1 Pita 1 - Aŋwaʼanayn Uso Fey

Achaʼara

¹ Amə umugə Pita nu amə wa tom Yeso Kristo ŋwaʼanayn aŋwaʼanayn zəŋ. Ayə ŋwaʼanayn abú ba mbənə Nwiye choʼo nu amə ba isó nu usaŋa ungɨŋ Pontus, ungɨŋ Galesiya, ungɨŋ Kapadosiya, ungɨŋ Esiya nibi foro ungɨŋ Bitiniya.

² Nwiye Mbaʼ choʼo ngwən kwi mbən mə umbi ba anji zənə yə si numi. Azugə ma si ghəy mbən zayn, da mbən wumini Yeso Kristo nibi ghəy kwi anəm ma zənə yə tuwi a zayn ngwən. Ichuŋ Nwiye nə aborobod ma zaʼa igun inen isugi.

Ikono da amaʼazənə umi zaʼa

³ Mba yere Nwiye ŋunə amə Mbaʼ ungwa Asɨyisəg Yeso Kristo, uŋwən yə idiri ngwa kwaʼa inji chuŋ. Yə si ghəy kwi mba jəg itəni fey anji zənə yə zəmə Yeso Kristo. Zəŋ si ghəy kwi mba niŋi ikono ni nəmə unó mbənə Nwiye kaʼa ina.

⁴ Zəŋ ayi nibi ghəy kwi mba jəg ughəy mbənə uŋwən sey azobo abú umbi ba. Uŋwən sey azobo asin zənə cha umi noʼo figi, cha umi noʼo ibɨ, cha umi noʼo ichoʼo.

⁵ Nwiye si chigə anjim ikay ma ikən ngwən numugə mbən niŋi fiŋ igun Kristo, da mbən duw angəʼ amaʼ anjim.

⁶ Anigə mbən wuʼe ngwən da anó zəŋ nu Nwiye si ghəy. Kə nə di ma kwi akinine mbən yi bugə chigə ungɨŋ akwaʼara akə unó nanaʼ, da mbən yi ŋu zəw ingəʼ akə ukudi inji nanaʼ.

⁷ Unó mbəŋ amə ni izwere ngwən i zən kwi injən beni amə ibeni asiʼ. Ka aba gol ŋunə amə aŋu u chiŋi, umbə zweʼe akə uwəd, anigə injən beni nu amə ghəy aka unun chigə gol, umbi nibi zweʼe izən kwi yə kara. Ibə kara, Nwiye yi yere ngwən mbə nibi mə nə uzayn zayn nə wumini akə amaʼazənə Yeso Kristo mi wene izaʼa.

⁸ Mbən wuʼe uŋwən kanə di ma kwi cha mbən di si zən uŋwən. Mbən niŋe fiŋ igun ma, ka di ma kwi cha mbən mə zənə uŋwən. Mbən kaŋa iwuʼ nibi kaŋa iwuʼ akə inji zənə amə ghəy cha wa mi ghayn akə uchəw.

⁹ Numugə mbən si beni, mbən yi du angəʼ.

¹⁰ Ba ukən Nwiye kaŋa kab i kyay da anó zəŋ ni du angəʼ. Mbə tana ikab nibi nwini anó da ichuŋ zənə Nwiye mə ghəy inen.

¹¹ Mbə nibi tana inwini anó zənə azugə Kristo mi zaʼa ungɨŋ uma nibi ghayn abú úŋwən da inji zənə Kristo mi zəw ingəʼ. Mbə nibi tana inwini iwumini Kyay zənə imi mə abú uŋwən. Mbə nibi tana inwini da wa ŋunə amə uŋwən, nibi nwini da amaʼazənə unó mbəŋ mi du.

¹² Nwiye tey abú úŋwən kwi, cha umə faʼa da i were inyo uma, Umbə faʼa amə da iwere ngwən. Umbə ghayn unó nu mbən si zəw abú ba mbənə mbə chigə anjim azugə zayn zayn zənə Nwiye cha azobo i ghayn ukən chuŋ. Mbə angəd mbə nibə kaba ikyay unó wu.

Mba chomo uzayn zayn

¹³ Mbən tana itən fiŋ da ighəy unó mbənə Nwiye kaba. Mbən yimə inyo kwaʼa anji chuŋ. Mbən tana niŋi itən ikono aba igun ichuŋ zənə Nwiye mi ghəy inen amaʼazənə Yeso Kristo mi wene izaʼa.

¹⁴ Umugə mbən mə buŋ umə wumine, ka mbən beni ngwən aboʼo unó iboŋ mbənə ita nyə̂ inyo mə fana akə amaʼazənə cha mbən di si kyay Nwiye.

¹⁵ Asɨmə mbən ghəy unó jum azayn zayn aba anji zənə uŋwən yə tiya ngwən umə zayn.

¹⁶ Ayə ungɨŋ aŋwaʼanayn Nwiye kwi, “Mbən chomo uzayn zayn damugə amə zayn.”

¹⁷ Anji zənə mbən mə tiya Nwiye kwi Mbaʼ amaʼazənə mbən mə chaʼara uŋwən, anigə mbən kyay kwi cha umə ighəy ma aghɨ amaʼazənə umə saʼa ba. Anigə mbən ni goro uŋwən umugə mbə mə chomo aki igun isəg zəŋ ni ba isoʼ.

¹⁸ Mbən kyay kwi Nwiye si choʼ umbən utəw akə inji iboŋ tənə mbən num abú umbən u mbaʼ imbey. Cha yə di ghəy ma nigə amə ni sɨriva kə gol nu umə ibɨ.

¹⁹ Yə choʼ amə akə anəm aka unun zənə Kristo tuwi azad abaʼara. Kristo chomo ni ŋwə̂ injəg ŋunə cha agəʼ kə indoro igun.

²⁰ Nwiye si choʼ uŋwən isey ki sə tana isəg. Yə si ghəy kwi ba kyay uŋwən ungɨŋ uney mbənə u si nwi. Yə ghəy nigə da iwere ngwən.

²¹ Mbən si chigə anjim ma beni Nwiye ni wumine uŋwən nibə naʼa iwumini abú uŋwən. Amə aton zənə mba mi niŋi ita fiŋ nibi niŋi ita ikono aba igun Nwiye.

²² Mbən si ghəy itən fiŋ zayn anji zənə mbən mə ghəy unó amə umbi asiʼ. Mbən nibi kaŋa iwuʼ umbən unya kwaʼa anji chuŋ. Mbən wuʼe úŋwən kwaʼa ungɨŋ fiŋ.

²³ Mbə si ibə́ ngwən ighari chini da mbən jəg itəni fey anjim inayn Nwiye zənə imə ikay. Cha itəni zənə imə abú mbaʼ nu umə kuw. I yə noʼo abú mbaʼ nu cha umi noʼo iku.

²⁴ Ayə ungɨŋ aŋwaʼanayn Nwiye kwi, “Ba jum chomo ni ufuʼ Iwumini uma chomo nə ufuʼ ŋwaʼ ŋwaʼ Ufəʼ yə kuw u ŋwaʼ ŋwaʼ nəgə.

²⁵ Asɨmə inayn Asɨyisəg tənə koŋ.” Inayn wu amə ukən chuŋ ŋunə mbə ghayn inen.