2 Korintiyans 5 - Aŋwaʼanayn Uso Fey

¹ Mba kyay kwi umbə saʼa usɨgə mbənə mba chomo ungɨŋ akə igun isəg, nu amə ita nyə̂ inyo, anigə mba yə nə ina moʼ azobo nu amə Nwiye chimi, nu akə ma ba inyoŋ atəw chimi. Na wu yi tənə akə ighari feyn.

² Mba yə sow uchəw zuʼe ungɨŋ nyə̂ inyo zəŋ, anigə mba yə kaba kwi Nwiye naʼa nyə̂ inyo fey zənə imə azobo ina.

³ Mba bə mə nə nyə̂ inyo fey zəŋ, nji ayi mə cha ngwa nu cha nyə̂ inyo.

⁴ Amaʼazənə mba mə bugə ungɨŋ nyə̂ inyo zəŋ, mba yə isow uchəw zuʼe aton ughəy mbənə umə idere iná. Akəma kwi mba yə kaba i waʼ anun nyə̂ inyo zəŋ. Mba yə kaba amə kwi Nwiye naʼa nyə̂ inyo fey ina, boʼo nyə̂ inyo wu mi tənə koŋ boʼo ibeŋe izənə imə kuw.

⁵ Nwiye si tana ngwa kwi mba yə mə nə nyə̂ inyo fey. Anigə yə si naʼa Azugə ma ina. Azugə wu yi aghəy mba mə nə aghəy zənə yə si kaʼ kwi iyi naʼ iná.

⁶ Anigə mba yi beni akə fiŋ jum kwi unó mbəŋ amə unó asiʼ. Mba nibi kyay kwi mba bə mə ungɨŋ nyə̂ inyo zəŋ, nji mba yə agha asa abú Asɨyisəg.

⁷ Mba yə ikay da ibeni, akə ma da ughəy mbənə mba mə zənə.

⁸ Aŋ, unó mbənə mba beni amə unó asiʼ, anigə mba yə kaba sayn nyə̂ inyo zəŋ da ichomo ungɨŋ nyə̂ inyo fey nə Asɨyisəg.

⁹ Kanə mba mə ungɨŋ nyə̂ inyo zəŋ, kə amaʼazənə mba si sayn nyə̂ inyo zəŋ, anó zənə mba kaba amə kwi fiŋ Asɨyisəg boŋo.

¹⁰ U mba jum mba yi təm ifigi Kristo kwi u saʼa ngwa, boʼo wa feyn feyn num aghəy zənə koʼo abú uŋwən. U yi num ichuŋ kə u num ibɨy akə inji zənə yə́ mə́ faʼa amaʼazənə yə mə akə nyə̂ inyo zəŋ aki igun isəg.

Nwiye yi aghəy azi ni ba jum anjim Kristo

¹¹ Mba kyay aton da anó ni wumini Asɨyisəg, anigə mba ni zi ikay ighəy kwi ba chini nibi kyay. Nwiye si kyay ngwa ŋu mara, anigə mə kyay kwi mbən si nibi kyay anó zəŋ itən fiŋ zayn.

¹² Cha mba mə kaba igha ighayn inen kwi mba mə ba faʼa chuŋ, asɨmə mba yə naʼa apan inen kwi mbən komo iguwə da ngwa, da mbən mi ywiri inayn abú ba mbənə umə komo iguwə da unó mbənə ba mə zənə, nu akə ma umbənə umə ungɨŋ fiŋ.

¹³ Umba utəw bi ki koʼoro ma, nji cha udi koʼoro da Nwiye. Umba utəw bə koʼoro nji mbə koʼoro da ngwən.

¹⁴ Aghəy zənə amə tumə ngwa amə iwuʼi zənə Kristo wuʼe ngwa, damugə mba kyay kwi wa feyn ku igun utəw ba jum, anigə ba jum si nibi ku.

¹⁵ Yə ku igun utəw ba jum. Yə ku da ka ba mbənə umə ikay ugha chomo uma akə ighari uma. U chomo amə da uŋwən ŋunə yə kuw, Nwiye zəmə uŋwən.

¹⁶ Anigə inoʼo akinine, cha mba mə gha ney wa anji zənə ba inyoŋ atəw mə iney. Ka nə di ma kwi mba si noʼo ney Kristo anji zənə ba nyoŋ atəw mə ney, asɨmə cha mba mə gha iney uŋwən nigə.

¹⁷ Ayə tey kwi wa moʼ ŋunə umə akə ibumi nə Kristo, uŋwən si məŋi wa fey. Unun unó si chigə, unó fey si zaʼa.

¹⁸ Unó mbəŋ jum noʼo abú Nwiye. Yə́ chigə anjim Kristo igha ibum ba bana ma akə uzi ma. Yə si naʼa afaʼa zəŋ iná kwi ba sə bumə ba chini akə uzi ma.

¹⁹ Anigə amə kwi Nwiye chigə anjim Kristo ibumi ba bana ma kwi amə uzi ma. Cha yə sey ma ifana unó ba igun uma. Yə zi ukən da anó ni igha ibumi ba uma ungɨŋ ita inya ubugə kwi mba sə ghayn abú ba.

²⁰ Mba mə ba nu mba təm akə ukum Kristo. Nwiye yə chigə ita anjim iboʼo ubugə abú ba. Anigə mba yə boʼo ubugə inen akə ukum Kristo kwi mbən beŋe akə uzi Nwiye.

²¹ Nwiye ghə́y kwi Kristo mə wa unó iboŋ nu amə cha anó iboŋ moʼ igun ma boʼo akə ibumi nə uŋwən mba yi təm ikoʼoro ifigi Nwiye.