1 Timoti 6 - Aŋwaʼanayn Uso Fey

Unoʼo abú isob tənə ibeni Kristo

¹ Ba Kristo jum mbənə amə sob u naʼa iwumini abú umbaʼ afaʼa uma akə inji jum, da ka ba mbənə cha u di beni ma Kristo ghayn uma anó iboŋ moʼ da Nwiye foro da ukən chuŋ ŋunə mba mə ghayn.

² Ka isob tənə mbaʼ afaʼa uma mə ba nu u beni Kristo tebe uma mbaʼ afaʼa wu damugə úŋwən uma jum si məŋi ba Kristo. Asɨmə umbi faʼa abú úŋwən kwaʼa anji chuŋ chigə umugə umi faʼ abú mbaʼ mbənə cha udi beni Kristo. U mbi ghəy nigə damugə ba mbənə umi jəg injim akə afaʼa wu amə ba nu u beni Kristo nu uwuʼi kwaʼa azəd. Ngwə ni tey unó mbəŋ nibi zən kwi ba Kristo beni unó wu.

Uchere da ba mbənə u mə itey unó figi

³ Wa moʼ ŋunə u tey unó nu ukyaba akə umbəŋ, cha u beni ma inayn asiʼ zənə ungwa Asɨyisəg Yeso Kristo ghayn. Cha u nibi beni ma nə mbənə mba tey da inji zənə umba ba Kristo chomo.

⁴ U yi beʼere inyo. Cha u kyay ma anó moʼ. U yə ni fiŋ iboŋ. Fiŋ wu yə ghəy kwi u ni toŋo unó, nibə taŋa da inayn ukow moʼ. Itaŋara zəŋ yi zaʼa nə adey, nibə zaʼa nə anó ni ghaba ba, nibə zaʼa nə anó ni ghayn anó iboŋ abú ba chini, nibə zaʼa nə anó ni ikono anó iboŋ da ba chini.

⁵ Umbə nibə zaʼa nə anó ni ghəy kwi itaŋara nyi akaʼa ba mbənə cha anó chuŋ ungɨŋ fiŋ uma foro akaʼa mbənə cha umə ighayn asiʼ. Umbə kono kwi anó Nwiye amə nji amə ghəy u chigə da imə nə ukab.

⁶ Anó Nwiye yə ghəy kwi wa mə ni ukab. Ngwə yi mə nə ukab wu amaʼazənə ngwə bə beni kwi ghəy zənə amə nigə yə ikoʼ.

⁷ Aton mə kwi cha mba zaʼa ngwa ungɨŋ isəg nə ghəy moʼ. Cha mba mi num ghəy moʼ idu ungɨŋ isəg nə ngwən.

⁸ Anigə mba mbə mə nə ghəy jəgi nibi mə nə ndwi, mbə ikoʼ inen.

⁹ Asɨmə ba mbənə u mə kaba imə nə ukab u mbi nyi ungɨŋ akwaʼara anigə fwayn ungɨŋ atam zənə ami ghəy kwi u ghəy unó uneŋ nanaʼ nibi ghəy unó iboŋ mbənə nyə̂ inyo uma mə fana. Unó iboŋ wu mbə chiŋe úŋwən nibə ney úŋwən,

¹⁰ Damugə anó ni wuʼe ukab mə asin nu ukudu unó iboŋ jum mə duw akuŋ. Amə anó ni beni aboʼo ukab ghəy kwi ba nanaʼ wa ibeni, ighəy akənə sugi ungɨŋ fiŋ uma damugə umə zəw ingəʼ.

Pol zi ikay abú Timoti

¹¹ Amə ngwə, ungwə wa Nwiye, ton unó mbəŋ jum. Aghəy amə unó mbənə ukoʼoro, nibi ghəy amə u mbənə Nwiye kaba. Niŋe fiŋ igun Kristo, ni wuʼe ba, yimə fiŋ nibi mə nə iboro fiŋ.

¹² Kaŋa zoŋ anji chuŋ da ibeni zənə ngwə niŋi igun Kristo. Da ngwə mi mə nə ikay iyimə itəni zənə cha imi noʼo imey. Nwiye tiya ayə kwi ngwə jəg itəni wu amaʼazənə ngwə beni ifigi uzənə nanaʼ kwi ngwə mə wa Kristo.

¹³ Ifigi Nwiye ŋunə u naʼa itəni abú ughəy jum foro ifigi Yeso Kristo ŋunə yə́ ghayn asiʼ ifigi Pontiyus Palet, ayə ghayn inigə kwi,

¹⁴ ghəy unó jum mbənə Nwiye kaba pey anəy zənə ungwa Asɨyisəg Yeso Kristo mi wene zaʼa. Ngwə bə ghəy nigə, cha wa moʼ mi ghayn anó iboŋ moʼ da ayə kə zi anó moʼ igun inigə.

¹⁵ Akə amaʼazənə ami koʼ, Nwiye yi ghəy kwi Kristo wene zaʼa. Nwiye ŋunə ma mə wumine. Aba uŋwən mə tumə isəg nu amə ufon igun ifon foro Asɨyisəg igun mbə Asɨyisəg.

¹⁶ Aba uŋwən yugə ma zeʼe nu cha umi noʼo iku. Uŋwən yə chomo ungɨŋ uzayn zayn ŋunə cha amə ghəy wa tinə iyad. Cha wa noʼ di si kwaʼa zən uŋwən. Cha wa moʼ mi noʼo zən uŋwən. Isəg jum wumine uŋwən, uŋwən nibi tumə isəg ni ikay zənə i tənə koŋ. A mə nigə.

¹⁷ Amə da ba mbon mbənə umə akə ungɨŋ isəg zəŋ, ghayn abú úŋwən kwi ka umə beʼere ma inyo, kə iniŋ ma ikono uma igun mbon wu nu imə chigə chigi. U niŋi ikono ma amə igun Nwiye ŋunə u naʼ ughəy na ibuw ibuw. U yə naʼa da mba chomo inji chuŋ.

¹⁸ Ghayn abú úŋwən kwi u ghəy unó chuŋ ujum, nibi ghayn kwi u ni saŋara ubugə.

¹⁹ U bə ghəy unó mbəŋ, nji mbə si zi atiy kaka da ughəy mbənə umi mə awu amaʼ imbey. Umbi nibi jəg itənə zənə amə iyi asiʼ.

²⁰ Amə ungwə Timoti, tana yimə unó mbənə Nwiye zi ungɨŋ umbə ubugə. I zi ayə atəw akə inayn tənə cha anó moʼ aŋu ighəy ni Nwiye. Izi yə atəw akə inayn ukow moʼ tənə ba mə taŋa igun, nu umə ghayn kwi amə iwe, asɨmə akə ma iwe.

²¹ Ba moʼ mbə ghəy kwi umbə nə iwe. Zəŋ si ghəy kwi u waʼ ibeni zənə yə mə abú úŋwən. Nwiye ghəy ichuŋ inen umbən jum.