2 Pita 1 - Aŋwaʼanayn Uso Fey

Achaʼara

¹ Amə umugə Sayimon Pita wa faʼa foro wa tom Yeso Kristo á ŋwaʼanayn aŋwaʼanayn zəŋ. A yə ŋwaʼanayn inen umbən mbənə mbən mə nə ibeni nu imə ichin ichin ni inja, anjim ichuŋ ungwa Nwiye nə Asɨyisəg Yeso Kristo ŋunə u chi ba angəʼ Uŋwən yə ghəy unó nu ukoʼoro.

² Nwiye ghəy ichuŋ inen nibi naʼ aborobod inen isugi. Yə ghəy nigə anjim umugə mbən kyay uŋwən nibi kyay Yeso ungwa Asɨyisəg.

Nwiye tiya ba ichoʼo uŋwən

³ Nwiye chigə anjim ikay ma inaʼ u ghəy ujum mbənə mba mə kaba da mba chomo ikay ni wumine uŋwən. Yə si naʼa nigə damugə mba kyay uŋwən. Yə tiya ngwa kwi mba mə nə aba ungɨŋ iwumini ma foro ungɨŋ ichuŋ ma.

⁴ Anjim ikay ma wu, yə inaʼ aməde uneʼe ŋunə yə́ kaʼa kwi iyi naʼ ina. Yə ghəy nigə da anjim uneʼe wu mba yi bugə unó iboŋ mbənə ba ungɨŋ isəg mə ghəy, si beŋe chomo ni Nwiye.

⁵ Umugə Nwiye ghəy unó mbəŋ ina, mbən yi kaŋa zən kwi umugə mbən zi fiŋ igun Nwiye yə ghəy kwi mbən ghəy ichuŋ. Umugə mbən ghəy ichuŋ, yə ghəy kwi mbən kyay Nwiye.

⁶ Umugə mbən kyay Nwiye, ayi ghəy kwi mbən yimə inyo, umugə mbən yimi inyo ayi ghəy kwi yimə fiŋ, umugə mbən yimə fiŋ ayi ghəy kwi mbən ghəy unó ni wumini Nwiye,

⁷ umugə mbən wumini Nwiye ayi ghəy kwi mbən wuʼ umbən unya, umugə mbən wuʼ umbən unya ayi ghəy kwi mbən wuʼ ba chini.

⁸ Mbən mə unó mbənə mbən mi ighəy. Mbən ni ghəy nigə ŋuw imbey, da mbən yi sə faʼa anji chuŋ sə ghəy unó chuŋ nanaʼ. Zigə ayi tey kwi akə atəw ukoʼ mbən kyay Asɨyisəg Yeso Kristo.

⁹ Wa moʼ ŋunə cha umə ghəy unó mbəŋ yə chomo ni wa ŋunə umə zən usin anji chuŋ. Yə nibi chomo nə ufəg. Yə si nyaba kwi Nwiye si səw unun unó iboŋ ma.

¹⁰ Anigə umbəŋ unya, mbən zi ikay izən kwi mbən chomo aba anji zənə Nwiye choʼo ngwən nibi tiya ngwən kwi mbən mə umbi ba. Mbən bə chomo nigə nji cha mbən ni noʼo ighəy anó iboŋ.

¹¹ Anigə Nwiye yi naʼa ikay jum inen inyi ungɨŋ anó fon inoʼo məy Asɨyisəg Yeso Kristo ŋunə yə chi ngwa angəʼ.

¹² Ayə beʼere umbən utəw ighari jum da unó mbəŋ, ka di ba kwi mbən si nibi kyay unó wu nibi kyay kwi mbən si tem ikara ungɨŋ asiʼ ŋunə mbə tey inen.

¹³ Mə kaŋa kono kwi yə koʼ kwi a beʼere umbən utəw da unó mbəŋ akinine nu amə bugə ikay.

¹⁴ Mə kyay kwi a yi yabi isayn isəg anji zənə ungwa Asɨyisəg Yeso Kristo si ghəy a du zayn iniŋ.

¹⁵ Ayə zi ikay izən kwi ki asə isayn isəg, mbən yi sə kono unó mbəŋ jum.

Ba mbənə mbə́ zən uzayn zayn Kristo

¹⁶ Cha mba mə num ngwa iboʼo iko tənə ba uneŋ iwe tana ni ghayn inen da ikay ungwa Asɨyisəg Yeso Kristo foro da amaʼazənə umi gha wene izaʼa. Mba mə uzənə amaʼazənə Nwiye inaʼa iwumini abú uŋwən.

¹⁷ Nwiye Mbaʼ naʼa iwumini nibi naʼ uzayn zayn abú uŋwən akə amaʼazənə igəg Nwiye ŋunə mba mə naʼa iwumini kyay abú uŋwən ghayn abú uŋwən kwi, “Ngwə amə uŋu ŋwə̂ nu a wuʼi kwaʼa azəd, inyi fiŋ yə boŋo azəd da uŋwən.”

¹⁸ Mba zəw igəg zəŋ nu yə ghama azobo amaʼazənə mba mə nə uŋwən igun ugum Nwiye.

¹⁹ Anigə mba si kyay kwi inayn zənə ba ukən Nwiye ghayn da uŋwən mə kwaʼa inayn asiʼ. Mbən tana zi atəw akə inayn zəŋ damugə uŋwən yi chomo ni anam zənə amə bəŋe ungɨŋ asin firi. Mbən zi atəw akə unó mbəŋ damugə afəb yə chigə chigi, Kristo bigə ungɨŋ itən fiŋ mugə itən mə duw afəfəb.

²⁰ Anó imbey nu mbən mi kyay amə kwi, cha wa moʼ akaʼa inja amə ghəy u toʼoro anó zənə ba ukən Nwiye ŋwaʼanayn ungɨŋ aŋwaʼanayn Nwiye akə ighari ma,

²¹ damugə cha ukən Nwiye zaʼa ma anji zənə ba inyoŋ atəw kaba. Amə Azugə zayn zayn yə́ ghəy kwi ba ghayn ukən ŋunə yə́ noʼo abú Nwiye.