1 Timoti 4 - Aŋwaʼanayn Uso Fey

Pol chede Timoti da mbə taʼa unó figə uno

¹ Azugə zayn ghey adu zayn kwi ungɨŋ unəy mbənə umə ŋu zaʼa, ba moʼ mbi waʼ ibeni zənə imə abú úŋwən, sə wumine amə ba figə unó foro uzugə mbənə umə tumə ba. Umbi mə tey unó figi mbənə uzugə iboŋ kaba kwi ba beni.

² Ba mbənə umə itey ukudu unó uŋu mə ba figə unó. Fiŋ uma si kwu chomo ni kwi mbə toŋ akə atənə nomo nom.

³ U mbə tono kwi ka ba nam uma foro kwi ka ba jəg uma ikudi ughəy jəgi moʼ. Nwiye tana ijəg təŋ kwi, ba beni uŋwən, nibi kyay asiʼ ichara uŋwən naʼa yə beni ayə́ abú uŋwən, ki si jəg.

⁴ Ughəy jum mbənə Nwiye tana a boŋ. Ka ba ton ma moʼ. Asɨmə ba naʼa yə beni ayə abú uŋwən da ughəy jum mbənə u naʼa abú úŋwən,

⁵ damugə inayn Nwiye foro ichaʼara si ghəy kwi ughəy wu zayn.

Pol kɨ Timoti kwi u faʼa anji chuŋ

⁶ Ngwə bə aghəy unó mbənə a ghayn inigə da ba Kristo nibi beni aboʼo inayn zəŋ nu ighəy kwi ibeni kara nibi beni aboʼo asiʼ ŋunə ngwə si zəw, nji ngwə yi mə kaŋ wa afaʼa Yeso Kristo chuŋ.

⁷ Ton uneŋ unó ukow moʼ mbənə cha umə aghəy kwi ba kyay Nwiye. Siy inji inyo ni aghəy unó mbənə u tey kwi ngwə wumine Nwiye.

⁸ Ano imə aghəy unó mbənə umə aghəy kwi nyə̂ inyo kara boŋ, asɨmə anú ni aghəy u mbənə u tey kwi ngwə yə wumini Nwiye boŋ chigə unó jum damugə Nwiye si kaʼa itəni nu cha imi noʼo mey akinine foro akə Amaʼazənə amə zaʼa.

⁹ Inayn zəŋ mə iyi asiʼ nu ikoʼoro kwi ba beni akə fiŋ uma jum.

¹⁰ Mba yə zəw ingəʼ ifaʼ akə ikay damugə mba niŋi ita ikono igun Nwiye ŋunə umə ikay. Uŋwən yə chiyə ba jum mbənə u kaba kwi u chiyə úŋwən angəʼ, amara mə u mbənə uniŋi ikono uma igun ma.

¹¹ Tey unó mbəŋ jum abú ba mbənə u beni Kristo nibi ghayn kwi u sə ighəy.

¹² Ibeni ayə kwi wa moʼ tebe ayə damugə ngwə mə igwaʼ wa. Ngwə mə́ anwine abú ba mbənə u beni Kristo akə inji zənə ngwə mə inayn, akə inji zənə ngwə mə aghəy unó, akə inji zənə ngwə mə wuʼe ba, akə inji zənə ngwə niŋi ikono igun Kristo, foro akə inji zənə ngwə chomo akə uzayn zayn.

¹³ Zən kwi ngwə num amaʼ i foŋ inayn Nwiye abú ba asaŋ asaŋ, num amaʼ ighayn inayn Nwiye, nibi num amaʼ itey unó. Ni aghəy nigə pey Amaʼazənə ami zaʼa.

¹⁴ I waʼa ayə uneʼe ŋunə umə inigə, nu Azugə zayn zayn naʼa inigə akə Amaʼazənə ba ukən Nwiye ghayn unó mbəŋ, ba mbənə umə cha ufere nibi niŋi ubugə igun inigə.

¹⁵ Ghəy unó mbəŋ a ghayn inigə tana zi fiŋ igun, da ba jum zən umugə injə faʼa mə ŋuw imbey.

¹⁶ Wey ayə da anó jum mbənə ngwə mə itey, nibi iwey ayə da unó mbənə ngwə mə itey. Yimə unó mbənə a ghayn inigə damugə ngwə bə aghəy nigə, u ngwə ni ba mbənə u mə zəw anó zənə ngwə mə ghayn mbən yi du angəʼ.