1 Timoti 2 - Aŋwaʼanayn Uso Fey

Inji zənə ba Kristo mi wumini Nwiye

¹ Anó imbey amə kwi ayə boʼo ubugə kwi mbən biy ughəy abú Nwiye, chaʼara Nwiye, ibiri ughəy abú Nwiye, nibi naʼ yə beni ayə abú uŋwən igun utəw ba jum.

² Mbən aghəy nigə igun utəw ifon foro igun utəw ba jum mbənə umə tumə ba, da mba boro ichomo nibi chomo akə aborobod, anigə inaʼa iwumini abú Nwiye akə inji jum foro kwi mba aghəy unó nu ukoʼoro.

³ Anó ni ichara Nwiye igun utəw ba jum yə kaŋa boŋ. Nwiye ŋunə yə chi ngwa angəʼ beni kwi yə boŋ.

⁴ Uŋwən kaba yə kwi ba jum kyay asiʼ da idu angəʼ.

⁵ Nwiye aba feyn. Wa ŋunə umə ungɨŋ ugha mə tana anó nə Nwiye nə ba uma aba feyn. Wa wu mə Yeso Kristo.

⁶ Yə naʼ inyo ma akə aghəy ifaʼ da izá utəw ba jum. Zəŋ amə anwini kwi akə amaʼa koʼo, Nwiye kaba kwi ba jum duw angəʼ.

⁷ A mə da anó zəŋ nu Kristo choʼo aŋu kwi a ghayn inayn Nwiye, nibə mə wa tom, nibə mə wa umə itey anó da ibeni, a yə tey asiʼ da Kristo abú ba mbənə akə ma ba Jû. Cha amə figə aŋu unó, a yə ghayn amə asiʼ.

⁸ A yə kaba kwi usin jum mbənə ba Kristo fere akuŋ iwumini Nwiye, anóm mbənə u si naʼa fiŋ uma jum abú Nwiye u beʼere ubugə ma aneŋ ichaʼara Nwiye. U aghəy nigə nu cha umə isəy itəm foro nu cha umə taŋara.

⁹ A yə nibə kaba kwi mbə ayey zi ndwi akə inji zənə ikoʼoro. U zi ndwi tənə ikoʼoro ifigi ba chini. Ka u tana uma utəw uma akə ughəy mbənə umə tana akə gol kə pel. Ka u zi ma ndwi aka unun.

¹⁰ Asɨmə uni aghəy unó akə inji chuŋ, nu amə unó mbənə ayey mbənə umə wumini Nwiye umə aghəy.

¹¹ Ayey ni kweme unó izey nə iwumini jum.

¹² Cha adi beni aŋu kwi ayey moʼ ni tey unó kə kwi ayey tumə anóm. U chuʼ iziy amaʼazənə umə itey unó.

¹³ Aton amə kwi Nwiye dey tana Adam ki sə tana Efe.

¹⁴ Cha Satan di tama ma amə Adam. Yə tama amə ayey wu. Anigə ayey wu beŋe akə wa imbey igow unoʼo Nwiye.

¹⁵ Asɨmə Nwiye yi chi ayey angəʼ anjim mugə umi ibə́ buŋ. U yi aghəy nigə Amaʼazənə uŋu imbey mə ni ibeni nə iwuʼi, aghəy ba chomo zayn zayn nibi aghəy unó mbənə u tana ikoʼoro.