2 Korintiyans 7 - Aŋwaʼanayn Uso Fey

¹ Umbəŋ buŋ nu awuʼi kwaʼa azəd, umugə Nwiye kaʼa unó mbəŋ ina, anigə mba ton unó iboŋ mbənə umə ighəy kwi ka nyə̂ inyo nə azugə zayn ma ichomo akə uzayn zayn. Mba chomo akə anó zayn zayn ŋu mara numugə mba mə wumini Nwiye.

Pol wuʼe ma akə nji zənə ba Kristo mbənə umə Koren beni Nwiye

² Mbən tana asin ina ungɨŋ itən fiŋ. Cha mba aghəy ngwa anó iboŋ abú wa moʼ. Cha mba fibiri ngwa wa moʼ. Cha mba tama ngwa wa moʼ da ijəg injim.

³ Cha mba mə ghayn ngwa anó zəŋ da izi usaʼa igun inen damugə mə si nibi ney ghayn kwi mbən yə ungɨŋ ita fiŋ. Mba yi ku unoŋ nibi tənə unoŋ.

⁴ Inyi fiŋ yə kaŋa igun inen. A yə beʼere inyo da ngwən. Mbən kaŋa zi ikay iniŋ. Ayə noro kwaʼa inji chuŋ ungɨŋ ingəʼ jum, iwuʼi nu ichigə abugə sugi ungɨŋ inyi fiŋ da ngwən.

⁵ Kaba amaʼazənə mba pey Masedoniya, cha mba di zwere, asɨmə mba yə zəw ingəʼ akə ikudi inji jum. Mbá mə́ nibə taŋa nə ba. Ibo nibi sugi ungɨŋ ita fiŋ.

⁶ Asɨmə Nwiye ŋunə umə nigərə ba mbənə unó mə chigə úŋwən, zi ikay ina umugə Tayitus zaʼa.

⁷ Akə aba da mugə Tayitus zaʼa nu yə zi ikay ina, yə ghayn ina umugə mbən mə kaba i zən aŋu. Yə ghayn da mugə mbən mə nə akənə akə unó mbənə mbən mə ighəy. Yə nibi ghayn da umugə mbən mə zi ikay ighəy unó mbən mə́ ghayn inen. Unó mbəŋ aghəy iwuʼi sugi ungɨŋ inyi fiŋ.

⁸ Kanə aŋwaʼanayn zənə mə́ cha inen ghəy kwi akənə sugi ungɨŋ itən fiŋ, cha mə di kənə aŋu da ngwən. Ka di mə kwi mə mi kənə akə ŋwə̂ amaʼ moʼ, mə mi kənə damugə mə zən kwi yə ghəy akənə sugi ungɨŋ itəŋ fiŋ akə amaʼa moʼ.

⁹ Akinine, ayə wuʼe aŋu akə ma da mugə akənə sugi ungɨŋ itəŋ fiŋ, ayə wuʼe aŋu damugə akənə wu ghə kwi mbən beŋe itən fiŋ. Umugə ukudu akənə ŋunə Nwiye kaba sugi ungɨŋ itən fiŋ, cha mba mi aghəy ngwa anó iboŋ moʼ akaʼa injən.

¹⁰ Ukudu akənə ŋunə Nwiye kaba yə aghəy kwi ba beŋe fiŋ uma. Ayə aghəy kwi ba duw angəʼ. Cha ba mi kənə da anó zəŋ. Asɨmə ukudu akənə ŋunə ba ungɨŋ isəg kaba yə aghəy kwi ba ku.

¹¹ Mbən zən aghəy zənə ukudu akənə ŋunə Nwiye kaba si aghəy ungɨŋ inen. Mbə́ si aghəy ikay nu ichigə abugə ungɨŋ unó moʼ mbənə mbə́ zi igun inen. Mbə́ isə itəm abú wa moʼ ŋunə ugow unó. Mbən mə goro kwi Nwiye yi zi ingəʼ igun inen. Mbə kaba kwi a zaʼa aboʼo injən. Mbən zi ikay ni aghəy unó mbənə ukoʼoro. Mbən nibi chi wa ŋunə u gow anó. Akə unó jum, mbən si tey kwi cha mbən di gow anó moʼ.

¹² Ka di ma kwi mə ŋwaʼanayn inen, cha mə́ ŋwaʼanayn da wa ŋunə ugow anó, kə da wa ŋunə ugow anó abú uŋwən. Mə́ ŋwaʼanayn da ighəy azayn ifigi Nwiye umugə mbən kaŋa iwuʼe ngwa.

¹³ Anó zəŋ si kwaʼa zi ikay ina. Amə anji zənə mbən zi ikay ina, Mba yə nibə kaŋa wuʼe ngwa numugə iwuʼi sugi ungɨŋ fiŋ Tayitus damugə umba jum aghəy fiŋ ma zuti.

¹⁴ Mə́ mə komo iguwə abú uŋwən da ngwən, anigə cha mbən naʼa ngwən indere atəw iniŋ. Unó jum mbənə mba mə ghayn inen amə unoʼ asiʼ, anigə anó zənə mba komo iguwə ifigi Tayitus da ngwən si nibi du akə asiʼ.

¹⁵ U yə wuʼe ngwən akinine chigə umugə yə mə wuʼe, amara mə umugə u kono umugə umbən jum mə wumine uŋwən, nibi kono umugə mbən num uŋwən nə ibó foro iwumini kyayn.

¹⁶ Mə kaŋa wuʼe aŋu damugə mə niŋi inyi fiŋ igun inen akə unó jum!