1 Timoti 3 - Aŋwaʼanayn Uso Fey

Afaʼa utəw ba mbənə umə cha ufere ba Kristo

¹ Inayn zəŋ amə inayn asiʼ kwi: Anom moʼ bə kaŋa num ungɨŋ fiŋ ma kwi iyə kaba imə atəw igun ba Kristo, anigə amə kwi yə si num fiŋ kwi i yi faʼ afaʼa iwumini.

² Anigə atəw ŋunə umə cha ufere ba Kristo amə wa nu cha ba mə ghama uŋwən. Umə aba nə uyey feyn, amə aboroy wa. U kyay umugə iyimi inyo, amə wa umə wumine inyo. U ni num ba isoʼ ingɨŋ na ma. U kyay umugə itey unó.

³ A kəma wa nu umə nugə unoʼ ibigə. A kəma wa nu uwuʼi izoŋo. Amə wa nu umə iboto, a kəma wa nu umə taŋara ni ba. A kəma wa nu uwuʼi ukab.

⁴ U kyay umugə iyimə ba jum mbənə umə chomo ungɨŋ na ma. U aghəy kwi buŋ ma wumini uŋwən nibi na iwumini abú uŋwən akə inji jum.

⁵ Anom bə ki kyay ma umugə ni yimə ba mbənə umə chomo ungɨŋ na ma, nji umi kyay yimə amə ufere ba Nwiye?

⁶ A kəma wa nu u chini beni unó Nwiye, da ka umə beʼere ma inyo, anigə Nwiye zi usaʼa igun ma numugə yə zi igun debere.

⁷ Ba mbənə akəma ba Kristo uni ghayn unó chuŋ da uŋwən da ka umə ma ni indere atəw anigə ifwayn ungɨŋ atam debere.

Afaʼa ba mbənə umə ywere ungɨŋ ufere ba Kristo

⁸ Ba mbənə umə were ungɨŋ ufere ba Kristo mə ba mbənə ba chini mə iwumini. Amə ba mbənə umə itəmə igun asiʼ. Akəma ba nu umə nayn inayn ibɨy ibɨy. Akəma ba nu umə inugə unoʼ azəd. Akəma ba nu umə zi adoʼ akə ukab.

⁹ Úŋwən yimə asiʼ ŋunə Nwiye aghəy ba kyay. U aghəy nigə ni fiŋ zənə i zayn.

¹⁰ Ba mbənə u si beni Kristo u mbi nibi dey zweʼe úŋwən. Umbə zweʼe zən kwi cha anó boŋ moʼ igun uma, u si sayn kwi u faʼa ni ba umə ywere ungɨŋ ufere ba Kristo.

¹¹ Ichin ichin, uyey uma mə ayey nu ba mə wumine uŋwən. Akəma ayey nu umə chiŋe ikum ba. Amə aboroy ayey, nibə amə ayey nu ba zi fiŋ igun uma.

¹² Anom mbənə umə were ungɨŋ ufere ba Kristo mə aba nə uyey feyn. U yimə buŋ ma nibi yimə ba mbənə umə chomo ungɨŋ na uma anji chuŋ.

¹³ Ba mbənə umə ywere ungɨŋ ufere ba Kristo mə faʼa anji chuŋ, ba mbə wumine úŋwən. Umə nibi inayn ni fiŋ kaka da ibeni zənə imə da úŋwən igun Yeso Kristo.

Anó kyayn zənə u noy

¹⁴ A yi ungɨŋ inyi ikono kwi ayi yabi zaʼa inen. Asɨmə ayə ŋwaʼanayn unó mbəŋ inen da,

¹⁵ abə mə kwi mə tiŋe, mbən yi kyay umugə ba mə ghəy unoʼ ungɨŋ ufere ba Nwiye, nu amə ufere Nwiye ŋunə umə ikay. Ba Nwiye mbəŋ mbə yimə asiʼ ŋunə umə ungɨŋ ukən chuŋ aba anji zənə ichiŋini mə yimə na.

¹⁶ Anó zənə u noy nu Nwiye aghəy mba kyay numugə ba beni Kristo amə kwi: Kristo num nyə̂ inyo wa inyoŋ atəw izaʼa ungɨŋ isəg, Azugə zayn tey kwi uyə aghəy unó mbənə u koʼoro, Amə angəd zən uŋwən, Mbə́ ghayn da uŋwən ungɨŋ ubey jum, Ba umgɨŋ usin jum si zi fiŋ uma igun ma, Nwiye num uŋwən azobo anigə inaʼ iwumini abú uŋwən.