1 Tesaloniyans 3 - Aŋwaʼanayn Uso Fey

¹ Amə ni bere cha nji ina iyimə fiŋ ichomo nu cha mba di zən ngwən, anigə ma zən kwi yə boŋ kwi mba chomo aba umba umba Atens.

² Mba tom ungwa unya Timoti nu mba mə faʼa abú Nwiye nə uŋwən anji zənə mba mə ghayn ukən chuŋ da Kristo kwi u zaʼa ghəy itən fiŋ kara foro kwi u zi ikay inen numugə mbən zi fiŋ igun Kristo.

³ Mba cha uŋwən da ka wa moʼ ibo ma numugə umə nwini itən inya ughəw. Mbən si kyay kwi umbi nwini ita inya ughəw.

⁴ Amaʼazənə mba mə nə umbən, mba mə bə ghayn inen kwi umbi nwini ita inya ughəw. Anó wu si du aba anji zənə ba ghayn inen.

⁵ Amə cha inji iniŋ igha yimə fiŋ, amə aton zənə a cha Timoti inen kwi u zaʼa zən kwi mbən mə zi fiŋ igun Kristo. Mə ghəy nigə damugə ayə goro kwi ighari moʼ Satan kwaʼara ngwən anigə ighəy afaʼa zənə mba faʼa achigə ibuw.

⁶ Akinine, Timoti si wene zaʼa ina nə ukən chuŋ numugə mbən zi fiŋ igun Kristo foro mugə mbən mə wuʼe umbən unya. Yə ghayn ina kwi mbən yə kono ngwa ighari jum akə fiŋ chuŋ. Yə nibi ghayn kwi, mbən yə kaba izən ngwa aba anji zənə mba mə kaba izən ngwən.

⁷ Umbəŋ unya, numugə mbən zi fiŋ igun Kristo yə naʼ ikay moʼ ina akə ingəʼ zənə mba mə zəw foro akə umugə umə nwini ita inya ughəw.

⁸ Akinine, ita fiŋ si wene zaʼa numugə mbən təm ikay ungɨŋ ibeni zənə mbən zi igun Asɨyisəg Yeso.

⁹ Amə ngiya amə ghəy mba kaŋa naʼ yə beni ayə abú Nwiye da ngwən, da itey iwuʼi zənə imə ina ifigi ungwa Nwiye da ngwən?

¹⁰ Mba yə chaʼara Nwiye akə ita fiŋ ijum afəb nə ingom kwi uwere kwi mba gha zaʼa zən ngwən ighari chini ighəy kwi mbə mə nə aghəy zənə abə́w akə injən ibeni fiŋ.

¹¹ Mba yə chaʼara kwi Nwiye mbaʼ ma amboŋ nə Asɨyisəg Yeso u ghəy apan duw ina mba zaʼa inen.

¹² Asɨyisəg Yeso ghəy kwi iwuʼi zənə imə akaʼa injən foro akaʼa ba jum ni ka ŋuw imbey numugə inja mə inen.

¹³ Mba yə chaʼara kwi u ghəy itən fiŋ kara da cha umi zi ma anó igun inen, foro da mbən chomo akə uzayn zayn ifigi Nwiye ungwa mbaʼ amaʼazənə ungwa Asɨyisəg Yeso mi wene zaʼa ni ba zayn zayn uma.