2 Jon 1 - Aŋwaʼanayn Uso Fey

Achaʼara

¹ A mə umugə Jon nu amə wa ŋunə umə cha ufere ba Kristo ŋwaʼanayn aŋwaʼanayn zəŋ. A yə ŋwaʼanayn inigə ayey kyayn ŋunə Nwiye choʼo foro abú umbə buŋ. Mə kaŋa wuʼ ngwən kwaʼa akə asiʼ. Akə ma aba umugə awuʼe ngwən, ba jum mbənə u kyay asiʼ da Nwiye nibi wuʼ ngwən.

² Mə wuʼ ngwən damugə mba kyay asiʼ da Nwiye anigə asiʼ wu yə tənə ungɨŋ ina koŋ.

³ Nwiye Mbaʼ nə Yeso Kristo Ŋwə̂ Mbaʼ, ghəy ichuŋ inen, idiri ngwən nibi naʼ aborobod inen. Unó mbəŋ ujum umbi zaʼa ina damugə mba kyay asiʼ da Nwiye foro damugə mba wuʼe ngwa umba umba.

Mba ghəy unó nu u boŋo nibi iwuʼ umba unya

⁴ Mə kaŋa iwuʼ aŋu izəw kwi u mbən buŋ moʼ mbə beni asiʼ aba anji zənə mbaʼ ghayn ina.

⁵ Akinine, ayə boʼo ubugə inigə ungwə ayey kyayn, kwi cha ukɨy ŋunə amə ŋwaʼanayn inigə mə ma ukɨy fiy. Amə uŋunə mba si kyay iti amaʼazənə mba beni Kristo. Ukɨy wu mə kwi, mba wuʼe ngwa umba umba.

⁶ Iwuʼi zənə amə ghayn da iŋwen amə kwi mba siy ikɨy Nwiye. Ikɨy wu, numugə mba zəw inoʼ amaʼazənə mba beni Kristo amə kwi mba wuʼ umba unya.

⁷ A yə ghayn anó zəŋ damugə, mbə́ tama ba nanaʼ si saŋa ungɨŋ isəg. Cha mbə́ beni uma kwi Yeso Kristo zaʼa ungɨŋ isəg ni nyə̂ inyoŋ atəw. Ukudu wa wu amə a tama ba foro wa bana Kristo.

⁸ Mbən num azum da ka mbən nim ngwa ghəy zənə mbə si faʼ da ngwən. Asɨmə mbən ŋuw imbey ni faʼa da mbən mi mə nə u choʼo afaʼa isugi.

⁹ Wa ŋunə cha umə ghəy ma unó mbənə Yeso tey ina, asɨmə u yə ŋuw imbey imə ghəy amə unó mbənə cha mbə́ dí itey, cha uŋwən akə anó feyn nə Nwiye. Wa ŋunə umə ghəy unó mbənə Kristo tey u yə akə anó feyn nə Mbaʼ foro nə Ŋwə̂.

¹⁰ Wa moʼ bi zaʼa inen nu cha umə itey ukɨy uŋu, mbən i num ngwən uŋwən itən na kaba ichaʼara úŋwən.

¹¹ Wa moʼ ŋunə u num úŋwən anji chuŋ, yə foro nə úŋwən akə unó uzəg mbənə umə ghəy.

Inayn nwi

¹² A yə nə unó nanaʼ ighayn inen. Asɨmə, cha ami ŋwaʼanayn ungɨŋ aŋwaʼanayn. Mə kono amə kwi a yi zaʼa zən ngwən inayn ni wa feyn feyn da i wuʼi sugi ungɨŋ ita fiŋ.

¹³ Buŋ ungwa unya ayey ŋunə Nwiye choʼo u mbə chaʼara ngwən.