2 Pita 2 - Aŋwaʼanayn Uso Fey

Pita chere ba mbənə u beni Kristo da mbə taʼa ba figə unó

¹ Ba ukən figə unó mə akaʼa ba imbey aba anji zənə mbə taʼa ba figə unó mi zaʼa injən akaʼa. Umbi nyaʼa zaʼa ni inayn unó figə da Nwiye. Inayn unó figə wu amə inayn nu imi iniy ba. Umbi ton mbaʼ afaʼa uma ŋunə yə ziya utəw uma. Umbə aghəy nigə, Nwiye yi yabi iniy úŋwən.

² Ba nanaʼ mbi beni aboʼo unyimi unó mbə taʼa ba figə unó wu. Amə da unó mbənə umə ighəy nu ba mi ghayn unó iboŋ da inji asiʼ zənə ba mi chomo.

³ Numugə u wuʼi ni were ughəy, umbi ghayn iboʼ iko inen da iji ngwən. Agha si kaŋa sa nu Nwiye si zi usaʼa igun uma. Nwiye ŋunə umi iniy úŋwən uyə ikyiʼi.

⁴ U yi aghəy nigə damugə yə nibi inyi mbə angəd mbənə mbə́ aghəy unó iboŋ. Yə maʼa úŋwən ungɨŋ asin umə zəw ingəʼ nu amə asin zənə mbə kod úŋwən akə indəŋ ungɨŋ asin firi, kwi u chomo awu pey anəy zənə umi saʼa isəg.

⁵ Cha yə chi ma isəg imbey angəʼ, asɨmə yə chi Noa foro ba chini sambigə angəʼ. Yə aghəy nigə Amaʼazənə yə num une ikəbərə isəg abú ba mbənə cha mbə́ mə́ iwumini Nwiye. Noa yə saŋa itom Nwiye kwi ba aghəy unó mbənə ukoʼoro.

⁶ Nwiye nibi zi ingəʼ igun ubey mbənə umə itiya akə Sodom foro Gomora. Yə iniy usin awu akə uwəd. Yə aghəy nigə da amə anwini abú ba mbənə cha umə iwumini uŋwən.

⁷ Yə nibi chi Lot angəʼ, Lot mə́ wa chuŋ. Yə́ mə kaŋa kənə da unyimi unó mbənə ba mbənə cha umə iwumini Nwiye umə aghəy.

⁸ Fiŋ anóm uŋu nu yə́ mə́ ighəy unó nu ukoʼoro yə́ mə́ toboro uŋwən unəy jum damugə yə́ mə́ zənə nibə izəw unó mbənə ba mbənə cha mbə mə iwumini Nwiye mə ighəy nibə ghayn.

⁹ Anigə amə kwi Asɨyisəg kyay umugə ichi ba mbənə umə iwumini uŋwən akə akwaʼara. Yə nibi kyay umugə inyi ba mbənə cha umə ighəy unó mbənə cha udi koʼoro. U yi isey úŋwən ŋu pey anəy zənə umi nwi saʼa isəg.

¹⁰ Amara amə umbənə umə beni aboʼo unó mbənə yə inyo ma mə fana. U mbə nibə tono kwi cha ikay abú Nwiye itumə úŋwən. Mbə taʼa ba akə unó figi mbəŋ mə́ cha kwayn nibə nə ikay fiŋ. Cha umə beni ni wumini ughəy mbənə umə nə iwumini azobo.

¹¹ Kaba mbə angəd nu umə nə ikay nibi ka chigə mbə taʼa ba figə unó mbəŋ. Cha udi kaŋa zi usaʼa igun ughəy mbənə umə iwumini da ichiŋi úŋwən ifigi Nwiye.

¹² Ba mbəŋ mbə aghəy amə unó mbənə ukoʼo ungɨŋ fiŋ uma. Cha umə kono uma anó ki ighəy. Mbə chomo ni nyə̂ nya nya nu u biya úŋwən kwi ba zwere. Umbə chiŋe unó mbənə cha udi kyay. Anigə, umbi zwere úŋwən numugə umə izwere nyə̂ nya nya.

¹³ Anigə umbi tu úŋwən akə ingəʼ damugə umbə zi ingəʼ igun ba chini. Umbə wuʼi kwi ba aghəy unó mbənə nyə̂ inyo uma kaba angom. U mbə nə indere atəw nibi cheŋe inyo uma Amaʼazənə umə ijəgə nə umbən asɨmə umbə itama ngwən.

¹⁴ Umbə kaŋa iney ayey mbənə umə ighəy unó mbənə cha udi koʼoro. Cha umə igoro imə ighəy unó iboŋ. U mbə tama ba mbənə cha fiŋ uma kara. Mbə si kweme imə ifoy ughəy. Nwiye yi zi indon igun uma.

¹⁵ Cha umə nə ighəy unó mbənə ukoʼoro, u mbə sə aghəy amə unó iboŋ. U mbə aghəy amə unó mbənə Balam ŋwə̂ Beyo mə́ ighəy. Balam wuʼ ukab ŋunə yə mə nyi abú uŋwən akə unó iboŋ mbənə yə́ mə́ ighəy.

¹⁶ Amaʼazənə yə mə ighəy unó iboŋ wu, Jakas nu cha yə́ mə inayn nayn abú uŋwən. Jakas wu nayn abú uŋwən akə igəg wa. Yə məŋə-ano zənə wa ukən mə ŋu ighəy.

¹⁷ Mbə taʼa ba figə unó wu chomo ni imbuʼ igwi tənə isi zom, mbə chomo ni ipaʼ zənə afim beʼe mə chigə ichigi. Nwiye si sey asin abú úŋwən ungɨŋ asin firi nyə́m.

¹⁸ Umbə nayn inayn aneŋ nibə komo iguwə. Umbə numə unyimi unó mbənə nyə̂ inyo mə fana tama ba mbənə u chede du akaʼa ba mbənə umə chomo ungɨŋ ufibiri unó.

¹⁹ Umbə kaʼa kwi umbi chi ba mbəŋ angəʼ asɨmə úŋwən uma ambuŋ mbə́ bugə isob abú unó iboŋ. Damugə wa mə isob abú aghəy zənə abiya uŋwən.

²⁰ Asɨmə ba mbənə usi kyay ungwa Asɨyisəg Yeso Kristo ŋunə umi chi ngwa angəʼ, anigə inod abú unó iboŋ mbənə umə ungɨŋ isəg, asɨmə unó iboŋ wu gha ibiya úŋwən ikod, nji ingəʼ zənə imi nyi igun uma yi chigə izənə mbə dey mə ungɨŋ.

²¹ Yə mi kaŋa iboŋ kwi, nji cha mbə mi kyay uma anó zənə akoʼoro. Chigə umugə mbə kyay anigə ifere injim akə unoʼo zayn zayn mbənə mbə́ naʼa abú úŋwən.

²² Anó zənə aduw abú úŋwən atey kwi inayn maʼa zəŋ si du akə asiʼ kwi, “Ibəw ba zəŋa, iyi wene ŋu jəg izəŋa wu.” Foro kwi, “Umbə səw ingwey, iyi gha wene ŋu zoʼ inyo ma ungɨŋ achaʼ.”