2 Korintiyans 10 - Aŋwaʼanayn Uso Fey

Pol nayn itey kwi afaʼa ma koʼ

¹ Umugə Pol mə num ukum Kristo ŋunə umə boro inyo nibə boro fiŋ boʼo ubugə inen. Ba moʼ injə akaʼa umbə ghayn kwi ayə swiʼiri inyo amaʼazənə amə injən ifigi asɨmə a yə nə fiŋ kaka amaʼazənə cha aŋu aboʼo injən.

² Ayə boʼo ubugə kwi abə zaʼa inen, ka mbən ney ngwən aŋu kwi ayə nə fiŋ kaka. Mə kyay kwi ayə nayn nə fiŋ kaka abú ba mbənə u kono kwi mba yə ghəy unó numugə ba ungɨŋ isəg mə ighəy.

³ Ka nə mba mə ungɨŋ isəg, asɨmə cha mba mə maʼa ngwa iberd numugə ba ungɨŋ isəg mə maʼa.

⁴ Cha ughəy iberd mbənə mba mə zoŋo awu mə ma ughəy iberd ba igun isəg. Amə ughəy iberd Nwiye ŋunə umə nə ikay ichigə isəg zənə ba bana ma mə ikay igun.

⁵ Mba yə numə ughəy iberd wu ney unó mbənə ba mə taŋa da úŋwən. Mba yə nibə numə iney unó jum moʼ mbənə umə numə ikən kwi ka ba kyay ma Nwiye. Mba yə numə ughəy iberd wu beŋe ikono jum, sə ghəy kwi mba wumini Nwiye.

⁶ Amaʼazənə mbən si tey kwi mbən yə wumini Kristo, Mba yi si zi ingəʼ igun ba mbənə cha umə wumini Kristo.

⁷ Mbən yi ney ughəy aba asaŋ asaŋ. Wa moʼ bə kyay kwi imə wa Kristo, u yi nibi kyay kwi mba mə nibi ba Kristo aba ni uŋwən.

⁸ Ka ba kwi mba yə komo iguwə da ikay zənə Asɨyisəg naʼa ina, cha umba utəw mi ided. Ikay wu amə kwi mba ghəy mbən təm ikay akə ma kwi mba ghəy itən fiŋ ibó

⁹ Ka chomo ma ni kwi ayə foŋoro ngwən nə umbəŋ uŋwaʼanayn,

¹⁰ damugə ba moʼ mbi ghayn kwi, “Uŋwaʼanayn mbəŋ nu amə ŋwaʼanayn umbə ka nibə ito fiŋ. Asɨmə amaʼazənə umə akaʼa inja, u yə boro, cha inayn ma mə yimə ma une.”

¹¹ Ukudu ba mbəŋ u kyay kwi unó mbənə mba ŋwaʼanayn amaʼazənə cha ngwa aboʼo injən, mba yə ghəy amaʼazənə mba mə aboʼo injən.

¹² Cha mba mə bəgərə ngwa ita inyo nə úŋwən moʼ mbənə umə komo iguwə kwi umbə faʼa chigə ba chini. Úŋwən amə uneŋ damugə u mə saʼa inyo uma nibə bəgərə inyo ma uma uma.

¹³ Amə́ da ngwa, cha mba mi komo iguwə chigə umugə mba mə kono. Asɨmə mba bə mi kom, mba yi kom pey akə unere faʼa ŋunə Nwiye naʼa inen nibi kom da inja faʼa akaʼa injən.

¹⁴ Cha mba chigə unere amaʼazənə mba zaʼa inen. Mba mə ba imbey izaʼa inen nə ukən chuŋ da Kristo.

¹⁵ Anigə cha mba mi komo ngwa iguwə da afaʼa zənə ba chini faʼa. Inyi kono amə kwi umugə injən beni kwey, inja afaʼa akaʼa inen yi mə nibə ikwey ŋuw imbey,

¹⁶ da mba mi mə nibə ghayn ukən chuŋ ŋuw ungɨŋ ubey chini. Cha mba mə kaba ikom ngwa iguwə da afaʼa zənə ba chini faʼa.

¹⁷ Ayə ungɨŋ aŋwaʼanayn Nwiye kwi, “Wa moʼ bə mə kaba ikom iguwə, U komo amə da anó zənə Asɨyisəg u ghəy.”

¹⁸ Cha Asɨyisəg di beni ma wa ŋunə u ghayn kwi yə faʼ chigə ba chini. U yə beni amə uŋunə u ghayn kwi yə faʼ afaʼa anji chuŋ.