2 Korintiyans 12 - Aŋwaʼanayn Uso Fey

Pol zən ughəy anjəm nibi zən ughəy mbənə Nwiye tey abú uŋwən

¹ A yi komo iguwə ka di ma kwi cha injim awu. Asɨmə ayi ŋu imbey ighayn unó mbənə mə zən ungɨŋ ukaŋ nibi ghayn umbənə Asɨyisəg tey iniŋ.

² Mə kyay anóm Kristo moʼ nu utuʼ si chigə ighum cho kyugə nu Nwiye aghəy uŋu azobo zənə achigə uzobo jum. Kə yə ŋu akə inyə̂ inyo kə yə ŋu akə azugə cha adi kyay, amə Nwiye kyay.

³ Mə kyay kwi Nwiye aghəy anóm wu ŋu Paradayis. Cha adi kyay kwi kə yə ŋu akə nyə̂ inyo kə yə ŋu akə azugə aba Nwiye kyay.

⁴ Mə kyay kwi yə ŋu a Paradayis pey yi zəw anó nu cha amə aghəy wa ghayn, nu amə anó nu cha u beni kwi wa inyoŋ atəw u ghayn.

⁵ A yi komo iguwə da anóm ŋunə, asɨmə cha ami komo iguwə da inyi inyo. Ayi komo iguwə aba da unó mbənə u tey kwi mə ibo.

⁶ A bə mə kaba ikom iguwə, cha ami mə aneŋ damugə ami ghayn asiʼ. Asɨmə cha ami komo iguwə da ka wa moʼ kono ma kwi mə chigə wa ŋunə amə uŋwən. U ney amə unó mbənə a mə ighəy kə umbənə amə ghayn.

⁷ Ighəy kwi ka amə beʼere aŋu inyo da u yere unó kyayn mbənə Nwiye tey iniŋ. Yə zi isɨgə ungɨŋ inyi inyo nu amə aghəy Satan tom kwi a chigə aŋu da ka amə beʼere aŋu inyo.

⁸ Mə boʼo ubugə abú Asɨyisəg ighari ita kwi u chiyə isɨgə zəŋ.

⁹ Asɨmə yə ywiri iniŋ kwi, “Ichuŋ zənə ghəy yə koʼ inigə damugə ngwə yi zən inyi ikay jum amaʼazənə ngwə mə ibo.” Anigə ayi tana ighayn da inji zənə amə ibo boʼo ikay Kristo mi chomo ungɨŋ iniŋ.

¹⁰ Amə a ton da Kristo, inyi fiŋ yə anji chuŋ da ughəy mbənə ughəy kwi a bo, u jimə aŋu, da inji zənə unó mi ikay, da inji zənə ba mə nwini itəŋ inya ughəw foro da inji zənə ingəʼ nanaʼ nyi igun iniŋ damugə amaʼazənə amə ibo ayi ikay.

Pol zi fiŋ igun ba Kristo mbənə umə Koren

¹¹ Mə si məŋe akə aneŋ! Amə umbən ghəy kwi ghəy nigə. Nji amə mbən mi ghayn kwi ayə faʼa akə inji zənə ikoʼoro. Ka nə amə ighəy atəw ukow, asɨmə ka mə chigə ba tom Kristo mbənə umə ghayn kwi mbə chigə umbi.

¹² Mə num iyimi fiŋ ighəy unwini unó, ighəy u yere unó, nibi ighəy unó kyayn kyayn akaʼa injən itey kwi amə wa tom Kristo asiʼ.

¹³ Mə́ waʼa aghəy anó moʼ ungɨŋ ifere ba Kristo chini nu cha adi ighəy inen? Nu aba kwi cha mə di naʼa ingəʼ inen kwi mbən were aŋu? Yə bə ibɨy, mbən waʼ umbəŋ unó iboŋ.

¹⁴ Ayə tana inyo izaʼa zən ngwən akə ighari iŋu pey akə ita. Cha ami naʼa ingəʼ inen damugə cha amə kaba ukab, ayə kaba amə ngwən. Akə ma buŋ umi naʼa ughəy abú mbaʼ foro abú ingó uma. Amə mbaʼ nə ingo umi naʼa ughəy abú buŋ.

¹⁵ Ayə kaŋa wuʼe aŋu inaʼ ughəy jum mbənə umə iniŋ nibi naʼa inyi inyo da ngwən. Mə wuʼe ngwən azəd, mbən waʼa nibi wuʼe aŋu aba pipi?

¹⁶ Mbən yi kaŋa beni kwi cha mə́ mə naʼa aŋu ingəʼ inen. Asɨmə ba moʼ injən akaʼa umbi ghayn kwi mə́ mə ighəy azom tama ngwən.

¹⁷ Mə́ waʼa chigə anjim wa moʼ akaʼa mbənə mə́ tom inen inguw ngwən da ijəg umbən ughəy?

¹⁸ Mə́ boʼo ubugə abú Tayitus kwi u zaʼa inen. Mə́ nibi tom ba Kristo chini inen. Tayitus waʼa inguw ngwən da ijəg aghəy moʼ inen? Mba waʼa faʼa akə azugə feyn nə uŋwən? Mbə waʼa ighəy unó akə inji feyn nə uŋwən?

¹⁹ Mbən waʼa kono kwi akə amaʼa zəŋ jum mba yə kaba ifeyn inja inyo inen? Mba yə inayn ifigi Nwiye ŋunə u aghəy kwi mba mə akə anó feyn nə Kristo. Umbəŋ uzi nu awuʼi kwaʼa azəd, ughəy jum mbənə mba mə ighəy amə ighəy kwi mbən təm ikay.

²⁰ Ayə goro kwi amaʼazənə ami zaʼa, cha ami zən ngwən akə nji zənə mə́ mə kaba kwi mbən məŋi. Ayə nibə goro kwi cha mbən mi zən aŋu akə inji zənə mbən mə kaba kwi a məŋi. Ayə goro kwi amaʼazənə ami zaʼa ba mbi mə nə ataŋara, umbi mə ighəy adey, umbi mə isə itəm, umbi mə tono inaʼ aghəy abú ba, umbi mə jimə uma, umbi mə iweŋ ukwey, umbi mə ibeʼere inyo, umbi mə nibə ighəy abúri.

²¹ Ayə goro kwi amaʼazənə ami gha zaʼa, Nwiye ŋunə amə wumini yi swiʼiri aŋu injən ifigi. Ayə nibə goro kwi ayi dey da ba nanaʼ mbənə mbə́ mə́ ighəy unó iboŋ. Asɨmə cha udi si beŋe fiŋ uma akə unyimi unó, akə ufibiri unó foro akə uburi unó mbənə mbə́ mə́ ighəy.