2 Tesaloniyans 3 - Aŋwaʼanayn Uso Fey

Pol boʼo ubugə kwi ú chaʼara Nwiye abú uŋwən

¹ Umbəŋ unya, mbən ki chaʼara Nwiye ina kwi ukən chuŋ da Asɨyisəg ni yaba saŋa ŋuw imbey, ba zəw beni nə iwumini, aba anji zənə mbən zəw i beni nə iwumini.

² Mbən nibi chaʼara Nwiye kwi u chiyə ngwa inya ubugə uzəg nibi chi inya ubugə ba unó iboŋ damugə akə ma ba jum u zi fiŋ igun Yeso Kristo.

³ Asɨmə Asɨyisəg yə ghəy unó mbənə u kaʼa. U yi ghəy itən fiŋ kara nibi kən ngwən abú Satan wa unó iboŋ.

⁴ Asɨyisəg si ghəy kwi mba zi ita fiŋ igun inen numugə mbən mə ghəy anigə mbən yi ŋu imbey imə bə ghəy unó mbənə mba ghayn inen.

⁵ Asɨyisəg ghəy kwi mbən tana kyay inji zənə Nwiye wuʼi ngwən, nibi ghəy kwi mba kyay umugə Asɨyisəg mə́ ghəy kwi mbən yimə fiŋ.

Pol chere ba zigə

⁶ Umbəŋ unya, mba yə ghayn inen akə ukum Asɨyisəg Yeso Kristo kwi mbən mə jəgə ngwən ni ba Kristo mbənə umə ghəy azigə nu cha umə beni boʼo ikɨy tənə mba naʼa inen.

⁷ Mbən si kyay kwaʼa anji chuŋ kwi, mbən ni faʼa aba numugə mba mə faʼa. Amaʼazənə mba mə aboʼo injən, cha mba mə ghəy ngwa azigə.

⁸ Cha mba mə numə ngwa aghəy wa moʼ nu cha mbə di naʼa ukab. Mba mə faʼa akə ikay afəb nə ingom da ka mba mə naʼa ngwa udere abú wa moʼ injən kaʼa.

⁹ Cha mba mə ghəy ngwa nigə damugə amə cha ikay ina ibey awere inen. Mba mə ghəy ney da mbən kweme anó ina.

¹⁰ Amaʼazənə mba mə aboʼo injən, mba ghayn inen kwi, “Wa ŋunə u ton ma ifaʼ ka ujəgə ma.”

¹¹ Mba yə ghayn ney damugə mbə si ghayn ina kwi ba moʼ mbə akaʼa injən nu umə ghəy azigə. Cha umə faʼa uma ghəy moʼ, umbə yeŋ yi zi amə uchəw akə unó ba chini.

¹² Mba yə ghayn abú ikudi ba uŋu nibə chere úŋwən akə ukum Asɨyisəg Yeso Kristo kwi u chomo asey ni faʼ ufaʼa uma nibə mə nə u ghəy mbənə umi were inyo ma awu.

¹³ Umbəŋ unya, amə́ inen, ka mbən bó ngwən imə ghəy unó mbənə ukoʼoro.

¹⁴ Wa moʼ bə ton izəw unó mbənə mba ŋwaʼanayn ungɨŋ aŋwaʼanayn zəŋ, mbən num amaʼ nə uŋwən. Ka mbən mə ngwən nə anó moʼ ighəy nə uŋwən da indere atəw ibiya uŋwən.

¹⁵ Ka mbən num ngwən uŋwən ni wa abana, asɨmə mbən chere uŋwən numugə mbən mə chere unya ŋunə u beni Kristo.

Pol si nwi chaʼara ba

¹⁶ Asɨyisəg ŋunə umə naʼa aborobod u naʼa aborobod inen akə umaʼ ujum foro akə inji ijum. Asɨyisəg mə́ nə umbən ujum.

¹⁷ Amə umugə Pol á ŋwaʼanayn aŋwaʼanayn zəŋ akə umbəŋ ubugə. Zəŋ amə anwini zənə amə zi igun uŋwaʼanayn mbənə amə iŋwaʼanayn. Zəŋ amə inyi abugə ŋwaʼanayn.

¹⁸ Ungwa Asɨyisəg Yeso Kristo ghəy ichuŋ inen umbən ujum.