2 Tesaloniyans 2 - Aŋwaʼanayn Uso Fey

Wa ŋunə umə ikyugə

¹ Umbuŋ unya, da anó zənə ungwa Asɨyisəg Yeso Kristo mi wene izaʼa foro da anó zənə mba mi bumə ŋu kuw uŋwən, mba yə boʼo ubugə inen kwi,

² ka umbən utəw bure ma, ka itən fiŋ toboro ma ngwən da ba mbənə umə ghayn kwi aney zənə Asɨyisəg mi zaʼa yə si pey. Kanə bə ghayn kwi amə azugə ghayn kə ughayn akə inayn kə kwi mbə ŋwaʼanayn ungɨŋ aŋwaʼanayn, mbən beni ngwən.

³ Ka mbən beni ngwən kwi wa moʼ itama ngwən kaba akə inji ngiya. Cha aney wu mi zaʼa ma pey amaʼazənə ba mi ton Nwiye anigə wa ŋunə umə kyugə yi buw nu u si siy kwi uŋwən ŋu asin uwu ba.

⁴ U yi ton anigə ibeʼere inyo ma igun u ghəy ujum mbənə ba mə tiya kwi unwiye kə nu ba mə wumine. U yi nyi ŋu chomo ungɨŋ imbəŋ Nwiye ighayn kwi imə Nwiye.

⁵ Cha mbən di ni kono kwi Amaʼazənə mə́ mə nə umbən, mə́ ghayn unó mbəŋ ujum inen?

⁶ Ghəy moʼ yə awu amə yimə uŋwən kwi ka u zaʼa ma akinine, mbən kyay ngwən aghəy wu. Amaʼ yi koʼ, uŋwən ŋunə umə kyugə uyi buw.

⁷ Anó zənə wa kyugə aghəy kwi ba ton Nwiye yə sə faʼa. Aba uŋwən ŋunə u yimi anó zəŋ mi ŋu imey ni yimə pey Amaʼazənə Nwiye mi chi uŋwən anji.

⁸ Amə amaʼa wu nu wa ŋunə umə ikyugə umi du asaŋ. Asɨyisəg Yeso yi zwere uŋwən nə ufey ŋunə umi du ungɨŋ uchəw ma, iniy uŋwən akə uzayn zayn ŋunə umi bigə akə amaʼazənə umi zaʼa.

⁹ Wa ŋunə umə ikyugə yi zaʼa nə ikay zənə Satan naʼa abú uŋwən. U yi pey yi aghəy ikudi uyere unó figi jum, ighəy ikudi inwini unó figi jum nibi aghəy ikudi unó jum nu u daba.

¹⁰ U yi num ikudi inji unó jum itama ba mbənə umi nim. U mbi nim damugə cha udi beni asiʼ da Asɨyisəg Yeso boʼo idu angəʼ.

¹¹ Anigə Nwiye si buri ikono uma damugə mbə beni unó buw.

¹² Yə nibi aghəy nigə boʼo u zi usaʼa igun ba mbənə cha udi beni asiʼ anigə ni aghəy unó nu cha udi koʼoro.

Nwiye choʼo ngwən da ichi ngwən angəʼ

¹³ Umbuŋ unya nu Asɨyisəg wuʼi azəd, mba yə naʼa yə beni ayə abú Nwiye ighari jum da ngwən. Damugə Nwiye choʼo ngwən inoʼo Amaʼazənə isəg ti kwi mbən du angəʼ anjim ikay zənə Azugə Nwiye aghəy mbən zayn foro anjim mugə mbən beni asiʼ.

¹⁴ Nwiye tiya ngwən kwi mbən mə ney anjim ukən chuŋ ŋunə mba ghayn inen. Ayə nigə boʼo ba naʼa ukudu iwumini ŋunə umə naʼa abú ungwa Asɨyisəg Yeso Kristo inen.

¹⁵ Anigə umbəŋ unya, mbən təm ikay iyimi unó mbənə mba tey inen, kə amə akə inayn zənə mba ghayn kə ungɨŋ aŋwaʼanayn zənə mba ŋwaʼanayn inen.

¹⁶ Ungwa Asɨyisəg Yeso Kristo ma amboŋ nə Nwiye ungwa mbaʼ nu u wuʼi ngwa anjim ichuŋ ma aghəy kwi mba təm ikay nibi aghəy kwi mba niŋi ita ikono jum igun unó chuŋ mbənə ukaʼa ina.

¹⁷ U zi ikyay nibi na ikay inen kwi mbən aghəy unó chuŋ jum nibi ghayn inayn chuŋ jum.