2 Korintiyans 6 - Aŋwaʼanayn Uso Fey

¹ Umugə mba faʼa akə ibumi nə Nwiye, mba yə boʼo ubugə inen kwi, ka mbən beni ngwən kwi ichuŋ zənə Nwiye ghəy inen ichigə ibuw.

² Nwiye ghayn kwi, “Amaʼazənə amaʼ koʼo kwi ighəy ichuŋ, Mə zəw anó zənə mbən ghayn. Mə were ngwən Aney zənə mə́ mə chiyə ba angəʼ.” Mə ghayn inen kwi akinine amə amaʼazənə Nwiye mə aghəy ichuŋ. Akinine amə amaʼazənə Nwiye mi chi ba angəʼ.

³ Cha mba mə kənə inji abú wa moʼ boʼo ka ughayn ma anó iboŋ da afaʼa zənə mba mə faʼa.

⁴ Asɨmə ichomo ni ba faʼa Nwiye, mba yə tey kwi mba mə ba faʼa chuŋ akə ikudi inji jum. Mba yə nyi ungɨŋ ingəʼ, mba yə zəw ikudi ingəʼ jum, unó mbə nyə̂ ngwa, unó iboŋ nanaʼ mbə́ nyi igun na.

⁵ Umbə́ somo ngwa. Umbə́ zi ngwa andəŋ. Umbə bow inum da izwere ngwa. Mba yə tumə inyo ungɨŋ afaʼa, mba yə chomo nu cha mba mə bunə foro cha ijəg.

⁶ Mba yə tey kwi mba mə ba zayn zayn. Mba yə tey kwi mba kyay unó. Mba yə yimə fiŋ. Mba yə aghəy ichuŋ. Azugə zayn zayn yə ungɨŋ na. Mba yə wuʼe ba nə ita fiŋ jum.

⁷ Mba yə ghayn inayn asiʼ. Mba yə aghəy unó akə ikay nu Nwiye naʼa na. Unó mbənə u təm ikoʼoro chomo nu ubey ibêd ŋunə mba yimi abugə jəgi izoŋ, nibi yimi abugə ikyabay ikən inyo.

⁸ Ba moʼ mbə wumini ngwa, mbi moʼ tebe ngwa. Ba moʼ mbə́ ghayn unó iboŋ da ngwa, mbi moʼ ghayn unó chuŋ da ngwa. Ba moʼ mbə ghayn kwi cha mba mə ba mbənə umə inayn asiʼ, asɨmə mba yə kaŋa inayn asiʼ.

⁹ Ba moʼ mbə ghəy i na ni kwi cha u di kyay ngwa, asɨmə mbə tana kyay ngwa. Ba moʼ mə ghəy uniy ni kwi ba si ku asɨmə mba bugə ngwa ika. Ba moʼ mbə somo ngwa asɨmə cha umə zwere ngwa.

¹⁰ Ba moʼ mbə ghəy ina chomo ni kwi mba mə ba nə akənə, asɨmə mba yə wuʼe ngwa ighari jum. Ba moʼ mbə ghəy ina chomo ni kwi mba mə ba ukwaŋ, asɨmə mba yə ghəy kwi ba nanaʼ mə nə imbon. Ba moʼ mbə ney ngwa ni kwi mba mə be mbənə cha ughəy, asɨmə mba yə nə ughəy jum.

¹¹ Umbəŋ uzi Koren! Mba si inayn inen asaŋ asaŋ, mba si fiʼe ita fiŋ inen.

¹² Cha inwi akə inji zənə mba wuʼi ngwən, asɨmə cha mbən di wuʼe ngwən ngwa anji zənə mba wuʼi ngwən.

¹³ A yə inayn inen akinine chomo ni kwi mbən mə umbəŋ buŋ. Anigə anji zənə mba fiʼe ita fiŋ inen, mbən nibi fiʼi itən ina.

Uchere da anó ni bumə ba mbənə cha u di kyay Nwiye

¹⁴ Mbən mə́ jəgə ngwən akə anó feyn ni ba mbənə cha udi kyay Nwiye. Amə anó ingiya amə abə anó zənə a təm ikoʼoro nə anó zənə cha adi təm ikoʼoro? Amə anó ingiya amə abú azayn zayn nə imbiri?

¹⁵ Amə ingiya amə aghəy Kristo nə debere mə akə anó feyn? Amə anó ingiya amə abú wa ŋunə ubeni Kristo nə wa ŋunə cha udi beni Kristo?

¹⁶ Amə anó ingiya amə abú imbəŋ Nwiye nə unwiye ibuw ibuw? Mba mə imbəŋ Nwiye ŋunə umə ika. Nwiye ma ambuŋ ghayn kwi, “Ayi chomo nə umbəŋ Ba nibi yeŋ akaʼa uma. A yi mə Nwiye uma, úŋwən yi mə umbəŋ ma.”

¹⁷ Asɨyisəg ghayn kwi, “Mbən duw akaʼa uma Anigə ighaba aboʼo úŋwən. Ka mbən mə ngwən nə anó moʼ ighəy nə aghəy zənə cha adi zayn Anigə ayi num ngwən.

¹⁸ Ayi mə uŋwən mbaʼ Anigə mbən yi mə umbəŋ buŋ. Buŋ anóm nə buŋ ayey. Zəŋ amə anó zənə Asɨyisəg Nwiye koʼ ghayn.”