2 Korintiyans 8 - Aŋwaʼanayn Uso Fey

Ba Kristo ni saŋara ubugə

¹ Umbəŋ unya, mba yə kaba kwi mbən kyay ichuŋ zənə Nwiye aghəy abú ifere ba Kristo tənə imə aba abey Masedoniya.

² Mbə́ si chigə akə ingəʼ nanaʼ, asɨmə iwuʼi sugi ungɨŋ fiŋ uma. Yə aghəy kwi u saŋara ubugə ŋu chigə, ka di ma kwi ukwaŋ uma chigə abugə.

³ Ayə ghayn inen kwi mbə́ naʼa ukab chigə inji zənə yə́ mə́ abú úŋwən. Mbə́ naʼ akə inji zənə mbə wuʼi ina. Akə ma kwi, mbə́ mə́ tinə úŋwən itini.

⁴ Mbə́ boʼo ubugə ina akə fiŋ uma jum kwi mba naʼa apan u were ba Nwiye mbənə amə ba ukwaŋ a Yerusanem.

⁵ Mbə́ aghəy unó mbəŋ chigə inji zənə mba kono. Mbə́ nibi naʼ inyo uma ifaʼ abú Asɨyisəg. Mbə́ nibi naʼ inyo ifaʼ ina akə inji zənə Nwiye kaba kwi ughəy nigə.

⁶ Anigə mba boʼo ubugə abú Tayitus akə afaʼa zəŋ kwi u ŋuw imbey imara afaʼa chuŋ zəŋ ifere ukab wu.

⁷ Akinine nu mbən mə imbey akə unó jum, nu amə akə ibeni, akə inayn, akə ikyay uno, akə fiŋ chuŋ ni iwere ba Nwiye foro akə iwuʼi nu mbən mə wuʼe ngwa, mbən zən kwi mbən mə nibə imbey akə anó imə saŋara ubugə.

⁸ Cha amə ghayn aŋu anó zəŋ inen ni kwi ayə sobo isobo. Ayə kaba iməg amə inji zənə mba wuʼi ba akə ita fiŋ jum akə inji zənə ba chini wuʼe anó ni were.

⁹ Mbən kyay ichuŋ zənə Asɨyisəg Yeso Kristo ghəy nu kaba kwi yə mə nə imbon asɨmə yə beŋe akə wa ukwaŋ da ngwən, da anjim umugə umə wa ukwaŋ mba yi mə nə imbon.

¹⁰ Ukɨy ŋunə ami naʼ inen akə anó zəŋ amə kwi, mbən mara anó zənə mbən ti ajigə. Mbən mə ba imbey inaʼ awere. Mbən mə ba imbey ighəy nigə.

¹¹ Mbən mara iwere ukab wu anji zənə mbən si num ungɨŋ itən fiŋ kwi mbən yi iwere. Mbən kaŋa ighəy nigə akə ughəy mbənə umə inen,

¹² damugə wa ŋunə umə nə fiŋ chuŋ iwere, Nwiye yi num aghəy zənə u naʼa akə inji zənə umə nə aghəy, akə ma akə inji zənə cha aghəy abú uŋwən.

¹³ Cha amə kaba aŋu kwi anó zəŋ zaba igun ba moʼ si ided igun inen. Ayə kaba amə kwi ba jum mə ichin ichin.

¹⁴ Akinine nu mbən mə nə ughəy nanaʼ, mbən naʼa ughəy abú umbənə u bəw da umi gha naʼ inen amaʼazənə mbən bəw. Mbən bə aghəy nigə, ba jum mbi mə ichin ichin.

¹⁵ Ayə ungɨŋ aŋwaʼanayn Nwiye kwi, “Cha wa ŋunə u fere ughəy nanaʼ mə ma nə ughəy mbənə ukoʼo abú uŋwən. Cha wa ŋunə u fere ughəy pipi mə ma nə ughəy nu ukweʼe.”

Mbə tom Tayitus a Koren

¹⁶ Mba yə naʼa yə beni ayə abú Nwiye nu ughəy kwi Tayitus mə nə fiŋ chuŋ iwere ngwən numugə yə mə nibə ina.

¹⁷ Cha yə beni ma aba anó zənə mba ghayn abú uŋwən, asɨmə umugə yə wuʼ ikaŋa iwere ngwən, yə zaʼa inen akə ighari ma.

¹⁸ Mba yə cha uŋwən nə unya chini nu ifere ba Kristo jum tana kyay uŋwən da inji zənə umə ghayn ukən chuŋ.

¹⁹ Ka ba nigə, ifere ba Kristo ijum si nibi cho uŋwən kwi u yeŋ aboʼo inja mba ŋuw naʼ awere zəŋ a Yerusanem. Mba yə ŋu naʼ boʼo iwumini Asɨyisəg foro da itey fiŋ chuŋ zənə imə ina.

²⁰ Mba yə kaba kwi ka wa moʼ ghayn ma kwi cha mba mə tana yimə uneʼe ŋunə mba mə ŋu naʼ,

²¹ damugə mba yə kaba ighəy anó nu akoʼoro ifigi Nwiye foro ifigi ba.

²² Anigə, mba yi nibi cha ungwa unya anóm nə úŋwən. Unya anóm ŋunə mba si zweʼe uŋwən ighari nanaʼ zən kwi yə kaŋa wuʼ anó ni were akə unó nanaʼ. Yə wuʼ anó ni were chigə umugə yə dey wuʼ. U yə aghəy nigə damugə yə si zi fiŋ igun inen.

²³ Amə́ da Tayitus, uŋwən yə faʼa nə umugə anji zənə mba mə faʼa inen unoŋ. Amə da umba unya, amə ifere ba Kristo i tom uŋwən. Imə ghəy kwi Kristo mə nə iwumini.

²⁴ Anigə mbən tey anwini abú ba mbəŋ kwi mbən wuʼ úŋwən, nibi tey a ton zənə mba mə komo iguwə da ngwən, boʼo ifere ba Kristo izən.