1 Tesaloniyans 2 - Aŋwaʼanayn Uso Fey

Unó mbənə Pol ghəy a Tesalonika

¹ Umbəŋ unya, mbən si kyay kwi umugə mba zaʼa ichaʼara ngwən, cha yə chigə ma ibuw.

² Mbən kyay umugə ba mbənə umə Filipi ghəy mba zəw ingəʼ nibi jimə ngwa. Asɨmə Nwiye naʼa ikay ina kwi mba ghayn ukən chuŋ inen. Ka di ma kwi cha ba nanaʼ kaba uma kwi mba ghayn ukən chuŋ wu.

³ Mbə yi zən kwi, cha mba mə ghayn ngwa inayn Nwiye amə kwi mba fana anó, kə aki ikono iboŋ moʼ, kə da itama ngwən.

⁴ Mba yə ghayn aba numugə Nwiye kaba kwi mba ghayn. Yə si ney ngwa izən kwi mba koʼ kwi u sayn ukən chuŋ wu ita inya ubugə. Cha mba mə ghayn da ighəy kwi fiŋ ba boŋo. Mba yə ghayn mə da fiŋ Nwiye ŋunə u kyay ita ikono iboŋo.

⁵ Mbən kyay kwi cha mba mə ghayn ngwa inayn nəmənəm inen boʼo itama ngwən, kə kwi mba yə ghayn da ghəy moʼ nu mba mə kaba inum inen. Nwiye amə ungwa uzənə.

⁶ Cha mba mə kaba ngwa kwi ba yere ngwa ka di ma umbən kə ba chini.

⁷ Ka di ma kwi, ni ba tom Kristo nji mba mi mə ibiri u ghəy inen, mbá mə́ kaŋa iboro amaʼazənə mba mə́ akaʼa injən, chomo ni ingo umə iney buŋ ma.

⁸ Amə inji zənə mba wuʼi ngwən azəd. Cha mba mə kaba aba ni ghəy kwi mbən kyay ukən chuŋ da Nwiye, mba mə nibə kaba ighəy unó ujum da iwere ngwən damugə mba wuʼi ngwən.

⁹ Umbəŋ unya, mbən kyay umugə mba mə́ faʼa injən akaʼa ni ikay. Mba mə́ faʼa afəb nə ingom da ka mba mə naʼa ngwa ingəʼ abú wa moʼ amaʼazənə mba mə ghayn ukən chuŋ da Nwiye inen.

¹⁰ U mbən foro Nwiye mbən mə uzənə kwi mba mə chomo akə uzayn zayn, ighəy unó nu ukoʼoro foro kwi mba mə ghəy unó nu cha ami ghəy wa moʼ ghayn anó iboŋ da ngwa akaʼa umbən mbənə mbən zi fiŋ inyo Nwiye.

¹¹ Mbən kyay kwi mba mə́ faʼa nə umbən numugə mbaʼ umə faʼa nə buŋ ma.

¹² Mba mə́ zi ikay inen, inigere itən fiŋ nibə ghayn inen kwi mbən chomo akə nji zənə imi ghəy kwi fiŋ Nwiye boŋo. Amə uŋwən yə tiya ngwən kwi mbən zaʼa inyi ungɨŋ anó ufon ma, foro ungɨŋ iwumini ma.

¹³ Mba yə nibə naʼa yə beni ayə abú Nwiye ighari jum da kwi amaʼazənə mba zaʼa inen nə inayn Nwiye, mbən zəw ibeni, akə ma ni kwi amə inayn ba inyoŋ atəw. Mbən kaŋa beni kwi amə inayn Nwiye. Inayn wu yə faʼa ungɨŋ inen umbən mbənə mbən beni Kristo.

¹⁴ Umbəŋ unya, anó zənə aduw inen amə nibə anó zənə yə́ duw abú ifere Nwiye tənə imə Judeya abú ba mbənə amə ba Yeso Kristo. Mbən yə zəw ingəʼ ubugə umbən ba abey anji zənə ifere wu zəw ingəʼ abú ba Jû.

¹⁵ Mbi moʼ zwere Asɨyisəg Yeso, mbi moʼ zwere ba ukən Nwiye, mbi moʼ fuw ngwa ungɨŋ ubey uma. Mbə́ mə ghəy unó nu cha fiŋ Nwiye mə boŋo ma nə úŋwən. Úŋwən mə ba abana abú ba jum.

¹⁶ Mbə́ mə́ kaba ikən kwi ka mba ghayn ngwa ukən chuŋ abú ba mbənə akə ma ba Jû da u duw angəʼ. Úŋwən si zwiy unó iboŋ uma usugi. Akinine, Nwiye si sɨy təm izi ingəʼ igun uma.

Pol kab kwi nji yə gha ŋu zən ba Kristo mbənə umə Tesalonika

¹⁷ Umbəŋ unya, amaʼazənə mba sayn ngwən, akə amaʼa moʼ, amə aba akə nyə̂ inyo. Mba mə bugə nə umbən akə azugə. Anigə mba mə kaba nji ijum igha izən ngwən.

¹⁸ Mba kaŋa kab iwene zaʼa inen asɨmə Satan kən ngwa. Umugə Pol, kaŋa kab izaʼa inen ighari nanaʼ.

¹⁹ Amə da umbən nu mba mə siyə ita ikono ni nəmə, ni wuʼe ngwa komo iguwə ifigi Asɨyisəg Yeso amaʼazənə umi zaʼa.

²⁰ Amə asiʼ kwi amə umbən mə ghəy kwi mba komo iguwə ichomo akə iwuʼi.