2 Korintiyans 4 - Aŋwaʼanayn Uso Fey

Imbon zənə imə ungɨŋ ikɨŋ isey

¹ Nwiye si diri ngwa naʼ afaʼa zəŋ ina anigə ká ita fiŋ ibo ma.

² Mba si ton unó mbənə ba mə ghəy anjim anjim nu amə unó mbənə umə naʼa indere atəw. Mba si ton ighəy uburi unó kə ighayn inayn Nwiye figi. Asɨmə umugə mba mə ighayn asiʼ asaŋ asaŋ mba yə tey kwi ba kyay kwi unó mbənə mba mə ighəy amə unó nu u boŋo ifigi Nwiye.

³ Abə mə kwi u mbə kənə ukən chuŋ, nji umbə kənə amə abú ba mbənə u nim.

⁴ Mbən kyay kwi Nwiye ŋunə umə unɨŋ isəg zəŋ si kən fiŋ ba mbənə cha u beni Kristo boʼo ka u zən uma uzayn zayn akə ukən chuŋ da Kristo. Kristo chomo aba ni Nwiye.

⁵ Cha mba mə ghayn ngwa amə da ita inyo. Mba yə ghayn amə kwi Yeso Kristo amə Asɨyisəg. Mba yə nibi ghayn kwi mba mə isob inen da Yeso.

⁶ Nwiye ŋunə yə́ ghayn kwi, “Uzayn zayn tey ungɨŋ usin firi,” Mə nibə uŋwən ghəy uzayn zayn tey ungɨŋ ita fiŋ da mba kyay uzayn zayn Nwiye nu utey ifigi Yeso.

⁷ Asɨmə mba yə nə imbon zəŋ ungɨŋ ikyiŋ isəy da itey kwi ikay kyayn wu amə iyi Nwiye, akə ma inja.

⁸ Ingəʼ yə inyi igun ina akə uba jum foro akə ikudi inji jum asɨmə cha imə zwere ngwa. Umba utəw mə bure asɨmə cha umba mə ibo.

⁹ Ba mbə nwini ita inya ughəw asɨmə cha Nwiye waʼ ma ngwa. Ba mbə ibiya ngwa itum asəy asɨmə cha umə zwere ngwa.

¹⁰ Ba mbə kaba izwere ngwa ighəy kwi mba beʼe ikudi iwu ŋənə Yeso kuw ungɨŋ ita nyə̂ inyo da ba mi zən itəni ma ungɨŋ ina.

¹¹ Amaʼazənə mba mə ikay, mba yə uchəw iwu akə umaʼa jum da Yeso, boʼo ba zən itəni ma ungɨŋ ita nyə̂ inyo tənə imə ikuw.

¹² Anigə mba yə uchəw iwu ighari jum boʼo mbən jəg itəni.

¹³ Mba yə nə ukudu ibeni feyn nə uŋwən ŋunə uŋwaʼanayn kwi, “Mə beni anigə mə si nayn.” Mba nibi beni anigə mba yə inayn.

¹⁴ Mba kyay kwi Nwiye ŋunə yə́ zəmə Asɨyisəg Yeso yi nibi zəmə ngwa aboʼo Yeso. Uyi num ngwa nə umbən ŋu ifigi ma.

¹⁵ Unó mbəŋ jum amə da iwere ngwən da ichuŋ Nwiye zənə i saŋa ŋu abú ba nanaʼ, i yi ghəy kwi ba naʼa yə beni ayə abú Nwiye boʼo iwumini uŋwən.

Mba bə beni, mba yi chomo anji chuŋ

¹⁶ Cha ita fiŋ mi ibo, ka di mə kwi ita nyə̂ inyo tə chara ŋuw. Asɨmə Nwiye yə naʼa itəni ifey i na uney jum.

¹⁷ Cha ingəʼ kukuŋe zəŋ nu mba mə zəw mi tənə. I yə tana ngwa kwi u naʼa iwumini zənə itənə koŋ i na. Iwumini wu yi chigə ingəʼ zəŋ jum.

¹⁸ Anigə amə kwi cha mba mə iney ughəy mbənə ba mə zənə. Mba yə ney amə umbənə cha ba mə zənə, damugə ughəy mbənə ba mə izənə umbə chomo aba akə ŋwə̂ amaʼ moʼ asɨmə umbənə cha ba mə zənə umbi tənə koŋ.