2 Korintiyans 1 - Aŋwaʼanayn Uso Fey

Achaʼara

¹ Amə umugə Pol nu amə wa tom Yeso Kristo anji zənə Nwiye kabay, ŋwaʼanayn aŋwaʼanayn zəŋ. Ayə ŋwaʼanayn abú ufere ba Nwiye ŋunə umə Koren. Ayə nibi ŋwaʼanayn abú ba Nwiye jum mbənə umə aba abey zənə amə a Akayiya. Umugə ni Timoti nu amə ungwa unya mba yə chaʼara ngwən.

² Nwiye Mbaʼ nə Asɨyisəg Yeso Kristo aghəy ichuŋ inen nibi naʼ aborobod inen.

Pol naʼ yə beni ayə abú Nwiye

³ Mba yere Nwiye ŋunə amə Mbaʼ Asɨyisəg Yeso Kristo. Uŋwən mə Mbaʼ ŋunə umə diri ba. Uŋwən amə Nwiye ŋunə umə nigərə ba akə umaʼ jum.

⁴ Uŋwən yə nigərə ngwa akə umaʼ jum mbənə mba mə angəʼ, da mba mə nibə nigərə ba mbənə umə ungɨŋ ingəʼ. Mba nigərə uŋwən anji zənə Nwiye mə nibə nigərə ngwa.

⁵ Mba yə zəw ingəʼ akə unó nanaʼ anji zənə Kristo nibi zəw. Anigə anjim Kristo, Nwiye yi nigərə ngwa akə nji nanaʼ.

⁶ Mba bə mə zəw ingəʼ, nji mba yə zəw da ngwən, da Nwiye nəmə ngwən nibi chi ngwən angəʼ. Nwiye bə nigərə ngwa, nji uyi nibi nigərə ngwən, damugə Nwiye yi nigərə ngwən nibi chi ngwən angəʼ.

⁷ Cha aghəy moʼ mi chi ikono zənə mba niŋi igun inen damugə mba kyay kwi mbən yə zəw ukudu ingəʼ ŋunə mba nibi zəw, amə inji zənə Nwiye mə nigərə ngwən zənə yə nibi nigərə ngwa.

⁸ Umba unya, mba kaba kwi mbən kyay ingəʼ zənə mba zəw aba abey Esiya. Ikomo zənə mbə zi igun na kaŋa kwey nibi nded. Yə sí izwere ngwa. Yə aghəy mba kono kwi cha mba mi gha chomo ikay.

⁹ Amə asiʼ kwi yə chomo ni kwi mbə́ si sob kwi uzwere ngwa. Anó zəŋ aghəy boʼo ka mba zi ngwa umba unó ita inya ubugə. Yə aghəy boʼo mba zi umba unó amə inya ubugə Nwiye ŋunə umə zəmə ba.

¹⁰ Uŋwən ŋunə yə chi ngwa ungɨŋ ingəʼ iboŋ zənə yə mə kaba izwere ngwa, uyi ŋu imbey ichi ngwa. Mba si niŋi ita ikono igun ma kwi uyi chi ngwa angəʼ

¹¹ anji zənə mbən mə chaʼara Nwiye igun ina. Zigə ayi aghəy kwi ba nanaʼ naʼa yə beni ayə abú Nwiye da ngwa, damugə u yi ywiri chaʼara ba nanaʼ anigə, inaʼ ughəy mbənə umə chaʼara uŋwən igun.

Pol kyabay unó mbənə yə́ mə́ tana

¹² Akinine, anó zənə mba mə komo iguwə igun amə kwi, ita fiŋ zayn kwi mba aghəy unó zayn zayn, nibə aghəy unó mbənə amə umbi asiʼ anji zənə mba mə ungɨŋ isəg, amara mə akinine ŋunə mba mə akaʼa injən. Amə ichuŋ zənə Nwiye aghəy ina, akə ma iwe ba nyoŋ atəw aghəy kwi mba aghəy ney.

¹³ Mba yə ŋwaʼanayn aba unó mbənə mbən bə foŋ, u mbən utəw zayn. Mə kono kwi mbən yi tana kyay unó mbəŋ jum.

¹⁴ Cha mbən di si tana kyay ngwa. Mbən yi tana kyay umbən utəw zayn aney zənə Asɨyisəg Yeso mi gha wene zaʼa, da mbən komo iguwə da ngwa anji zənə mba mə komo da ngwən.

¹⁵ Amaʼazənə mə zən kwi anó zəŋ yi məŋi ney, ayə kaba kwi ayi nibi zaʼa inen boʼo mbən mə nə aborobod ighari bigə.

¹⁶ Mə́ mə kaba kwi a chigə yi zən ngwən amaʼazənə amə ŋuw Masedoniya foro amaʼazənə amə wene zaʼa, boʼo mbən were cha aŋu a ŋuw Judeya.

¹⁷ A waʼa taŋa anó zəŋ ni fiŋ bigə? A waʼa taŋa anó numugə ba nyoŋ atəw mə taŋa, nu mə mi ghayn kwi, “Aŋ, aŋ” Nibi beŋe ghayn kwi, “Indəʼ indəʼ” Aba ighari wu?

¹⁸ Nwiye yə kaʼa anó nibə ighəy, anigə cha inayn zənə mba mə ghayn inen mə ma anó ni ghayn kwi, “Aŋ” Kə anó ni ghayn kwi, “Indəʼ,”

¹⁹ Damugə kaba Yeso Kristo ŋunə amə Ŋwə̂ Nwiye yugə nu aba ufeyn, nu Silvanus nə Timoti ghayn da uŋwən akaʼa injən yə ghayn kwi, “Aŋ” Igha beŋe ghayn kwi, “Indəʼ” Aba ighari wu. Uŋwən ghayn aba kwi, “Aŋ.”

²⁰ Uŋwən yə aghəy kwi unó jum mbənə Nwiye kaʼa mbi du akə asiʼ. Amə aton zənə mba chigə anjim ma ghayn kwi, “Amə nigə” Da iyere Nwiye.

²¹ Amə Nwiye aghəy kwi umba nə umbən təm ikara anji zənə mba mə akə anó feyn nə Kristo. Yə si choʼo ngwa akə umbi ba,

²² izi anwini ma igun ina, nibi zi Azugə ma ungɨŋ ita fiŋ. Azugə wu amə ughəy mbənə yə kaʼa kwi iyi na ina.

²³ Ayə tiya Nwiye kwi amə uzənə iniŋ kwi aton zənə cha ami gha iwene zaʼa Koren amə kwi cha amə kaba ichiŋe itən fiŋ.

²⁴ Cha mba mə tinə ngwən kwi mbən beni unó mbənə mba mə ghayn. Mba kyay kwi mbən si zi fiŋ nə ikay igun Kristo. Asɨmə mba yə faʼa nə umbən da iwuʼi sugi ungɨŋ itən fiŋ.