1 Pita 5 - Aŋwaʼanayn Uso Fey

Unoʼo abú ba mbənə umə cha ufere foro abú ingwaʼ ba

¹ “Amə wa nu amə cha ufere ba Kristo. Amə uzənə anji zənə Kristo zən ingəʼ. Amə nibi wa moʼ akaʼa ba mbənə umi zən uzayn zayn amaʼazənə Kristo mi gha zaʼa. Anigə ayə boʼo ubugə inen umbən mbənə mbən mə cha ifere ba Kristo kwi,

² mbən ney injəg Nwiye tənə u zi ungɨŋ umbən ubugə. Ka mbən aghəy ngwən chomo ni kwi umbə tinə ngwən itini. Mbən aghəy nigə anji zənə mbən beni foro anji zənə Nwiye kaba. Ka mbən aghəy ngwən nigə da adoʼ ukab. Mbən aghəy amə da umugə mbən wuʼ ifaʼ.

³ Ka mbən mə nyə̂ ngwən ba mbənə u zi ungɨŋ umbən ubugə, asɨmə mbən chomo nu anwini abú úŋwən.

⁴ Amaʼ zənə Anəmə injəg kyayn mi zaʼa, mbən yi num uneʼe zayn zayn ŋunə cha umi noʼo ichoʼo.

⁵ Ingwaʼ ba mbən wumini ba mbənə usi kara chigə ngwən. Mbən jum swiʼiri inyo ifaʼ abú umbən unya damugə,” Nwiye yə bana ba mbənə umə beʼere inyo, Asɨmə u yə aghəy ichuŋ abú umbənə umə swiʼiri inyo.

⁶ Anigə mbən swiʼiri inyo aton ikay Nwiye da amaʼ ma bə koʼo uyi beʼere ngwən.

⁷ Mbən sayn unó jum mbənə umə chigə ngwən abú uŋwən damugə amə uŋwən umə nəmə ngwən.

⁸ Mbən yimə inyo nibi chomo ikiʼi. Úŋwən bana nu amə debere yə yeŋ zuʼe chomo ni ifoŋ. U yə kaba wa moʼ ŋunə umi iniŋ.

⁹ Ka mbən beni ngwən kwi injən ibeni bó. Mbən beni ngwən uŋwən. Mbən kyay kwi umbən unya ungɨŋ isəg jum umbə zəw ukudu ingəʼ ŋunə mbən mə zəw.

¹⁰ Mbən bə zəw ingəʼ akə ŋwə̂ amaʼ moʼ, Nwiye ŋunə umə ighəy ichuŋ abú ba jum yi were itana ughəy jum inen. U yi aghəy kwi injən ibeni kara nibi aghəy kwi mbən təm ikara. Asɨmə yə chigə anjim Kristo itiya ngwən kwi mbən zaʼa nyi ungɨŋ zayn zayn ma ŋunə cha umi noʼo imey.

¹¹ Uŋwən tumə isəg akə ighari feyn. Amə nigə.

Achaʼara nu asi nwi

¹² Amə Sayilas were aŋu kwi á ŋwaʼanayn aŋwaʼanayn zəŋ inen. Uŋwən amə unya nu a kyay kwi yə zi fiŋ igun Kristo. Mə ŋwaʼanayn da izi ikay inen foro ighəy mbən kyay kwi Nwiye yə kaŋa ighəy ichuŋ. Mbən təm ikara ungɨŋ ichuŋ wu.

¹³ Umbən unya mbənə umə ungɨŋ ufere ba Kristo ŋunə umə Babilon cha achaʼara inen. Amə Nwiye yə nibi choʼo Úŋwən. Mak nu uchomo ni ŋwə̂ iniŋ nibi chaʼara ngwən.

¹⁴ Mbən chaʼara wa feyn feyn kwaʼa anji anigə itey iwuʼi ba Kristo abú úŋwən. Nwiye naʼa aborobod inen umbən jum mbənə mbən mə akə bumi nə Kristo.