1 Korintiyans 9 - Aŋwaʼanayn Uso Fey

Anó zənə ba mi aghəy abú wa tom Kristo nə u mbənə wa tom Kristo mi aghəy abú ba

¹ Awaʼa kə aghəy aŋu anó zənə awuʼi? Akə aŋu wa tom Kristo? A waʼa ki zən aŋu ungwa Asɨyisəg Yeso? Damugə mbən beni Asɨyisəg, ka yə tey kwi mə faʼa anji chuŋ?

² Abə mə kwi cha ba moʼ di beni uma kwi amə wa tom Asɨyisəg, nji mə kyay kwi, mbən beni damugə mbən mə anwine zənə atey kwi, amə wa tom Asɨyisəg.

³ Amaʼazənə ba mə biri kwi amə wa tom Asɨyisəg ingiya? Ayə ywiri abú úŋwən kwi,

⁴ yə waʼa ki koʼo ma kwi mbən naʼa ijəg foro unoʼ iniŋe?

⁵ Yə waʼa ki koʼo ma kwi a num uyey nu u beni Kristo iyeŋ nə uŋwən numugə ba tom chini ni unya anóm Asɨyisəg foro Pita aghəy?

⁶ Kə awaʼa aba umugə nə Banabas mba mi faʼ akə u mba ubugə boʼo ijəgə?

⁷ Amə sogwi uwayn umə faʼa ni itu inyo ma? Amə ngwa umi kon imbayn fayin nu cha umi kod utɨŋi fayin moʼ? Amə ngwa umə nəmə injəg nu cha umi nugə iben ma?

⁸ Akaʼa ma wa nyoŋ atəw naʼa ikay iniŋ ighayn anó zəŋ, aka unoʼo Mose nibi ghayn aba ichin ichin?

⁹ Ayə ungɨŋ unoʼo Mose kwi, “I kod ayə uchəw abú ipoŋ Amaʼazənə imə məʼə ikywi.” Nwiye waʼa ghayn anó zəŋ aba da ipoŋ?

¹⁰ Aka yə́ mə́ ghayn amə da ngwa? Mbə́ ŋwaʼanayn amə da ngwa, damugə wa ŋunə umə iwuw abon uyə iwuw nəmə ama mə aba akə ughəy mbənə umi jaŋ. Wa ŋunə umə məʼə ikywi u yə məʼə nəmə ama mə aba akə ughəy mbənə umə jaŋa.

¹¹ Mba si kon u aghəy mbənə Azugə zayn zayn naʼa ina injən akaʼa. Awaʼa mə anó iboŋ amə aghəy mba num aghəy moʼ inen?

¹² Ba moʼ mbə mə nə ikay ibiri aghəy moʼ inen nji ka mba mə nə ikay chigə úŋwən? Asɨmə cha mba num ngwa ikay wu. Mba yimə fiŋ akə unó ujum da ka kən ma ukən uchuŋ ŋunə mba ghayn da Kristo.

¹³ Cha mbən di kyay kwi, ba mbənə umə faʼa ambəŋ Nwiye umbə jəgə ambəŋ Nwiye? Cha mbən nibi kyay kwi, ba mbənə umə naʼa u aghəy ifá umbə num aba akə u aghəy ifá mbənə umə naʼa?

¹⁴ Amə nibə ichin ichin nu Asɨyisəg si sob kwi ba mbənə umə ghayn ukən uchuŋ u jəg akə ukən uchuŋ wu.

¹⁵ Asɨmə cha a di si num aŋu ikay ighəy unó mbəŋ. Cha amə ŋwaʼanayn aŋwaʼanayn zəŋ da mbən aghəy unó mbəŋ iniŋ. A yi kaŋa iboŋ kwi, aku chigə umugə wa mo mi kən aŋu kwi, ka a komo aŋu iguwə damugə a ghayn ukən uchuŋ.

¹⁶ A bə mə ghayn ukən uchuŋ, akə ma anó iniŋ imə komo iguwə damugə ayə ghayn ukən uchuŋ. Amə anó atey kwi ayi aghəy nigə. Ingəʼ yi nyi igun iniŋ ighari abə ki ghayn aŋu ukən uchuŋ.

¹⁷ A bə mə ghayn ukən uchuŋ damugə a wuʼi ighayn, nji ayi mə nə uchoʼo afaʼa. A bə mə kwi cha mə iwuʼi ighayn ukən uchuŋ, nji ayə aghəy amə anó zənə Nwiye zi ungɨŋ umbəŋ ubugə.

¹⁸ Anigə, uŋu uchoʼo afaʼa amə ngiya? Amə kwi a yi ighayn ukən uchuŋ ibuw. Cha a num aŋu ikay zənə imə iniŋ ighəy kwi ba naʼa choʼo afaʼa iniŋ.

¹⁹ Ka nə amə aghəy anó zənə awuʼi nu cha amə aŋu sob abú wa moʼ. Asɨmə, mə si beni sob abú ba ujum da ighəy kwi ba unanaʼ beni Kristo.

²⁰ Amaʼazənə amə akaʼa ba Jû, ayə chomo ni wa moʼ akaʼa úŋwən da ighəy kwi u beni Kristo. Amaʼazənə amə akaʼa ba mbənə umə isiyə unoʼo Mose, a yə chomo ni wa ŋunə umə isiyə unoʼo Mose da ighəy kwi, ba mbənə umə isiyə unoʼo Mose u beni Kristo, Ka nə cha amə isiyə unoʼo wu.

²¹ Amaʼazənə amə akaʼa ba mbənə cha umə isiyə unoʼo Mose, ayə chomo ni wa ŋunə cha umə isiyə unoʼo Mose, Ka di ma kwi cha amə isiyə unoʼo wu. Asɨmə ayə aton unoʼo Kristo. Boʼo ighəy kwi ba mbənə cha umə isiyə unoʼo u bəni Kristo.

²² Amaʼazənə amə akaʼa ba mbənə umə ibó, ayə nibə ibó nə úŋwən, da ighəy kwi ba mbənə umə ibó u beni Kristo. Mə si beŋe akə u aghəy ujum abú ba ujum da ichigə akə ikudi inji ujum ichi umoʼ angəʼ.

²³ A yə aghəy unó mbəŋ ujum da ukən uchuŋ. A yə aghəy ney da ami mə nə aborobod zənə ukən uchuŋ mə aghəy kwi amə abú ba.

²⁴ Cha mbən kyay kwi, akə inoro ba jum mbə noro asɨmə aba wa ufeyn mə num uneʼe? Anigə, mba noro akə ukudu inji ŋunə mbən mi mə nə uneʼe wu.

²⁵ Ba jum mbənə umə tana inyo inod, umbə yimə inyo uchuŋ uchuŋ akə nji ujum. U mbə ghəy ney da inum uneʼe ŋunə cha umə tənə akə ighari feyn. Asɨmə mba yə ghəy ney da inum uŋunə umə tənə koŋ.

²⁶ Anigə, cha amə noro ibuw ibuw. Cha amə zoŋo aŋu ni wa ŋunə umə komo usin ka.

²⁷ A yə yimə inyi inyo da i beni aboʼo inyi da a bə ghayn ukən uchuŋ abú ba chini, ka a sam aŋu uneʼe wu.