1 Tesaloniyans 1 - Aŋwaʼanayn Uso Fey

¹ Amə umugə Pol nə Sayilas foro Timoti mba ŋwaʼanayn aŋwaʼanayn zəŋ. Mba yə ŋwaʼanayn inen umbən ba Kristo mbənə mbən mə ungɨŋ ufere ŋunə umə Tesalonika, nu mbən mə ba Nwiye mbaʼ foro ba Asɨyisəg Yeso Kristo. Nwiye ghəy ichuŋ inen nibi naʼa aborobod inen.

Pol beni Nwiye da nji zənə ba Tesalonika zi fiŋ inyo Kristo

² Mba yə naʼa yə beni ayə abú Nwiye da umbən ujum, mba yə ghəy nigə umaʼ ujum mbənə mba mə chaʼara Nwiye.

³ Amaʼazənə mba mə chaʼara Nwiye ungwa mbaʼ, mba yə kono unó mbənə mbən mə ghəy anji zənə mbən zi fiŋ igun Kristo. Mba yə nibə kono umugə mbən mə faʼa akə ikay iywere ba damugə mbən wuʼi úŋwən. Mba yə nibə kono umugə mbən yimə fiŋ mə nəmə numugə zi fiŋ igun Asɨyisəg Yeso Kristo nu umi chi ngwən angəʼ.

⁴ Umbəŋ unya, mba kyay kwi Nwiye wuʼe ngwən azəd anigə yə choʼ ngwən kwi mbən mə umbi ba.

⁵ Mba kyay nigə damugə mbá zaʼa inen nə ukən chuŋ. Cha mba di zaʼa nə ukən chuŋ wu aba akə inayn, mba nibi ghayn ukən chuŋ wu akə ikay zənə Azugə zayn zayn mə naʼa. Mba nibi kaŋa tey umugə mba beni kwi unó mbənə umə ungɨŋ ukən chuŋ amə unó asiʼ. Mbən kyay unó mbənə mba ghəy amaʼazənə mba mə́ akaʼa injən. Mba mə ghəy unó wu jum da iwere ngwən.

⁶ Mbən mə ghəy unó mbənə mba mə ghəy, nibə ighəy unó mbənə Asɨyisəg mə ighəy. Ka di ma kwi mbən mə́ zəw ingəʼ, Azugə zayn zayn ghəy kwi mbən num inayn wu nə iwuʼi.

⁷ Zigə ghəy kwi ba jum mbənə u beni Kristo a Masedoniya foro Akaya unum itən inya ughəw.

⁸ Akə ba kwi inayn Nwiye si saŋa inen iŋu ungɨŋ ubey mbənə umə Masedoniya foro Akaya, anó da ibeni zənə mbən zi fiŋ igun Nwiye si nibi saŋa usin jum. Cha anó moʼ amə ghəy mba gha ighayn,

⁹ damugə ba wu ujum u mbə ghayn numugə mbən num ngwa akə inji chuŋ amaʼazənə ba zaʼa ichaʼara ngwən. Mbə́ nibi ghayn foro umugə mbən ton anó imə iwumini unwiye ibuw ibuw si beŋe sə wumine Nwiye ŋunə umə ikay mə nibə Nwiye asiʼ.

¹⁰ Mbə́ nibi ghayn kwi mbən yə nəmə kwi Ŋwə̂ Nwiye ŋunə yə zəmə uŋwən wene zaʼa azobo. Ŋwə̂ wu amə Yeso ŋunə yə chi ngwa ungɨŋ ingəʼ zənə Nwiye mi isɨy itəm zi igun ina.