1 Korintiyans 7 - Aŋwaʼanayn Uso Fey

Ibiri da inama

¹ Akinine, iŋu akə anó mbənə mbən ŋwaʼanayn, mə ghayn kwi yə boŋ kwi ka anom nam ma?

² Asɨmə umugə ufibiri unó si naʼ, yə koʼ kwi anom feyn feyn mə ni uyey, ayey feyn feyn mə nibə mə nə unom.

³ Anom ghəy anó zənə unóm mə ghəy abú uyey unóm, ayey nibi ni ghəy anó zənə uyey mə ghəy abú unóm ma.

⁴ Cha ayey ni ikay igun inyo ma, amə unom ma mə nə ikay igun inyo ma. Cha anom ni ikay igun inyo ma, amə uyey ma mə ni ikay igun ma.

⁵ Ka wa moʼ ton ma inaʼ inyo ma abú wa uwiy, nigə úŋwən si beni kwi umbi ghəy nigə akə amaʼa moʼ, da mbən num amaʼ ichaʼara Nwiye. Mbən bə mara, mbə gha foro da ka Satan kwaʼara ma ŋwen anjim umugə cha mbən kyay yimə inyo.

⁶ Ayə ghayn mə kwi mbən ki ghəy nigə, akə ma kwi, mə sob amə sobo.

⁷ Mə mi wuʼ kwi, ba jum chomo nu umugə, asɨmə wa feyn feyn yə nə uneʼe ma nu Nwiye naʼa. Wa feyn yə nə uneʼe uŋu, wa chini yə nə uneʼe uwiy.

⁸ Akinine a yə ghayn abú ba mbənə cha u di nam foro abú mbə ayey uti kwi, yə boŋ kwi mbən chomo yi nam numugə a chomo.

⁹ Asɨmə, abə mə kwi cha ngwə mi kyay iyimi inyo, mbən nam. Yə boŋ kwi mbən nam chigə umugə inyo mi mə nyaŋara.

¹⁰ Ayə ghayn abú ba mbənə u si nam kwi, ka ayey duw ma inama. Akaʼa ma umugə aghayn amə Asɨyisəg ghayn.

¹¹ Asɨmə ayey bə duw inama, ka ugha inam ma. U bə kaba inam, u gha wene ŋu abú unom ma. Ka anom fuw ma uyey ma.

¹² Ayə ghayn abú abúʼə ba kwi, anom moʼ nu u beni Kristo bə mə ni uyey nu cha ayey wu beni ma Kristo, anigə ayey wu be beni kwi iyi chomo ni uŋwən, ka u fuw ma ayey wu. Anó zəŋ amə umugə ghayn, akaʼa ma Asɨyisəg.

¹³ Ayey moʼ bə nam unom nu cha anom wu beni ma Kristo, anigə anom wu bə beni kwi iyi chomo ni uŋwən ka ayey wu duw ma inama.

¹⁴ Nwiye yi ghəy kwi anom wu nu cha u beni Kristo zayn anjim uyey ma. U yi nibi ghəy kwi ayey wu nu cha u beni Kristo zayn anjim unom ma. Yi di ka nigə, nji buŋ ma mbi chomo ni ba mbənə cha u di zayn. Asɨmə numugə amə nigə úŋwən mbi zayn.

¹⁵ Wa moʼ akaʼa u mbənə cha u di beni Kristo bə kaba isayn wa ŋunə u beni Kristo, mbən sayn uŋwən u ŋuw ma. A kə nji zəŋ, cha udi kod anom kə ayey ŋunə u beni Kristo kwi u chomo nə uŋwən. Nwiye tiya ngwa kwi mba chomo akə aborobod.

¹⁶ Uyey, ngwə kyay akə ngiya kwi aka ngwə mi chi anom angəʼ? Unom, ngwə kyay akə ngiya kwi aka ngwə mi chi ayey angəʼ?

Mbən chomo aba anji zənə Nwiye tiya ngwən

¹⁷ Wa feyn feyn injən akaʼa uchomo aba anji zənə Asɨyisəg ghəy kwi u chomo. U nibi chomo aba anji zənə Nwiye tiya uŋwən. Amə unoʼo mbənə amə naʼa abú ba ungɨŋ ifere ba Kristo ujum.

¹⁸ Mbə́ waʼa si iney ikad wa moʼ akə amaʼazənə Nwiye tiya uŋwən? Ka u kaba ma kwi ichiyə anwini wu itey kwi mbə di si iney ma uŋwən. Mbə bə ki si iney ma ikad wa moʼ amaʼazənə Nwiye tiya uŋwən, ka u kaba ma kwi u ney ikad ma.

¹⁹ Kə mbə si ney wa kə cha mbə di si iney uŋwən, cha zigə mə ma anó moʼ. Anó zənə akoʼoro amə kwi, mba num unoʼo Nwiye.

²⁰ Wa feyn feyn chomo aba akə nji zənə Nwiye tiya uŋwən.

²¹ Ngwə́ waʼa mə sob amaʼazənə Nwiye tiya ayə? Imə tumə ayə inyo. Asɨmə apan bə mə awu inigə idu akə sob, num apan wu idu.

²² Wa ŋunə Asɨyisəg tiya uŋwən nu amə isob cha uŋwən di ni bere ma sob numugə uŋwən si siy akə anó feyn nə Asɨyisəg. Amə ichin ichin kwi wa ŋunə Asɨyisəg tiya uŋwən nu akə ma sob, uŋwən amə isob Kristo.

²³ Nwiye si zon ngwən akə ukab nanaʼ. Anigə ka mbən beŋe ngwən akə isob ba inyoŋ atəw.

²⁴ Umbəŋ unya, wa feyn feyn chomo akə ibumi Nwiye aba akə nji zənə Nwiye tiya uŋwən.

Anó da ayey ŋunə cha u di nam foro anó da ayey uti

²⁵ Akinine, amə da ba mbənə cha u di nam, cha ikɨy moʼ iniŋ nu inoʼo abú Asɨyisəg ighayn abú úŋwən. Asɨmə a yə naʼa inyi kono ni wa ŋunə Asɨyisəg si diri anigə ighəy amə wa nu ba mbə beni anó zənə amə ghayn.

²⁶ Mba bə iney ingəʼ zənə imə akinine, mə kono kwi yə boŋ kwi ba chomo numugə u məŋi.

²⁷ Ngwə si nama? Ikaba yə kwi ifuw ayə ayey wu. Cha ngwə di si nama? Anigə ikaba ayə uyey.

²⁸ Asɨmə ngwə bə si nam, cha ngwə di ghəy ayə anó iboŋ. Ayey ŋunə cha u di si nam u bə nam cha u di ghəy ma anó iboŋ. Asɨmə, ba mbənə u nama, u mbi zəw ingəʼ nanaʼ akə ungɨŋ isəg zəŋ. Anigə, cha amə kaba aŋu kwi ingəʼ wu nyi igun inen.

²⁹ Umbəŋ unya, anó zənə amə ighayn amə kwi, amaʼazənə isəg mi nwi si tinə. Anigə inoʼ akinine, ba mbənə u si nam u chomo ní ba mbənə cha u di si nam.

³⁰ Ba mbənə umə idey u chomo ni ba mbənə cha umə idey. Ba mbənə umə wuʼe uma, u chomo ni ba mbənə cha umə wuʼe uma, u mbənə umə zono ughəy u chomo ni kwi cha ughəy abú uŋwən.

³¹ Mbə sə faʼa nə u ghəy mbəŋ akə ungɨŋ isəg, mbən chomo ngwən ni kwi cha anó moʼ inen ighəy nə u ghəy wu, damugə isəg zəŋ akinine yə chigə amə chigi.

³² Cha amə kaba aŋu kwi, mbən ki tumə inyo. Wa ŋunə cha udi si nam, uyə zi fiŋ ma amə akə afaʼa Asɨyisəg anji zənə umi ghəy kwi fiŋ Asɨyisəg boŋo.

³³ Asɨmə anom ŋunə u si nam, u yə kono unó ungɨŋ isəg anji zənə umi ghəy fiŋ uyey ma iboŋo.

³⁴ Anigə ikono ma ghaba. Ayey ŋunə cha u di nam, kə ayey ŋunə cha u di si kyay ma anó anom, u yə zi fiŋ ma amə akə afaʼa Asɨyisəg umugə u chomo u zayn zayn akə nyə̂ inyo foro akə azugə. Ayey ŋunə u nama yə kono unó ungɨŋ isəg akə nji zənə umi ghəy fiŋ unom ma iboŋo.

³⁵ Ayə ghayn unó mbəŋ damugə ayə kaba iwere ngwən. Akaʼa ma kwi, ayə kaba iton kwi ka mbən ghəy ngwən u mbən unó. Ayə kaba amə kwi mbən chomo akə nji zənə ikoʼoro. Ayə nibə kaba kwi ka ghəy moʼ buri ma itən ikono anji zənə mbən mə faʼa abú Asɨyisəg.

³⁶ Wa moʼ bə kono kwi cha imə ghəy unó akə nji zənə ikoʼoro abú uyey ukwere, inyo ma bə mə nyaŋara anigə ukono kwi yə mi nam, u nam cha anó iboŋ awu.

³⁷ Asɨmə anom moʼ bə si siy ungɨŋ fiŋ ma kwi cha umi nam ayey nu yə si kaʼ nu cha umə tinə uŋwən itini, anigə ikyay iyimi inyo ma ighəy anó zənə yə si kono anigə yə ghəy amə anó chuŋ.

³⁸ Anigə, anom ŋunə u nama ayey ŋunə yə si kaʼ yə ghəy anó chuŋ. U ŋunə u ton inam, yə ghəy anó nu aboŋo chigə.

³⁹ Ayey yi chomo nə unom ma akə amaʼazənə umə ikay. Asɨmə unom ma bə si ku, ubə wuʼ, u nam unom chini. Asɨmə anom wu mə wa ŋunə u beni Kristo.

⁴⁰ Asɨmə akə inyi kono, mə kyay kwi u yi wuʼ azəd amaʼazənə u chomo nigə cha agha nam. Mə kono kwi Azugə Nwiye yə ungɨŋ iniŋ. Amə aŋwən a ghey kwi aghayn nigə.