1 Timoti 5 - Aŋwaʼanayn Uso Fey

Ikɨy da ayey uti, da ba mbənə umə cha ufere foro da isob

¹ Ikyay ayə abú anóm mbənə nun chigə ayə, asɨmə nigiri uŋwən ni kwi amə ungwə mbaʼ. Yimə ingwaʼ ba ni kwi amə umbə unya anóm.

² Yimə mbə ayey mbənə usi nun chigə ayə chomo ni kwi amə umbi ingo. Ghəy unó akə uzayn zayn abú igwaʼ ayey ni kwi amə umbə unya ayey.

³ Wumini ayey uti mbənə cha wa mə iney úŋwən.

⁴ Asɨmə ayey uti bə mə ni buŋ kə buŋ buŋ ma, buŋ wu kə buŋ buŋ ma kweme anó ni aghəy anó zənə Nwiye anó kaba kwi ughəy abú unebey uma, ni gha naʼa ughəy abú mbaʼ foro abú mbaʼ ukyay uma. Ughəy ney damugə anó wu yi boŋ abú Nwiye.

⁵ Ayey uti ŋunə cha wa imə iney uŋwən, nu umə ma zweʼe, si niŋi ikono ma igun Nwiye. U yə ŋuw imbey ni chaʼara Nwiye ufəb nə ingom biri ughəy abú ŋwən.

⁶ Ayey uti ŋunə umə jəgə isəg si ku, ka nə di ma kwi uyə bugə ika.

⁷ Ghayn unó mbəŋ a ghayn inigə da ka wa moʼ ghayn ma anó iboŋ moʼ igun uma.

⁸ Wa bə ton imə iney inya ma, amara mə ba ungɨŋ unebey ma, anigə yə si waʼa ibeni. Yə nibi bɨ chigə wa ŋunə cha u beni ma Kristo.

⁹ I ŋwaʼanayn ayə ukum ayey uti moʼ akaʼa ikum mbə ayey uti mbənə mba mə iwere ipey amaʼazənə u si pey ituʼ ighumi ifəw. Amə ayey uti ŋunə usi nam aba ighari feyn.

¹⁰ Ba kyay uŋwən da unó chuŋ mbənə umə ighəy. Anji zənə umə iney buŋ ma anji chuŋ, u mə num ba akuw ma, umə faʼa abú ba Nwiye anji chuŋ, umugə umə iywere ba mbənə umə izəw ingəʼ, nu u naʼa inyo ma imə ighəy ichuŋ akə inji jum.

¹¹ I ŋwaʼanayn ayə ikum ayey uti mbənə cha udi si pey uma ituʼ ighumi fəw damugə unó mbənə nyə̂ inyo ma mə fana yə aghəy kwi u kaba igha inam, anigə iwaʼ anó ni faʼ abú Kristo.

¹² U bə mə aghəy ney, Nwiye yi saʼ úŋwən damugə mbə si waʼ anó zənə mbə si kaʼ.

¹³ Kaba nigə, u mbə chiŋi amaʼ uma imə gha iyeŋ ibunu, iweŋ ikwi, beʼere inyo, ighayn unó nu cha mbə mi mə ighayn.

¹⁴ Anigə ayə ikɨy ayey uti mbənə cha udi si nun ugha nam, ibə́ buŋ, ni iney ba mbənə umə ungɨŋ ina uma, da ka ba mə umə nə aza moʼ ighayn anó iboŋ da ngwa,

¹⁵ damugə ayey uti moʼ si faba sə beni aboʼo Satan.

¹⁶ Ayey ŋunə u beni Kristo bə mə nə mbə ayey uti moʼ ungɨŋ unebey ma, u ni were uŋwən, ka u sayn ma kwi ufere ba Kristo beʼe ikomo wu, da ufere ba Kristo were ayey uti mbənə cha ba iwere úŋwən.

¹⁷ Zən kwi uni naʼa iwumini abú ba mbənə umə cha ufere ba Kristo nibə tana choʼo afaʼa abú úŋwən, amara amə u mbənə umə faʼa akə ika imə ghayn inayn Nwiye foro imə itey unó da Kristo.

¹⁸ A yi ungɨŋ aŋwaʼanayn Nwiye kwi, “I kod ayə uchəw abú ipoŋ Amaʼazənə ngwə num iweŋ mə təʼe ikwi” Foro kwi, “Umbi tu wa faʼa.”

¹⁹ Ibeni ayə kwi u zi usaʼa igun wa moʼ ŋunə umə cha ufere, inigə kwi amə ba ubigə kə uta u zaʼa ni usaʼa wu ni uzənə.

²⁰ Wa moʼ bə sə aghəy unó iboŋ nu cha umə kaba ibeŋe fiŋ ima, nayn abú uŋwən ifigi ba Kristo jum da abúʼə ba ami igəd imə aghəy unó iboŋ.

²¹ Ayə ghayn inigə ifigi Nwiye, ifigi Yeso Kristo foro ifigi mbə angəd mbənə Nwiye choʼo, kwi ngwə num unoʼo mbənə amə naʼa inigə imə ighəy ayə aghɨ, kə itey kwi ngwə iwu wa moʼ ichigə wa chini.

²² Imə kamana ayə i niŋi ubugə igun ba da izoʼ úŋwən akə ba umə cha ufere. I zi ayə ubugə ungɨŋ anó iboŋ ba chini. Sayn inji inyo ichomo izayn zayn.

²³ I mə nugə ayə aba uney. Ni nugə ŋwə̂ unoʼ da isaŋa ughəy mbənə umə ungɨŋ ibum foro da isɨgə zənə imə naʼa ingəʼ inigə.

²⁴ Unó iboŋ ba moʼ mbə duw asaŋ asaŋ nu ba mə zənə. Unó iboŋ wu mbə tey kwi mbə si gow usaʼa ki usə saʼa úŋwən. Unó iboŋ ba chini umi du asaŋ akə gha sara.

²⁵ Amə ichin ichin ba mə zənə unó chuŋ mbənə ba mə ighəy, kaba u mbənə cha ba mə zənə ba mbi zən.