa. Yə si ney ikay zənə yə́ mə abú iwu igun ina, anigə chigə anjim ukən chuŋ tey umugə ba mi chomo ikay, nibi tey umugə cha ba mi noʼo iku.

¹¹ Amə da ukən chuŋ wu nu Nwiye choʼo aŋu kwi a ghayn inayn Nwiye, kwi amə wa tom ma, foro kwi a tey unó da uŋwən.

¹² Amə aton zənə amə zəw ingəʼ zənə amə izəw. Asɨmə cha inyi atəw mi nded damugə mə kyay wa ŋunə a niŋi iyi fiŋ igun ma. Mə nibi kaŋa kyay kwi u yi tana isiy unó mbənə u zi ungɨŋ umbəŋ ubugə pey amaʼ zənə Nwiye mi saʼa isəg.

¹³ Yimə inayn asiʼ zənə mə ghayn inigə amə́ anwini nu ngwə mi beni aboʼ. Yimə ibeni zənə imə inigə nibi iwuʼ ba. Ghəy nigə numugə ngwə mə akə ibumi nə Yeso Kristo.

¹⁴ Siy asiʼ ŋunə Azugə zayn zayn zənə amə ungɨŋ ina zi ungɨŋ umbə ubugə.

¹⁵ Kyay kwi ba Kristo nanaʼ aba abey Esiya si fere injim ma iniŋ. Ka aba Figelus foro Hemogenes, mbə si nibi fere injim uma iniŋ.

¹⁶ Ayə chaʼara Asɨyisəg Yeso kwi u diri ba mbənə umə ungɨŋ unebey Onesiforus damugə mbə mə́ kaŋa zutə inyi fiŋ. Amə cha uŋwən nə indere atəw da aŋu numugə mə́ mə ana indəŋ.

¹⁷ Amaʼazənə uŋwən zaʼa a Rom, yə kaba aŋu kwaʼa azəd pey amaʼazənə yə zən aŋu.

¹⁸ A yə chaʼara Asɨyisəg Yeso kwi u diri uŋwən aney zənə umi saʼa isəg, ngwə kyay umugə yə were aŋu a Efesus.