1 Tesaloniyans 4 - Aŋwaʼanayn Uso Fey

Ichomo akə inji zənə fiŋ Nwiye mi boŋ

¹ Umba unya, iŋu imbey, mba si tey inji zənə mbən mi mə chomo da fiŋ Nwiye boŋo. Amə asiʼ kwi mbən yə chomo nigə. Akinine, mba yə boʼo ubugə nibə ghayn inen akə ukum Asɨyisəg Yeso Kristo kwi, mbən ŋuw imbey ni ghəy nigə chigə umugə mbən mə ghəy.

² Mbən kyay ikɨy tənə Asɨyisəg Yeso naʼa ikay ina kwi mba tey inen.

³ Anó zənə Nwiye kaba amə kwi, mbən chomo akə uzayn zayn idu akə anó imə jəgə isəg.

⁴ Wa feyn feyn injən akaʼa kyay inji nu iyimə inyo akə inji zənə imə zayn foro akə inji zənə ikoʼoro.

⁵ Ka wa moʼ akaʼa injən fana ma anó ni iswene adoʼ akə ayey kə akə anom numugə ba mbənə cha udi kyay Nwiye umə ighəy.

⁶ Ka wa moʼ akaʼa injən chiŋe ma fiŋ unya ma akə anó zəŋ. Ka wa chigə ma anjim anó moʼ inum uyey unya ma. Asɨyisəg yi zi ingəʼ igun ba mbənə umə ghəy ukudu unó ŋu ujum aba anji zənə mba si ghayn inen nibi para ngwən.

⁷ Cha Nwiye di tiya ma ngwa kwi mba mə ba umə ghəy unyimi unó. Yə tiya ngwa amə kwi mba chomo akə uzayn zayn.

⁸ Wa ŋunə u ton ukɨy ŋunə, cha udi ton ma amə wa inyoŋ atəw, yə ton amə Nwiye ŋunə u naʼa Azugə zayn zayn inen.

⁹ Akinine, cha aton igha ŋwaʼanayn inen da inji zənə mbən mi iwuʼ umbən unya. Nwiye ma amboŋ si tey inen kwi mbən wuʼ umbən unya.

¹⁰ Amə asiʼ kwi mbən kaŋa iwuʼ umbən unya ujum mbənə umə ungɨŋ usin ujum a Masedoniya. Asɨmə mba yə boʼo ubugə inen umba unya kwi mbən ŋuw imbey ni wuʼe chigə umugə mbən mə iwuʼe.

¹¹ Mbən zi ikay imə ighəy unó ujum da ichomo akə aborobod. Ka mbən zi ma uchəw akə anó wa chini, ba jum zi atəw aba akə afaʼa uma nibə faʼa aba akə ubugə ma anji zənə mba ghayn inen.

¹² Mbən bə ghəy nigə, ba mbənə akə ma ba Kristo umbi wumine ngwən foro da ka mbən kaba ngwən kwi ba chini ni naʼa u ghəy mbənə mbən kaba.

Anó da mugə Asɨyisəg mi wene izaʼa

¹³ Umbəŋ unya, mba yə kaba kwi mbən kyay asiʼ da ba mbənə usi ku da ka mbən mə kənə ngwən ni ba mbənə cha u zi uma ikono kwi mbi yi chomo nə Nwiye.

¹⁴ Mba beni kwi Yeso ku gha zəmə. Mba nibi beni kwi Nwiye yi num ba mbənə u beni Yeso ki sə kuw ghəy kwi u chomo nə Yeso.

¹⁵ Anó zənə mba mə ghayn inen amə anó nu Asɨyisəg ghayn ma amboŋ. Yə́ ghayn kwi umba mbənə mba mə ikay akə amaʼazənə Asɨyisəg mi wene izaʼa, cha mba mi ŋu imbey abú u mbənə usi ku.

¹⁶ Akə amaʼ a wu, Asɨyisəg ma amboŋ yi swiʼi azobo, ba mbi izəw inayn kaka, izəw igəg angəd kyayn nibi zəw itaŋa Nwiye. Ba mbənə mbə́ si ku nu mbə́ beni Kristo mbi dey zəmə.

¹⁷ Umbə si zəmə, Nwiye si num umba mbənə mba mə ikay nu mba si buʼe igun isəg kwi mba ŋuw bumə nə úŋwən ungɨŋ ipaʼ anigə ibumə nə Asɨyisəg ungɨŋ ufey. Anigə, mba yi sə chomo nə Asɨyisəg akə ighari feyn.

¹⁸ Anigə mbən nigərə wa feyn feyn nə inayn təŋ.