2 Korintiyans 2 - Aŋwaʼanayn Uso Fey

¹ Mə si num ungɨŋ inyi fiŋ kwi cha ami gha wene zaʼa inen, da ighəy mbən mə nə akənə.

² Abə ghəy mbən mə nə akənə, nji ingwa chini mə awu nu umi ghəy iwuʼi sugi ungɨŋ inyi fiŋ chigə akə umbən mbənə a ghəy mbən mə nə akənə?

³ Mə ŋwaʼanayn aŋwaʼanayn zəŋ akə inji zənə a ŋwaʼanayn, damugə abə zaʼa, ka ba mbənə umi ghəy kwi iwuʼi sugi ungɨŋ inyi fiŋ beŋe gha ghəy uma akənə mə ungɨŋ inyi fiŋ. Mə kyay asiʼ da umbən jum kwi iwuʼi bə sugi ungɨŋ inyi fiŋ, iyi nibi sugi ungɨŋ itən.

⁴ Amaʼazənə mə́ mə ŋwaʼanayn aŋwaʼanayn wu inen, mə́ mə kaŋa kənə, inyi fiŋ nibə toboro aŋu, isiy sugi ungɨŋ inyi aghɨ. Cha mə di ŋwaʼanayn da mbən mi mə nə akənə. Mə ŋwaʼanayn boʼo mbən kyay kwi mə wuʼe ngwən kwaʼa azəd.

Mbən waʼ unó iboŋ wa ŋunə u gow anó inen

⁵ Wa moʼ bə aghəy fiŋ wa chini ibɨy, cha u di aghəy ma nigə amə iniŋ. Yə chigə akə inji jum aghəy inen umbən jum. Cha ami gha mə komo da anó zəŋ.

⁶ Ingəʼ zənə ba nanaʼ akaʼa injən zi igun ma si koʼ.

⁷ Asɨmə akinine, mbən waʼa unó iboŋ ma nibi zi ikay abú uŋwən boʼo ka u kənə ma azəd akə inji zənə ami ighəy kwi ibeni ma ibó.

⁸ Anigə ayə boʼo ubugə inen kwi, mbən tey abú uŋwən kwi mbən bugə iwuʼe uŋwən.

⁹ Mə ŋwaʼanayn aŋwaʼanayn zəŋ da izweʼe ngwən izən kwi mbən mə wumine aŋu akə unó jum.

¹⁰ Mbən bə waʼ unó iboŋ wa moʼ, mə nibi waʼ. Mə si waʼ anji zənə mbən si nibi waʼ. Mə si waʼ ifigi Kristo da ngwən.

¹¹ Mə aghəy nigə boʼo ka Satan chigə ma ngwa akə iwe, damugə mba kyay unó iboŋ anjim umugə ba mə taŋa.

Anó zənə yə toboro fiŋ Pol a Trowas

¹² Amaʼazənə mə́ ŋu Trowas ighayn ukən chuŋ da Kristo awu, Asɨyisəg naʼa apan iniŋ kwi afaʼa abú uŋwən.

¹³ Cha inyi fiŋ di zuti damugə cha mə zən aŋu ungwa unya Tayitus awu. Anigə mə naʼara abú ba noʼ ŋuw Masedoniya.

¹⁴ Mba naʼa yə beni ayə abú Nwiye kwi anji zənə mba mə akə anó feyn nə Kristo, uyə aghəy kwi mba yeŋ nə uŋwen chomo ni ba mbənə u chigə berd. U yə aghəy kwi mba saŋa unó mbənə mba kyay da Kristo ungɨŋ isəg jum. Unó wu chomo ni ifoyi chuŋ.

¹⁵ Mba chomo nə aghəy zənə amə nyoʼoro ifoyi chuŋ nu Kristo naʼa abú Nwiye. Mba yə nyoʼoro ifoyi chuŋ akaʼa ba mbənə Nwiye chi angəʼ foro akaʼa ba mbənə u mə nimə.

¹⁶ Abú ba mbənə u mə nimə, ifoyi awu yə zwere ba. Abú umbənə u duwi angəʼ, ifoyi wu yə naʼa itəni. Amə ngwa u kaŋa ikoʼ ifaʼa ukudu afaʼa ŋunə?

¹⁷ Cha mba di chomo ngwa ni ba nanaʼ mbənə u num inayn Nwiye ni aghəy iwe awu da ijəg injəm. Mba yə ghayn asiʼ akə ita fiŋ jum ifigi Nwiye numugə mba mə akə anó feyn nə Kristo. Amə Nwiye ma ambuŋ tomo ngwa kwi mba ghayn.