2 Pita 3 - Aŋwaʼanayn Uso Fey

Asɨyisəg yi wene izaʼa

¹ Umbuŋ unya nu awuʼi kwaʼa azəd, aŋwaʼanayn zəŋ nu amə ŋwaʼanayn inen akinine amə aŋwaʼanayn nu aŋu pey akə ubigə. Ungɨŋ uŋwaʼanayn mbəŋ ubigə, mə si kaŋa ibeʼere umbən utəw da unó mbənə mbən si nibi kyay boʼo mbən kono unó wu umbən utəw zayn.

² Ayə kaba kwi mbən kono inayn zənə ba ukən Nwiye zayn zayn ghayn amaʼ imbey, nibi kono unoʼo mbənə Asɨyisəg chiyə ba angəʼ chigə anjim umbi ba tom inaʼ inen.

³ Anó imbey zənə mbən mi kyay amə kwi ungɨŋ unəy mbənə usi Nwi, ba moʼ mbi zaʼa pey yi baʼara ngwən. Úŋwən mbi beni aboʼo unó mbənə nyə̂ inyo mə fana.

⁴ Umbi biri kwi, “Aka Yeso kaʼ kwi iyi wene izaʼa? Uŋwən si uŋwayn? Iti Amaʼazənə umba mbaʼ imbey sayn isəg, unó jum mbə ma aba anji zənə mbə́ məŋi iti Amaʼazənə Nwiye tana isəg.”

⁵ Mbə kaŋa kyay asɨmə itebe anó zənə, amaʼ asa, Nwiye tana azobo nibi tana isəg aba akə inayn ma. Yə tana isəy akə une, anigə isəy du ungɨŋ une.

⁶ Amə nibi anjim umugə une kəbərə isəg nu Nwiye iniy isəg imbey.

⁷ Amə nibə aba akə inayn nu Nwiye si num kwi iyi iniy azobo zəŋ akinine nibi iniy isəg zəŋ akinine ungɨŋ uwəd. Nwiye num kwi azobo nə isəg chomo pey anəy zənə umi saʼ ba nibi iniy ba mbənə cha umə iwumini uŋwən.

⁸ Umbuŋ unya nu awuʼi kwaʼa azəd, ka mbən nyaba ngwən anó feyn zəŋ. Anó wu amə kwi, abú Asɨyisəg, cha ma ikyaba akə anəy feyn nə ichuʼ atuʼ. Anəy feyn chomo aba ni achuʼ atuʼ, achuʼ atuʼ chomo aba ni anəy feyn.

⁹ Cha Asɨyisəg mə num ma amaʼ ki aghəy anó zənə u kaʼa, anji zənə ba moʼ mə kono kwi u yə num amaʼ. Asɨmə uŋwən yə yimə fiŋ nə umbən damugə cha umə kaba ma kwi wa moʼ nim. U yə kaba amə kwi ba jum beŋe fiŋ i waʼ umbi unó iboŋ.

¹⁰ Asɨmə anəy zənə Asɨyisəg mi zaʼa yi chomo numugə uji mə zaʼa. Anəy wu, azobo yi joʼ akə ikay inim, uwəd yi tuŋ ughəy jum mbənə umə azobo u sam. Uwəd yi tuŋ isəg nibi tuŋ ughəy jum mbənə umə igun isəg u nim.

¹¹ Umugə Nwiye mi iniy ughəy mbəŋ jum akə inji zəŋ, mba si məŋə ukudu ba ingiya? Mbən chomo uzayn zayn nibi naʼ injən inyo abú Nwiye,

¹² damugə mbən mə nəmə anəy zənə umi wene izaʼa. Mbən zi ikay izən kwi anəy wu yabi zaʼa. Igun anəy wu, uwəd yi tuŋ azobo, a nim. Azuʼ akə uwəd wu yi nibi ghəy kwi ughəy mbənə umə azobo u sam.

¹³ Asɨmə amə da ngwa, mba yə nəmə azobo fey nə isəg fey zənə Nwiye si kaʼ ina, nu amə asin zənə ba jum mi chomo akə inji zənə ikoʼoro.

¹⁴ Anigə umbəŋ unya nu a wuʼi kwaʼa azəd, umugə mbən mə nəmə unó mbəŋ, mbən zi ikay izən kwi mbən chomo akə uzayn zayn da ka Nwiye zən ma anó iboŋ moʼ igun inen. Mbən chomo akə aborobod nə Nwiye.

¹⁵ Mbən ney inji zənə Nwiye yimə fiŋ nə umbən, num chomo ni apan nu unaʼa inen kwi mbən duw angəʼ. Ungwa nya Pol nu mba wuʼi kwaʼa azəd nibi ŋwaʼanayn anó zəŋ inen anji zənə Nwiye naʼa iwe abú uŋwən kwi ughəy nigə.

¹⁶ Unó mbəŋ bə ŋwaʼanayn ungɨŋ uŋwaʼanayn jum mbənə yə́ ŋwaʼanayn. Unó moʼ mbə ungɨŋ uŋwaʼanayn mbənə Pol ŋwaʼanayn nu cha atəw ba di zayn da úŋwən. Ba mbənə cha u kyay unó, nu ibeni uma mə ibo, umbi mə toʼoro unó mbəŋ anji chini. Ba mbə́ kyaba unó ungɨŋ aŋwaʼanayn zəŋ aba anji zənə umə kyaba ungɨŋ aŋwaʼanayn Nwiye chini. Numugə umə aghəy nigə, umə tiya ingəʼ igun utəw uma.

¹⁷ Anigə umbən umbəŋ unya nu a wuʼi kwaʼa azəd, mbən si nibi kyay anó zəŋ. Mbən weŋ ngwən damugə ba mbənə cha u kyay unoʼo mbə kaba fibiri ngwən, nji mbən yi nim inji anigə isam asin zənə mbən si təm igun ikay.

¹⁸ Asɨmə mbən ŋu imbey ni kwey ungɨŋ ichuŋ foro ungɨŋ anó ni kyay ungwa Asɨyisəg Yeso Kristo ŋunə yə chiyə ngwa angəʼ. Ba ujum wumini uŋwən akinine iŋu nwi koŋ. Amə nigə.