1 Tesaloniyans 5 - Aŋwaʼanayn Uso Fey

Mbən tana inyo ni nəmə amaʼazənə Asɨyisəg mi wene izaʼa

¹ Umbəŋ unya, cha aton ni ŋwaʼanayn inen da amaʼ kə da aney zənə Asɨyisəg mi wene izaʼa,

² damugə mbən si kyay kwaʼa anji chuŋ kwi aney zənə Asɨyisəg mi wene izaʼa, uyi zaʼa aba numugə uji mə zaʼa afəb.

³ Amaʼazənə ba mi mə ghayn kwi, “Mba yə akə aborobod, cha aton ina imə bugə anó moʼ,” Ingəʼ iboŋ yi saʼa nyi igun uma aba anji zənə ayey mə zəw ubuʼ amaʼazənə umə nomo ibə́. Cha ba mi bugə ma ingəʼ wu.

⁴ Asɨmə umbən umbəŋ unya, cha mbən mə ghəy unó iboŋ ni ba mbənə umə ungɨŋ usin imbiri nu aney wu mi saʼa zaʼa igun inen anji zənə uji mə zaʼa.

⁵ Umbən ujum mbən mə ba umə ghəy unó azayn zayn, cha mbən mə ghəy ngwən unó afəb kə ambiri.

⁶ Anigə ka mbən mə bunə ngwən anji zənə ba chini mə bune nu cha ukyay uma anó zənə amə chigə. Asɨmə mbən chomo ikyiʼi iyimə itən inyo.

⁷ Ba mbə bune, umbə bunə amə afəb. Ba mbə nugə, umbə nugə bigə amə afəb.

⁸ Numugə mba mə ba mba mə́ ghəy unó azayn zayn, mba ki yimə ita inyo. Mba zi fiŋ igun Nwiye ni wuʼe ba mbi anigə zəŋ ayi kəbərə ngwa nə ghəy zənə usogwi mə zi iguwə ŋuw aberd. Mba zi ikono ni nəmə kwi Nwiye chiyə ngwa angəʼ. Zigə ayi chomo nə adam zənə usogwi mə zi ŋuw aberd.

⁹ Cha Nwiye di choʼo ma ngwa da izi ingəʼ igun na. Yə choʼo ngwa amə kwi, mba yi du angəʼ anjim ungwa Asɨyisəg Yeso,

¹⁰ nu yə ku da umba utəw da kanə mba mi ikay kə mba si ku, mba yi chomo nə uŋwən.

¹¹ Anigə mbən sə́ zi ikay abú umbən unya ighəy kwi ibeni fiŋ wa feyn feyn kara. Mbən sə́ ghəy nigə aba numugə mbən mə ghəy akinine.

Ikɨy tənə isi nwi

¹² Umbəŋ unya, mba yə boʼo ubugə inen kwi mbən naʼa iwumini abú ba mbənə umə faʼa injən kaʼa. Umbə ikɨy ngwən nibə zi ikay inen.

¹³ Mbən wumini úŋwən nibi tey kwi mbən iwuʼ úŋwən da unó ujum mbənə umə ghəy inen. Mbən chomo akə aborobod nə umbən unya.

¹⁴ Umbəŋ unya, mba yə boʼo ubugə inen kwi mbən chete ba zigə, izi ikay abú u mbənə unó ma mə ibó. Mbən were u mbənə umə kaba awere, Mbən yimə fiŋ nə ba jum.

¹⁵ Mbən zən kwi ka wa moʼ akaʼa injən wiy ma ibɨy igun ibɨy, asɨmə mbən kweme anó imə ghəy ichuŋ abú wa feyn feyn, nibi ghəy abú ba jum.

¹⁶ Mbən chomo akə iwuʼi akə umaʼ ujum,

¹⁷ mbən ki chaʼara Nwiye akə umaʼ ujum,

¹⁸ mbən ki naʼa yə beni ayə abú Nwiye akə unó ujum. Zəŋ amə unó mbənə Nwiye mə kaba inen akə inji zənə mbə mə akə ibumi nə Yeso Kristo.

¹⁹ Ka mbən kənə ngwən afaʼa zənə Azugə zayn zayn mə faʼa ungɨŋ inen.

²⁰ Ka mbə tebe ngwən ikən tənə ba ukən Nwiye ghayn,

²¹ asɨmə mbən zweʼe ikən wu jum yimə uŋunə u boŋo.

²² Mbən iton ikudi unó iboŋ ujum.

²³ Nwiye ŋunə umə naʼa aborobod u ghəy ma amboŋ kwi mbən zayn. Nwiye ghəy kwi azugə nə itən fiŋ foro itən nyə̂ inyo ghəy unó mbənə ukoʼoro da ka wa moʼ zən ma anó iboŋ igun inen akə amaʼazənə ungwa Asɨyisəg Yeso Kristo mi wene izaʼa.

²⁴ Uŋwən ŋunə u tiya ngwən u yi ghəy unó mbənə u kaʼa. U yi ghəy unó mbəŋ.

²⁵ Unbəŋ unya, mbən nibi chaʼara Nwiye ina.

²⁶ Mbən chaʼara ba Kristo ujum anji chuŋ. Mbən chaʼara itey iwuʼi zənə imə akaʼa ba Kristo.

²⁷ Ayə ghayn inen ifigi Asɨyisəg kwi mbən foŋ aŋwaʼanayn zəŋ abú ba Kristo ujum.

²⁸ Ungwa Asɨyisəg Yeso Kristo ghəy ichuŋ inen.