1 Pita 4 - Aŋwaʼanayn Uso Fey

Ba mbənə u beni Nwiye uchomo akə inji chini

¹ Kristo zəw ingəʼ Amaʼazənə mbə komo uŋwən, anigə mbən yə nibə nə ukudu ikono tənə tə́ mə́ abú uŋwən damugə cha wa moʼ ŋunə usi zəw ingəʼ mə ma nə anó moʼ ni aghəy nə unó iboŋ.

² Anigə mbən num Amaʼazənə a buʼe inen igun isəg ni aghəy unó mbənə Nwiye kaba, akə ma umbənə ba ungɨŋ isəg kaba.

³ Amaʼ zənə mbən mə ighəy unó mbənə ba mbənə akə ma ba Jû wuʼi ni aghəy si chigə. Mbən mə ighəy unyimi unó. Mbən mə swene adoʼ akə ayey, ayey nibə swene anóm. Mbən mə nugə ibigə. Mbən mə nugə bə sə aghəy unó ibuw ibuw. Mbən mə nibi iwumini unwiye ibuw ibuw nu cha unoʼo Nwiye di beni ma kwi mbən ni aghəy nigə.

⁴ Akinine, umbə məŋərə uma kwi cha mbən mə bumə úŋwən da ighəy unó iboŋ mbənə mbən mə ighəy. Numugə cha mbən mə bumə úŋwən, umbə sə jimə ngwən.

⁵ Umbi ghayn unó mbənə u si aghəy abú uŋwən ŋunə u si tana inyo isaʼ ba mbənə umə ikay foro umbənə usi ku.

⁶ Zəŋ amə aton zənə mbə́ ghayn ukən chuŋ foro abú uwu ba, ka aba kwi mbə si saʼ úŋwən numugə usi saʼa ba chini. Anigə azugə uma chomo nə Azugə Nwiye.

Mba faʼa anji chuŋ akə uneʼe ŋunə Nwiye naʼa ina

⁷ Inwi ughəy jum si tənə, anigə mbən beʼere umbən utəw zayn nibi yimə inyo da ikyay umugə ni chaʼara Nwiye

⁸ Anó zənə a chigə unó jum amə kwi mbən wuʼ itən inyo umbən umbən kwaʼa ungɨŋ fiŋ damugə iwuʼi yə kəbəre unó iboŋ nanaʼ.

⁹ Mbən num umbən unya ungɨŋ itən na. Asɨmə mbən bə num, ka mbən mə zuʼe ngwən.

¹⁰ Mbən num uneʼe ŋunə Nwiye naʼa abú wa feyn feyn injən akaʼa iywere umbən unya awu. Anigə amə umugə Nwiye chigə injən injim ighəy ikudi ichuŋ jum abú ba.

¹¹ Wa moʼ ŋunə umə ghayn inayn Nwiye, u ghayn aba anó zənə Nwiye ghayn abú uŋwən. Wa moʼ ŋunə umə faʼa, u faʼa aba akə ikay zənə Nwiye naʼa abú uŋwən, boʼo akə unó jum ba mbi yere Nwiye anjim Yeso Kristo. Iwumini jum foro ikay jum mə ima koŋ koŋ. Amə nigə.

Wa Kristo yi zəw ingəʼ

¹² Umbuŋ unya nu awuʼi kwaʼa azəd, ka mbən mə məŋərə ngwən kwi akənə kaka zaʼa igun inen da izweʼe ngwə. Ayi chomo ni kwi anó isoʼ moʼ yi aghəy igun inen.

¹³ Asɨmə mbən wuʼ ngwən numugə mbən mə zəw ingəʼ anji zənə Kristo nibi zəw. Iwuʼi yi sugi ungɨŋ itən fiŋ amaʼazənə umi zaʼa ungɨŋ uzayn zayn ma.

¹⁴ Ba bə jimə ngwən damugə mbən beni Kristo, Nwiye yi zi aborobod igun inen. Anigə amə kwi azugə zayn zayn zənə amə Azugə Nwiye si məŋi igun inen.

¹⁵ Wa moʼ akaʼa injən bə sə zəw ingəʼ, ka umə zəw ma damugə yə zwere wa, kə damugə yə ji, kə damugə yə aghəy anó iboŋ, kə damugə yə zi uchəw ungɨŋ unó ba chini.

¹⁶ Asɨmə wa moʼ akaʼa injən bə sə zəw ingəʼ damugə uŋwən amə wa Kristo, ka indere atəw yimə ma uŋwən. U yere Nwiye damugə uŋwən beni ukum Kristo.

¹⁷ Amaʼ si koʼ nu Nwiye mi saʼa ba. U yi dey iti abú ba ma. U bə dey ti ina, nji inwi ba mbənə cha u mə iwumini ukən chuŋ da Nwiye mə mi ingiya?

¹⁸ Ayə ungɨŋ aŋwaʼanayn Nwiye kwi, Abə mə isey abú ba mbənə umə ighəy unó chuŋ idu angəʼ, Nji ami si məŋi ingiya abú ba mbənə cha umə iwumini Nwiye foro u mbənə umə ighəy unó iboŋ?

¹⁹ Anigə, ba mbənə umə zəw ingəʼ anji zənə Nwiye kaba uŋu imbey ni aghəy anó zənə akoʼoro. Umbə nibə naʼa itəni uma abú Nwiye ŋunə u tana úŋwən. Uŋwən yə aghəy unó jum mbənə u kaba.