1 Korintiyans 8 - Aŋwaʼanayn Uso Fey

Anó da u ghəy jəgi mbənə u mə́ ana ni fá abú unwiye ibuw ibuw

¹ Akinine, ayə kaba ghayn da ijəg tənə u mə naʼa ni ghəy ifá abú unwiye ibuw ibuw. Mba kyay kwi, “Umba jum mba yə nə iwe anji zənə mbən moʼ mə ghayn.” Iwe yə ghəy ba beʼere inyo, asɨmə iwuʼi yə koro ba akə imbim feyn.

² Cha wa moʼ ŋunə u kono kwi yə kyay anó kyay ma anji zənə yə mi kyay.

³ Asɨmə Nwiye kyay wa ŋunə u wuʼi uŋwən.

⁴ Anigə ayə kaba inayn da ijəg tənə umə naʼa akə ghəy ifá abú unwiye ibuw ibuw. Mbən kyay kwi, “Cha unwiye ibuw ibuw mə ma ghəy moʼ.” Mba nibi kyay kwi, “Nwiye aba feyn.”

⁵ Kə adi ma kwi ughəy mbənə mbən nanaʼ mə tiya kwi, “Unwiye umbə azobo kə akə asəy,” Umugə amə asiʼ kwi, “Unwiye nanaʼ nə asiyisəg nanaʼ mbə awu,”

⁶ Asɨmə ina, Nwiye aba feyn nu amə mbaʼ. Amə uŋwən tana u ghəy ujum. Mba yə ikay da uŋwən. Mba yə nibə aba nə Asɨyisəg feyn nu amə Yeso Kristo. Nwiye chigə anjim ma itana u ghəy ujum. Mba yə nibə ikay da uŋwən.

⁷ Asɨmə akə ma ba jum kyay anó zəŋ. Ba moʼ mbə awu nu u si mənə imə jəgə u ghəy jəgi mbənə u naʼa nə ghəy ifaʼ abú unwiye ibuw ibuw. Amaʼazənə umə jəgə, umbə bugə kono kwi amə u ghəy unwiye ibuw ibuw u mə jəgə asiʼe asiʼ. Numugə fiŋ uma tə bugə ibó, iyə saʼa úŋwən. Anigə u mbə bugə kono kwi mbə ghəy anó iboŋ.

⁸ Cha u ghəy jəgi mə ghəy ma kwi mba mə ba chuŋ ifigi Nwiye. Cha mba mi isam ngwa ghəy moʼ damugə cha mba di jəg. Cha mba mi jəg ngwa injim moʼ damugə mba jəgə.

⁹ Mbən num azom kwi, umugə mba mə jəgə ughey moʼ kə umugə cha mba mə jəgə u ghəy moʼ ka ghəy ma kwi ba mbənə i beni ma ibó gow anó moʼ.

¹⁰ Wa moʼ ŋunə fiŋ ma ibó bi zən ayə, u ngwə ŋunə ngwə mə nə iwe mə jəgə ungɨŋ imbəŋ unwiye ibuw ibuw, aka ami ghəy kwi u ŋuw jəg u ghəy mbənə u naʼa akə ghəy ifá abú unwiye ibuw ibuw?

¹¹ Anigə, u ngwə unya ŋunə u bó nu Kristo nibi ku da uŋwən si nim damugə ngwə mə ni iwe.

¹² Amaʼazənə ngwə bə ghəy anó iboŋ abú u ngwə unya akə ukudu nji ŋunə, anigə ichiŋe fiŋ ma nu imə ibó, kyay kwi ngwə ghəy anó iboŋ abú Kristo.

¹³ Anigə, aghəy zənə a jəgə bə ghəy kwi uŋu unya gow anó, cha ami noʼo igha koro aŋu nyə̂, da ka ghəy aŋu uŋu unya u gow.