2 Korintiyans 3 - Aŋwaʼanayn Uso Fey

Ba faʼa ungɨŋ uso fey

¹ Mba waʼa gha komo ita iguwə umba umba kwi mba mə ba faʼa chuŋ? Kə mba waʼa kaba numugə ba moʼ mə ghəy kwi mba ŋwaʼanayn aŋwaʼanayn da ngwa, da ba beni kwi mba mə ba faʼa chuŋ?

² Umbən mboŋ mə umba uŋwaʼanayn nu u ŋwaʼanayn ungɨŋ ita fiŋ boʼo ba jum bə foŋ u kyay anó zənə amə ungɨŋ.

³ Mba yə tey kwi mba mə aŋwaʼanayn zənə Kristo ŋwaʼanayn anigə itom ngwa inen nə uŋwən. Cha yə ŋwaʼanayn ma amə akə uchaʼa ŋwaʼanayn, yə ŋwaʼanayn amə akə Azugə Nwiye ŋunə umə ikay. Cha yə ŋwaʼanayn ma amə igun uba atey. Yə ŋwaʼanayn amə ungɨŋ fiŋ ba.

⁴ Mba yə ghayn ney damugə mba chigə anjim Kristo izi fiŋ igun Nwiye.

⁵ Cha mba mə ghəy unó mbəŋ akə inja ikay. Amə Nwiye naʼa ikay inen kwi ba ghəy.

⁶ Yə si ghəy kwi mba koʼo ifaʼ ungɨŋ uso fey. Cha uso fey wu mə ma unoʼo nu u ŋwaʼanayn. Uso fey wu amə azugə. Unoʼo mbənə uŋwaʼanayn u mbə zaʼa nə iwu asɨmə azugə yə naʼa itəni.

⁷ Unoʼo mbənə mbə tugə igun uba atey nu mbə zaʼa nə iwu, tə́ mə́ nə uzayn zayn. Anigə tə ghəy kwi ka ba Izre ney uma ifigi Mose anji zənə yə́ mə́ bigə. Uzayn zayn wu mə məŋərə nimə.

⁸ U zayn zayn ŋunə bə mə́ tey ney, nji ka unó mbənə Azugə zayn zayn ghəy mi zaʼa nə uzayn zayn ŋunə u tey chigə abugə?

⁹ Unó mbənə umə zi usaʼa igun ba bə zaʼa nə uzayn zayn, nji azənə amə zaʼa nə unó mbənə utəm ikoʼoro mi zaʼa nə uzayn zayn ŋunə u chigə abugə?

¹⁰ Amə asiʼ kwi ghəy zənə akweʼe mə nə uzayn zayn si nim ma da uzayn zayn ŋunə u chigə abugə.

¹¹ Aghəy zənə amə nimə bə zaʼa nə uzayn zayn, nji ghəy zənə atənə koŋ si zaʼa nə uzayn zayn ŋunə u chigə abugə.

¹² Umugə mba niŋi ita ikono igun anó zəŋ, mba yə ghəy unó akə fiŋ kaka.

¹³ Cha mba chomo ngwa ni Mose nu yə num ndwi ikəbərə ifigi awu da ka ba Izre zən uma uzayn zayn ŋunə umi nim.

¹⁴ Asɨmə fiŋ uma si tu. Ipey akə̂choŋ, umbə foŋo aŋwaʼanayn anum uso, ndwi wu yə kəbərə fiŋ uma. Aba da mugə mba mə akə anó feyn nə Kristo nu amə ghəy u chi ndwi wu.

¹⁵ I pey akə̂choŋ, amaʼazənə umə foŋo aŋwaʼanayn unoʼo Mose, ndwi wu yə kəbərə fiŋ uma.

¹⁶ Asɨmə wa bə beŋe ŋuw abú Asɨyisəg, uyi chi ndwi wu.

¹⁷ Akinine Asɨyisəg mə Azugə wu. Anigə asin zənə Azugə Asɨyisəg mə awu, ba mbə akə ighari uma.

¹⁸ Umba jum mbənə cha ndwi kən ita ifigi mba zən uzayn zayn Asɨyisəg numugə umə iməŋərə chomo ni kwi amə ungɨŋ maneŋ. Mba chomo nə uŋwən numugə mba mə bigə ŋuw imbey. Uzayn zayn wu yə abú Asɨyisəg ŋunə amə Azugə.