1 Timoti 1 - Aŋwaʼanayn Uso Fey

¹ Amə umugə Pol a ŋwaʼanayn aŋwaʼanayn zəŋ. Amə wa tom Kristo anji zənə Nwiye ŋunə yə chiyə ngwa angəʼ ni Yeso Kristo ŋunə mba niŋi ita ikono igun ma ughayn nigə.

² Ayə ŋwaʼanayn inigə ungwə Timoti, nu amə uŋu ŋwə̂ asiʼ anji zənə mba beni Kristo. Nwiye Mbaʼ ni Asɨyisəg Yeso Kristo ghəy ichuŋ inen, idiri ngwən nibi naʼ aborobod inen.

Pol chara Timoti da mbə taʼa ba figə unó

³ Ayə ghəy ney aba numugə mə nibi ghayn ki sə ŋuw á Masedoniya kwi ngwə chomo Efesus. Ba moʼ mbə awu nu umə itey unó chini da Kristo, anigə ayə kaba kwi ngwə təməne úŋwən.

⁴ Ghayn abú úŋwən kwi ka u num uma amaʼ uma jum imə ghayn iboʼ ukow, imə ighayn iwaŋ ikum umbaʼ imbey. Unó mbəŋ mbə zaʼa amə ni itaŋara, cha itaŋara mə ghəy ma kwi ba ghəy unó mbənə Nwiye kaba. Ba mbi kyay unó mbənə Nwiye kaba aba anjim ibeni.

⁵ Aton zənə amə ghayn unó zəŋ amə kwi ba Kristo uwuʼ uma uma. Iwuʼi wu yi du ungɨŋ fiŋ zənə imə zayn, ungɨŋ fiŋ zənə cha unó iboŋ ungɨŋ foro ungɨŋ ibeni zənə amə iyi asiʼ.

⁶ Ba moʼ si waʼa unó mbənə mbə mi mə ghayn, anigə mbə si mbeŋe sə ghayn amə inayn ukow.

⁷ Umbə kaba kwi nji úŋwən mbə itey unoʼo Nwiye, asɨmə cha udi kyay uma unó mbənə umə ighayn kə unó u mbənə ghayn kwi mbə kyay.

⁸ Mba kyay kwi unoʼo boŋ amaʼazənə u bə sə faʼa awu akə inji zənə ikoʼoro.

⁹ Mba nibi kyay kwi cha Nwiye naʼa unoʼo amə abú ba mbənə umə ghey unó ukoʼoro. Yə naʼ amə abú ba mbənə umə gow unoʼo foro abú u mbənə cha umə wumine uŋwən. Yə naʼ abú ba mbənə cha umə wumine uŋwən foro abú u mbənə umə ghəy unó iboŋ. Yə́ naʼ abú u mbənə cha umə zayn ifigi ma nibi naʼ abú u mbənə umə tebe unó Nwiye. Yə́ naʼ abú ba mbənə umə izwere umbi umbaʼ nə umbi ingo, Foro u mbənə umə zwere ba chini.

¹⁰ Yə́ naʼ abú ba mbənə umə ghəy ufibiri unó, abú anom mbənə umə neŋe anom chini, abú ba mbənə umə ibiya ba ŋuw fənə, abú u mbənə umə figə unó, abú u mbənə umə nugə igow ifigə unó. Yə́ nibi naʼ abú u mbənə umə ighəy unó chini mbənə cha ukoʼoro nə unó mbənə ba Nwiye mə itey,

¹¹ nu amə ungɨŋ ukən chuŋ ŋunə Nwiye zi ungɨŋ itəŋ inya ubugə. Uŋwən amə Nwiye ŋunə ba mə yere nibə iwumini.

Pol naʼ yə beni ayə damugə Nwiye diri uŋwən

¹² A yə naʼa yə beni ayə abú Yeso Kristo ungwa Asɨyisəg. Yə naʼ ikay iniŋ damugə yə si ney aŋu zən kwi mə zi fiŋ igun ma. Anigə yə choʼ aŋu kwi afaʼa abú uŋwən.

¹³ Kanə mə́ mə ghayn unó iboŋ da uŋwən, inwine inya ughəw ba mbənə mbə́ beni uŋwən nibə jimə úŋwən, asɨmə yə diri aŋu damugə cha mə kyay aŋu anó zənə mə́ mə ighəy, cha mə di nibə beni aŋu uŋwən.

¹⁴ Ungwa Asɨyisəg ghəy ichuŋ ineŋ nu isugi chigə. Yə nibi naʼ ibeni iniŋ nibi ghəy kwi iwuʼi sugi wu ungɨŋ inyi fiŋ numugə amə akə anó feyn ni Yeso Kristo.

¹⁵ Inayn zəŋ amə inayn asiʼ nu ikoʼoro kwi ba beni akə ita fiŋ jum. Inayn wu amə kwi: Yeso Kristo zaʼa ungɨŋ isəg da ichi ba mbənə umə ghəy unó iboŋ angəʼ. Mə́ mə wa unó iboŋ ŋunə yə chigə ba jum mbənə umə ghəy unó iboŋ.

¹⁶ Asɨmə Nwiye diri aŋu damugə Yeso Kristo tey umugə yə tana yimə fiŋ da aŋu, Mə́ mə wa unó iboŋ nu uchigə umbi jum. Yə́ ghəy ney da umugə mə anwine abú ba jum mbənə umi beni uŋwən anigə ijəg itəni nu cha imi noʼo mey.

¹⁷ Ba wumini nibi yere ufon ŋunə u tənə koŋ, nu cha uni noʼo iku, nu cha ba mə zən uŋwən, nu aba uŋwən mə awu akə ighari feyn, aba uŋwən yugə nu amə Nwiye. Amə nigə.

¹⁸ Ayə ghayn inigə, ungwə Timoti uŋu ŋwə̂, kwi ngwə ghəy unó mbəŋ, ibeni aboʼo unó mbənə wa ukən Nwiye ghayn da ngwə. Ngwə bə beni aboʼo unó mbəŋ, ngwə yi zoŋ akə inji zənə ikoʼoro da ukən chuŋ ŋunə amə uyi asiʼ.

¹⁹ Amaʼazənə ngwə bə ghəy nigə, ngwə yi yimə ibeni zənə ikara nibi mə nə fiŋ zənə izayn. Umugə cha ba moʼ zwaray uma unó mbənə fiŋ uma ghayn, mbə si sam ibeni zənə yə mə abú úŋwən.

²⁰ Ba moʼ akaʼa úŋwən amə Hymənayus nə Alezanda. Mə si sayn úŋwən ungɨŋ ubugə Satan boʼo ú kweme kwi cha adi iboŋ ighayn inayn iboŋ da Nwiye.