1 Pita 2 - Aŋwaʼanayn Uso Fey

Itəy nu imə ikay nə ba nu Nwiye choʼo

¹ Mbən waʼ unó iboŋ jum, waʼ anó ni mə figə unó. Waʼ anó ni mə aghəy azom, waʼ anó ni mə ighəy adey nibi waʼ anó ni mə zumə inayn.

² Nə buŋ ubó umbənə umə kaba iben inugə. Mbən ni kaba amə iben zənə azugə mə naʼa boʼo mbən bə nugə, mbən yi kaŋa kara, Nwiye chi ngwən angəʼ.

³ Mbən si zweʼe izən kwi Nwiye boŋ.

⁴ Mbən zaʼa abú uŋwən ŋunə amə itəy zənə imə ikay. Ba ton uŋwən, asɨmə Nwiye choʼo uŋwən. Uŋwən boŋ kwaʼa azəd ifigi Nwiye.

⁵ Mbən zaʼa chomo ni itəy zənə imə ikay, boʼo Nwiye num ngwən ibúŋ imbəŋ Nwiye zayn zayn awu. Mbən bə aghəy nigə, mbən yi mə ba mbəŋ Nwiye zayn zayn, anigə chigə anjim Yeso Kristo inaʼ ughəy ifa azugə mbənə Nwiye beni.

⁶ Ayə ungɨŋ aŋwaʼanayn Nwiye kwi, “Zəŋ, ayə zi ati Zayon. Amə itəy ijugi na nu mə choʼo, yə buŋ kwaʼa azəd. Cha wa moʼ ŋunə u niŋi fiŋ igun ma mi mə ma nə indere atəw.”

⁷ Abú umbən mbənə mbən beni, Itəy wu boŋ kwaʼa azəd, asɨmə abú ba mbənə cha udi beni, Itəy zənə mbə chimə na tono Si beŋe akə itəy ijugi na.

⁸ Foro kwi, “Amə itəy nu imi aghəy kwi ba tamara. Mə nibə ukob nu umi aghəy kwi ba gow.” Umbi tamara damugə cha umə ighəy unó mbənə umə ungɨŋ inayn Nwiye. Zəŋ amə anó nu Nwiye si sey da úŋwən.

⁹ Amə umbən, mbən mə unebey ba ŋunə Nwiye si choʼo. Mbən mə ba ambəŋ Nwiye nu umə faʼa abú ufon kyayn. Mbən mə abey nu amə zayn. Mbən mə ba Nwiye boʼo ighayn uyere unó mbənə u si aghəy. Amə uŋwən yə tiya ngwən ungɨŋ isəg ifiri anigə izi ungɨŋ isəg zayn zayn zənə u naʼa abú ba.

¹⁰ Amə́ akə amaʼa moʼ, cha mbən mə ngwən ba Nwiye, asɨmə akinine mbən mə ba uma. Amə́ akə maʼa moʼ, cha Nwiye di idiri ma ngwən, asɨmə akinine yə si idiri ngwən.

Mbən chomo akə inji zənə ba afaʼa Nwiye mi chomo

¹¹ Umbuŋ unya nu a wuʼi kwaʼa azəd, mbən kyay kwi mbən mə ba umə chomo abey ba chini, foro kwi mbən mə ba isoʼ ungɨŋ isəg zəŋ. Ka mbən aghəy ngwən unó mbənə nyə̂ inyo mə fana. Mbəŋ amə unó mbənə umə maʼa berd ungɨŋ itən fiŋ.

¹² Itən ighəy unó akaʼa ba mbənə akə ma ba Jû ni boŋo, da ka ney udi ghayn ma kwi mbən mə ba mbənə umə ighəy unó iboŋ, umbi zən unó chuŋ mbənə mbən mə ighəy anigə iyere Nwiye anəy zənə umi wene izaʼa isaʼ isəg.

¹³ Inji zənə mbən beni Asɨyisəg, mbən wumini ba jum mbənə u sey igun inen kwi uni tumə ngwən. Kə amə ufon kyayn ŋunə umə igun ifon chini,

¹⁴ kə gobuna nu uŋwən choʼo kwi unyi ba mbənə umə ighəy unó iboŋ. Nibi naʼa iwumini abú ba mbənə umə ighəy unó mbənə ukoʼoro.

¹⁵ Nwiye yə kaba amə kwi mbən aghəy unó mbənə ukoʼoro boʼo ikəbərə ichəw uneŋ ba mbənə umə ighayn unó nu cha u kyay.

¹⁶ Mbən chomo ni ba mbənə akə ma isob. Asɨmə ka mbən num ngwən numugə mbən mə chomo ni ba mbənə akə ma isob, imə ighəy unó iboŋ. Mbən chomo akə inji zənə ba faʼa Nwiye mi chomo.

¹⁷ Mbən wumini ba jum, iwuʼ umbən unya mbənə u beni Kristo iwumini Nwiye nibi iwumini ifon kyayn.

Anwini ni kweme akə inji zənə Kristo zəw ingəʼ

¹⁸ Ba faʼa, mbən wumini umbən mbaʼ faʼa ni iwumini jum. Ka mbən wumini ngwən aba umbənə umə nə fiŋ chuŋ. Mbən wumini foro u mbənə umə kyugə.

¹⁹ Nwiye yi zi aborobod igun wa ŋunə u yimə fiŋ zəw ubuʼ nibi zəw ingəʼ ibuw damugə u kyay kwi Nwiye yə awu.

²⁰ Injim amə ingiya nu ngwə be gow anó u som ayə ngwə yimə fiŋ? Asɨmə ngwə bə aghəy anó nu akoʼoro anigə izəw ingəʼ da ngwən, Nwiye yi zi aborobod igun inigə.

²¹ Amə da ukudu ingəʼ uŋu nu Nwiye tiya ngwən kwi mbən mə umbi ba. Mbən kyay kwi Kristo nibi zəw ingəʼ da ngwən. Anigə yə tey anwini inen boʼo mbən num inayn ughəw ma.

²² Cha yə di aghəy ma anó iboŋ moʼ, cha anó figi moʼ du ma ungɨŋ uchəw ma.

²³ Amaʼazənə mbə jim uŋwən, cha yi di nibi jim ma ba mbənə mbə́ jim uŋwən. Amaʼazənə yə zəw ingəʼ, cha yə ghayn ma kwi iyi iywi. Yə zi fiŋ aba igun Nwiye ŋunə umi saʼa ba akə inji zənə ikoʼoro.

²⁴ Kristo ma ambuŋ beʼe umba unó iboŋ ungɨŋ inyo ma ŋu azad abaʼaray. Yə aghəy nigə da mba bə ku ungɨŋ unó iboŋ mba si chomo aba akə inji zənə ikoʼoro. Una mbənə mbə́ mə́ inyo ma si aghəy mbən boro.

²⁵ Mbən chomo ni injəg tənə isi faba, asɨmə akinine mbən si gha ŋu abú anəmə injəg ŋunə umə nəmə ngwən.