2 Tesaloniyans 1 - Aŋwaʼanayn Uso Fey

¹ Amə umugə Pol nə Sayilas foro Timoti mba ŋwaʼanayn aŋwaʼanayn zəŋ. Mba yə ŋwaʼanayn inen umbən ba Kristo mbənə mbən mə ungɨŋ ufere Tesalonika nu mbən mə ba Nwiye ungwa Mbaʼ foro ba Asɨyisəg Yeso Kristo.

² Nwiye ungwa Mbaʼ nə Asɨyisəg Yeso Kristo ghəy ichuŋ inen nibi naʼa aborobod inen.

Nwiye yi saʼa ba amaʼazənə Kristo mi wene izaʼa

³ Umba unya, mba yə naʼa yə beni ayə abú Nwiye ighari jum da ngwən. Mba yə aghəy nigə akə nji zənə ikoʼoro damugə ijən ibeni fiŋ mə ikay ŋuw imbey. Mbən yə nibə wuʼe umbən unya ŋuw imbey.

⁴ Amə aton zənə mba mə komo iguwə ungɨŋ ufere ba Nwiye. Mba yə komo da inji zənə mbən mə yimə fiŋ foro damugə ijən ibeni fiŋ yə kara akə umaʼ ujum mbənə umə nwini itən inya ughəw foro amaʼazənə mbən mə zəw ingəʼ.

⁵ Unó mbəŋ ujum umbə tey kwi Nwiye yi saʼa ba akə inji zənə ikoʼoro. Nwiye yi zən kwi mbən koʼ inyi ungɨŋ anó ufon ma zənə mbən mə zəw ingəʼ da ngwen.

⁶ Nwiye yi aghəy anó zənə akoʼo, anigə u yi zi ingəʼ utəw ba mbənə umə aghəy mbən zəw ingəʼ.

⁷ U yi naʼa azwere abú ba mbənə umə zəw ingəʼ, nibi na ina. U yi aghəy ney Amaʼazənə Asɨyisəg Yeso umi swiʼi azobo ni mbə angəd nu umə ni ikay.

⁸ U yi swiʼi nə uwəd nu umə beŋe pey yi zi ingəʼ igun ba mbənə cha udi kyay Nwiye, zi igun ba mbənə u ton iwumini uŋwən nibi zi igun ba mbənə cha umə ighəy unó mbənə umə ungɨŋ ukən chuŋ da ungwa Asɨyisəg Yeso.

⁹ Nwiye yi zi ingəʼ igun uma nu imi tənə akə ighari feyn anigə ichi úŋwen ifigi Asɨyisəg Yeso, nibi chi úŋwən ungɨŋ iwumini ma zənə ikaŋa daba.

¹⁰ Aney zənə umi zaʼa, ba ma mbi yere, ba ujum mbənə beni uŋwən mbi naʼa iwumini abú uŋwən. Kaba umbən, mbən yi mə aboʼo uŋwən damugə mbən beni anó zənə ba ghayn inen.

¹¹ Amə aton zənə mba mə chaʼara Nwiye ighari jum inen kwi ungwa Nwiye ghəy mbən təm koʼoro, ichomo anji zənə yə́ tiya ngwən kwi mbən chomo. Foro kwi anjim ikay ma, mbən mə́ nə u ghəy chuŋ mbənə mbən mə kaba nibi mara afaʼa zənə ibeni ghəy kwi mbən faʼa.

¹² Mba yə chaʼara Nwiye kwi ba Wumini ungwa Asɨyisəg Yeso da ngwən, anigə uyi aghəy kwi ba wumine ngwən da uŋwən. Anó zəŋ ayi aghəy damugə ungwa Nwiye nə Asɨyisəg Yeso Kristo umbi aghəy ichuŋ inen.