1 Pita 3 - Aŋwaʼanayn Uso Fey

Anó da mbə ayey nə mbə anóm mbənə u nama

¹ Anji zənə ba faʼa mi wumine mbaʼ faʼa uma, amə ichin ichin kwi mbə ayey wumini inom uma da abə mə kwi cha umoʼ akaʼa úŋwən beni ma inayn Nwiye, iyey uma mbi beŋe úŋwən akə ighəy unó ma nu cha u ghayn uma anó moʼ.

² Umbi beŋe damugə u zən inji zənə mbən mə wumini úŋwən foro da mugə mbən mə aghəy unó nu uzayn.

³ Ka inji zənə mbən mə boŋo məŋə ma amə asaŋ asaŋ, akə inji zənə mbən mə tana inyoŋ atəw kə umugə mbən mə zi ughəy mbənə umə tana akə gol kə numə mbən mə zi ndwi chuŋ.

⁴ Inji zənə mbən boŋo du amə ungɨŋ fiŋ. Cha ukudu boŋo ŋunə mə ibɨy ma. Yə noʼ akə azugə zənə amə iboro. Azugə zənə amə boro yə boŋ azəd ifigi Nwiye.

⁵ Amə akə ukudu inji uŋu nu ayey imbey mbənə mbə́ mə́ zi fiŋ mə siy inyo ma iboŋo. Aba akə inji zənə mbə́ mə wumini inom uma.

⁶ Sera mə nigə. Yə mə wumine Abraham anigə i tiya uŋwən akə Masaʼ. Mbən mə buŋ ma Amaʼazənə mbən mə aghəy unó nu ukoʼoro foro Amaʼazənə cha mbən mə goro anó moʼ.

⁷ Ichin ichin umbən inom mbən wumini mbə ayey nibi chomo nə úŋwən akə inji zənə ikoʼoro. Mbən bə aghəy nigə nji mbən yi kyay kwi úŋwən ibó chigə ngwən. Mbən aghəy nigə damugə Nwiye yi naʼa itəni inen umbən jum. Mbən aghəy nigə da ka aghəy moʼ kən ma injən achaʼara Nwiye.

Anó ni zəw ingəʼ da unó chuŋ

⁸ Iŋu nwi, umbən jum mbən chomo aba akə anó feyn. Mbən kənə abú umbən unya, iwuʼ umbən unya ighəy ichuŋ abú umbən unya, nibi num inyo asəy ama zənə mbən mə akaʼa umbən unya.

⁹ Ka mbən iywi ngwən ibɨy igun ibɨy, ka mbən iywi ngwən achem igun achem. Wa bə aghəy anó inen, mbən iywi amə nə aborobod. Nwiye tiya ngwən kwi mbən aghəy nigə da u zi aborobod igun inen.

¹⁰ Ayə ungɨŋ aŋwaʼanayn Nwiye kwi, Wa ŋunə u wuʼi ichomo u chuŋ uchuŋ, Nibi zən unəy chuŋ, U yimə ineme ma da ka u ghayn ma inayn iboŋ. U nibi yimə uchəw ma da ka u figi ma unó.

¹¹ U waʼ unó iboŋ beŋe sə aghəy amə unó chuŋ. U kaba inji jum da ichomo akə aborobod ni ba jum.

¹² Aghɨ Asɨyisəg yə ney ba mbənə umə aghəy unó chuŋ. Utoŋ ma mbə tana zəw achaʼara uma. Asɨmə cha udi wuʼe ma ba mbənə umə ighəy unó iboŋ.

¹³ Amə ngwa u mi inwi ayə Amaʼazənə ngwə sə aghəy unó mbənə ukoʼoro?

¹⁴ Asɨmə ka nə mbən mə zəw ingəʼ damugə mbən mə ighəy unó mbənə ukoʼoro, Nwiye yi zi aborobod igun inen. Ka mbən mə goro ngwən kə nibə tumə inyo.

¹⁵ Asɨmə mbən wumini Kristo ungɨŋ itən fiŋ kwi uŋwən amə Asɨyisəg. Mbən tana inyo akə uma jum ni ywere inayn abú ba jum mbənə umi biri aton da ikono zənə imə inen. Mbən aghəy nigə nə iboro fiŋ foro nə iwumini.

¹⁶ Mbən mə nə fiŋ zayn zayn boʼo atəw ni inded abú ba mbənə umə ghayn unó iboŋ da ichuŋ zənə imə inen numugə mbən mə ba Kristo,

¹⁷ damugə yə boŋ kwi mbən zəw ingəʼ damugə mbən mə ighəy ichuŋ anji zənə Nwiye kaba chigə umugə mbən mi zəw ingəʼ damugə mbən mə ighəy unó iboŋ.

¹⁸ Kristo ku da unó iboŋ ighari feyn akə umaʼ jum. Yə́ mə aghəy unó chuŋ, iku igun atəw ba mbənə umə ighəy unó iboŋ, da inum ngwən iŋu abú Nwiye. Mbə zwere nyə̂ ma asɨmə Azugə Nwiye aghəy kwi imə ikay.

¹⁹ Amə Azugə wu yə aghəy kwi u ŋuw ghayn inayn Nwiye abú uzugə mbənə umə andəŋ.

²⁰ U mbəŋ, amə uzugə ba mbənə cha mbə wumini uma Nwiye amaʼazənə yə yimə fiŋ akə amaʼazənə Noa komo abaŋ ugwi ma. Aba ba pipi, anigə amə ba ifəyn mbə du angəʼ ungɨŋ abaŋ wu.

²¹ Une mbənə mbə́ mə́ neŋe igun təm akə anó nu ba num une. Amə une wu chiyə ngwa angəʼ akinine. Cha anó ni num une mə ma anó ni chi indoro inyo. Amə anó nu ikaʼ abú Nwiye nə fiŋ nu izayn. Anó ni num une chiyə ngwa angəʼ anjim umugə Yeso Kristo zəmə.

²² Yə si ŋu azobo pey yi chomo aba bugə jəgi Nwiye. Uyə sə tumə mbə angəd nibi tumə uzugə jum mbənə umə azobo foro aton azobo.