2 Korintiyans 9 - Aŋwaʼanayn Uso Fey

Awere zənə mbə́ ŋu naʼ abú ba Kristo mbənə umə Yerusanem

¹ Cha aton iniŋ iŋwaʼanayn inen da awere zənə mbən mə ŋu cha abú ba Nwiye mbənə umə Yerusanem.

² Mə kyay kwi mbən kaŋa iwuʼ iwere, anigə mə si komo iguwə da ngwən abú ba Kristo mbənə umə Yerusanem. Mə ghayn abú úŋwən kwi ba Kristo mbənə umə Achaya si tana inyo inaʼ awere inoʼ akə utuʼ ŋunə u chigə. Inji zənə mbə́ wuʼ inaʼ awere zəŋ, yə si beʼere ba nanaʼ akaʼa úŋwən kwi u nibi were.

³ Ayə cha unya mbəŋ da ka tey ma kwi umugə mba mə komo iguwə da anó zənə mbən si aghəy amə atəw ibuw. Mə yə cha úŋwən da mbən tana inyo anji zənə mba si aghəy abú ba chini kwi mbə kaʼ si tana.

⁴ Abə mə kwi cha mbən kyay itana inyo, nji ba moʼ Masedoniya mbi zaʼa nə umugə pey yi zən kwi cha mbən kyay tana inyo, umba utəw mbi ided. Umba utəw bə dere, nji ami si məŋi ingiya nu umbə mbənə mba zi ita fiŋ igun inen?

⁵ Anigə mə kaŋa kono kwi yə koʼ kwi a boʼo ubugə abú unya mbəŋ kwi u dey zaʼa inen da mbən tana uneʼe kyayn ŋunə mbən kaʼa. A yi tey kwi mbən naʼ uneʼe wu anji zənə mbən wuʼi akə ma kwi mə tini ngwən itini.

⁶ Anó zənə amə ghayn amə kwi wa ŋunə u kono ughəy pipi u yi nibi jaŋa ughəy pipi. Wa ŋunə u kono ughəy nanaʼ u yi nibi jaŋa ughəy nanaʼ.

⁷ Wa feyn feyn yi naʼ aba anji zənə yə si tana ungɨŋ fiŋ kwi iyi naʼ. Ka u naʼa ma ni gha idey. Ka u naʼa ma chomo ni kwi mbə tinə uŋwən itini damugə Nwiye yə wuʼe wa ŋunə u mə naʼa ughəy ni wuʼi ungɨŋ fiŋ ma.

⁸ Nwiye yi naʼ ughəy jum inen chigə u mbənə mbən mə kaba da mbən mə nə ughəy jum akə umaʼa jum boʼo mbən mi naʼ kwi ughəy unó chuŋ awu.

⁹ Ayə ungɨŋ aŋwaʼanayn Nwiye kwi, “U yə saŋara, uyə naʼa ughəy abú ba ukwaŋ Anji zənə umə ighəy unó mbənə u koʼoro itəm koŋ.”

¹⁰ Nwiye ŋunə u naʼa ughəy ngwara abú wa ŋunə umə faʼa ambayn, nibi naʼa ingəŋ kwi ba jəg, yə naʼa ughəy jum mbənə mbən kaba anigə ighəy u kwey. Ba nanaʼ umbi jəg akə inji zənə mbən mə saŋara ubugə.

¹¹ Mbən bə sə saŋara ubugə, nji Nwiye yi aghəy kwi mbən mə nə ughəy nanaʼ akə ikudi inji jum. Isaŋara yi aghəy kwi ba nanaʼ chigə anjim ina inaʼ yə beni ayə abú Nwiye.

¹² Anigə cha anó zənə mbən mə ighəy mə naʼa ma aba ughəy mbənə ba Nwiye mə kaba, ayi nibi aghəy kwi ba nanaʼ naʼa yə beni ayə abú Nwiye.

¹³ Mbən bə mə ighəy ukudu unó ŋunə, nji mbən si tey ikudi ba ŋunə mbən mə úŋwən. Anigə ba nanaʼ mbi yere Nwiye da nji zənə mbən beni da Kristo. U mbi naʼa yə beni ayə abú Nwiye da ughəy mbənə mbən mə naʼa abú úŋwən foro da u mbənə mbən mə naʼa abú ba chini.

¹⁴ Umbi chaʼara Nwiye igun inen nə iwuʼi ungɨŋ fiŋ uma da ichuŋ kyayn zənə Nwiye ghəy inen.

¹⁵ Mba naʼa yə beni ayə abú Nwiye da uneʼe ma ŋunə u naʼa ina nu amə uneʼe ŋunə cha amə aghəy wa zon.